ସମ୍ବଲପୁର: ଦୀର୍ଘ ଦିନ ଧରି ସମ୍ବଲପୁର ଜିଲ୍ଲାରେ ଡାକ୍ତର ପଦବୀ ଖାଲି ପଡିଛି । ପଶ୍ଚିମ ଓଡିଶାର ପ୍ରାଣକେନ୍ଦ୍ର କୁହାଯାଉଥିବା ସମ୍ବଲପୁରରେ ରହିଛି ସମ୍ବଲପୁର ଜିଲ୍ଲା ମୁଖ୍ୟ ଚିକିତ୍ସାଳୟ , 2 ଟି ଉପଖଣ୍ଡୀୟ ଚିକିତ୍ସାଳୟ ଓ 9ରୁ ଊର୍ଦ୍ଧ୍ବ ପିଏଚସି ଓ ସିଏଚସି ପରି ଡାକ୍ତରଖାନା । ଗୋଟିଏ ପଟେ ଏହି ଡାକ୍ତରଖାନା ଉପରେ ଜିଲ୍ଲା ବାହାରର ଲୋକ ମଧ୍ୟ ନିର୍ଭରଶୀଳ ରହୁଥିବାରୁ ଏବେବି ଡାକ୍ତର ମରୁଡି ଏକ ବଡ଼ ସମସ୍ୟା ହୋଇ ରହିଛି ।
ଖବର ଅନୁଯାୟୀ, ସମ୍ବଲପୁର ଜିଲ୍ଲା ମୁଖ୍ୟ ଚିକିତ୍ସାଳୟ, ରେଢ଼ାଖୋଲ ଓ କୁଚିଣ୍ଡା ପରି ଉପଖଣ୍ଡୀୟ ଚିକିତ୍ସାଳୟ ସହ ସବୁ ବ୍ଲକରେ ରହିଛି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଓ ସହରାଞ୍ଚଳ ପ୍ରାଥମିକ ସ୍ବାସ୍ଥ୍ୟ କେନ୍ଦ୍ର । ତେବେ ଗ୍ରାମାଞ୍ଚଳରୁ ସହର ସବୁଠି ଡାକ୍ତର ପଦବୀ ଖାଲି ରହିଛି ।
ମିଳିଥିବା ସୂଚନା ଅନୁସାରେ, ଜିଲ୍ଲାର ଅତିରିକ୍ତ ସ୍ବାସ୍ଥ୍ୟ ନିର୍ଦ୍ଦେଶକ ପଦବୀ 13ଟି ରହିଥିବାବେଳେ ଅଛନ୍ତି 5 ଜଣ, ଜୁନିୟର ଡାକ୍ତର ପଦବୀ 22 ଥିବାବେଳେ ଅଛନ୍ତି 17 ଜଣ, ବରିଷ୍ଠ ଡାକ୍ତର କ୍ଲାସ-1 ପଦବୀ 76 ଥିବାବେଳେ ଅଛନ୍ତି 49, କନିଷ୍ଠ ଡାକ୍ତର ପଦବୀ 93 ଥିବାବେଳେ ଅଛନ୍ତି ମାତ୍ର 57 ଜଣ ।
ଏଭଳି ଭାବେ ବର୍ତ୍ତମାନ ଜିଲ୍ଲାରେ ସର୍ଵମୋଟ 100ରୁ ଊର୍ଦ୍ଧ୍ବ ପଦବୀ ଖାଲି ଥିବାର ସୂଚନା ମିଳିଛି । ଏପଟେ ଗ୍ରାମାଞ୍ଚଳରେ ଥିବା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଗୁଡିକର ଅବସ୍ଥା ଆହୁରି ଖରାପ । କେତେକ ସ୍ଥାନରେ ଡାକ୍ତର ନଥିବାବେଳେ ଆଉ କେତେକ ସ୍ଥାନରେ ଡାକ୍ତର ଥିଲେ ମଧ୍ୟ ସବୁ ସମୟରେ ରହୁନାହାଁନ୍ତି ବୋଲି ଅଭିଯୋଗ ହେଉଛି ।
ଏପଟେ ଝାରସୁଗୁଡା ବିଧାୟକ ନବ ଦାସ ସ୍ବାସ୍ଥ୍ୟମନ୍ତ୍ରୀ ଭାବେ ପଦ ସମ୍ଭାଳିବା ପରେ ଲୋକଙ୍କ ମନ ଭିତରେ ଆଶା ଜାଗ୍ରତ ହୋଇଛି । ନିକଟ ଅତୀତରେ ସ୍ବାସ୍ଥ୍ୟ ମନ୍ତ୍ରୀ ସମ୍ବଲପୁର ଆସିଥିବାବେଳେ ତାଙ୍କୁ ଏହି ସମସ୍ୟା ନେଇ ପଚାରିବାରୁ ସେ 2 ବର୍ଷ ଭିତରେ ସବୁ ପଦବୀ ପୂରଣ ହେବ ବୋଲି ଆଶ୍ବାସନା ଦେଇଛନ୍ତି ।
ଆଗାମୀ ଦିନରେ ସ୍ବାସ୍ଥ୍ୟ ବିଭାଗରେ ଏପରି ଵ୍ୟଵସ୍ଥା କରାଯିବ, ଯେପରି କୌଣସି ସରକାରୀ ମେଡିକାଲ କଲେଜରେ ପଡୁଥିବା ଡାକ୍ତରୀ ଛାତ୍ର ରାଜ୍ୟ ବାହାରକୁ ଯାଇ ପାରିବେ ନାହିଁ । ଫଳରେ 2 ବର୍ଷ ଭିତରେ ରାଜ୍ୟରେ ଡାକ୍ତର ବଳକା ପଡିବେ ବୋଲି କହିଛନ୍ତି ସ୍ବାସ୍ଥ୍ୟମନ୍ତ୍ରୀ ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
