ସମ୍ବଲପୁର: ଦୁଇ ଜଣଙ୍କ ମଧ୍ୟରେ ହୋଇଥିବା ବିବାଦର ସମାଧାନ କରିବା ଅନ୍ୟଜଣେ ଯୁବକଙ୍କୁ ମହଙ୍ଗା ପଡିଛି । କଳି ସମାଧାନ କରିବାକୁ ଆସିଥିବା ଆସିଥିବା ଯୁବକଙ୍କୁ ପେଟ୍ରୋଲ ଢାଳି ନିଆଁ ଲଗାଇ ମାରିଦେବାକୁ ଉଦ୍ୟମ କରାଯାଇଛି । ଏ ଘଟଣା ପରେ ତାଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି ।
ଏଭଳି ଚାଞ୍ଚଲ୍ୟକର ଘଟଣା ଦେଖିବାକୁ ମିଳିଛି ସମ୍ବଲପୁରର ରେଢ଼ାଖୋଲ ଥାନା ଅଧିନସ୍ଥ ଖନ୍ଧାଢ଼ିପ ଛକରେ । ଏଠାରେ ଗାଡିକୁ ନେଇ ଦୁଇ ଜଣ ଯୁବକଙ୍କ ମଧ୍ୟରେ ପ୍ରଥମେ ଯୁକ୍ତିତର୍କ ଏବଂ ପରେ ମାଡ଼ପିଟ ହୋଇଥିଲା । ସେଠାରେ ଛିଡା ହୋଇଥିବା ହରି ପୁରୋହିତ ନାମକ ଜଣେ ଯୁବକ କାହିଁକି ଝଗଡା କରୁଛ ବୋଲି କହି ପରସ୍ପର ମଧ୍ୟରେ କଳି କରୁଥିବା ଦୁଇ ଯୁବକଙ୍କୁ ଅଲଗା କରି ଦେଇଥିଲା । ଝଗଡା କରୁଥିବା ସେହି ଦୁଇ ଜଣଙ୍କ ମଧ୍ୟରୁ ସଞ୍ଜିତ ନାମକ ଯୁବକ ରାଗି ଯାଇ ହରିଙ୍କ ଉପରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲା ।
ଯାହା ଫଳରେ ତାଙ୍କର ଅଣ୍ଟା ଉପର ଭାଗରେ ନିଆଁ ଲାଗି ଯାଇଥିଲା । ତତକ୍ଷଣାତ ପିନ୍ଧିଥିବା ସାର୍ଟକୁ ଖୋଲିଦେଇ ଦୌଡ଼ି ପଳାଇଥିଲେ ହରି । ହେଲେ ତାଙ୍କ ଦେହର ଅଂଶ ବହୁମାତ୍ରାରେ ପୋଡି ଯାଇଥିଲା । ଏ ଖବର ପାଇବା ପରେ ସ୍ଥାନୀୟ ଲୋକେ ତୁରନ୍ତ ତାଙ୍କୁ ରେଢ଼ାଖୋଲ ହସ୍ପିଟାଲରେ ଭର୍ତ୍ତି କରିଥିଲେ । ତାଙ୍କର ମୁହଁ, ହାତ ଦେହ ପୋଡିଯାଇଥିବା କହିଛନ୍ତି ଡାକ୍ତର। ତାଙ୍କର ଅବସ୍ଥା ଗୁରୁତର ହେବାରୁ ତାଙ୍କୁ ବୁର୍ଲା ହସ୍ପିଟାଲକୁ ସ୍ଥାନାନ୍ତର କରାଯାଇଛି । ଏ ଘଟଣାରେ ପୋଲିସ ସଞ୍ଜିତକୁ ଗିରଫ କରି ପଚରାଉଚରା କରୁଛି । ସ୍ଥାନୀୟ ଅଞ୍ଚଳରେ ଏ ଘଟଣା ଚର୍ଚ୍ଚାର ବିଷୟ ପାଲଟିଛି ।
ସମ୍ବଲପୁରରୁ ବାଦଶାହା ଜୁସ୍ମନ ରାଣା, ଇଟିଭି ଭାରତ
