ସମ୍ବଲପୁର: ପାଖେଇ ଆସୁଛି ନିର୍ବାଚନ । ବଢି ଚାଲିଛି ରାଜନୀତିକ ଉଷ୍ମତା । ଶାସନ ଗାଦି ହାତେଇବା ପାଇଁ ଚାଲିଛି ସମସ୍ତ ପ୍ରକାର ପ୍ରୟାସ । ଏ ନେଇ ନେତାଙ୍କ ଆରୋପ ପ୍ରତ୍ୟାରୋପ ମଧ୍ୟ ବଢିବାରେ ଲାଗିଛି । ଯେଉଁଥିରେ ନିଆଁରେ ଘିଅ ଢାଳିବା ଭଳି କାମ କରିଛି 7 ତାରିଖରେ ହୋଇଥିବା ପାନୀୟ ଜଳଯୋଗାଣ ପ୍ରକଳ୍ପର ଉଦ୍ଘାଟନୀ ସମାରୋହ । ଯାହାକୁ ଏବେ ଏକ ରାଜନୈତିକ ଚାଲ ବୋଲି ଅଭିଯୋଗ କରିଛନ୍ତି ବିରୋଧୀ ।
ସୂଚନା ଅନୁଯାୟୀ ଦୁଇ ଦିନ ତଳେ ସ୍ଥାନୀୟ ରେଢାଖୋଲ ନିର୍ବାଚନୀ ମଣ୍ଡଳୀରେ ଉଦଘାଟିତ ହୋଇଥିଲା ଏକ ଅସମ୍ପୂର୍ଣ୍ଣ ପାନୀୟ ଜଳଯୋଗାଣ ପ୍ରକଳ୍ପ । ଯାହାକୁ ଉଦ୍ଘାଟନ କରିଥିଲେ ବିଜେଡି ବିଧାୟକ ରୋହିତ ପୂଜାରୀ ଓ ସ୍ଥାନୀୟ ସାଂସଦ ନଗେନ୍ଦ୍ର ପ୍ରଧାନ । ହେଲେ ସମ୍ପୂର୍ଣ୍ଣ ନ ହୋଇଥିବା ପ୍ରକଳ୍ପକୁ ଠିକ୍ ନିର୍ବାଚନ ପୂର୍ବରୁ କାହିଁକି ଉଦ୍ଘାଟନ କରାଯାଇଛି ବୋଲି ଜୋର ଧରିଛି ରାଜନୈତିକ ଚର୍ଚ୍ଚା ।
ଅନ୍ୟପଟେ ନିର୍ବାଚନ ଆଚରଣ ବିଧି ଲାଗୁ ହେବା ଆଗରୁ ଏହା କେବଳ ଭୋଟ ହାତେଇବାର ଏକ ପ୍ରୟାସ ବୋଲି ଅଭିଯୋଗ କରିଛନ୍ତି ବିରୋଧୀ ଦଳ । ପ୍ରକାଶ ଯେ, 2013 ମସିହାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ପ୍ରକଳ୍ପର ଶୁଭାରମ୍ଭ କରିଥିବା ବେଳେ ଏହି ପ୍ରକଳ୍ପରେ ଖର୍ଚ୍ଚ ହୋଇଥିଲା ମୋଟ୍ 36 କୋଟି ରାଜସ୍ବ । ପ୍ରକଳ୍ପଟି ଜରିଆରେ 28 କିଲୋମିଟର ଦୂରତା ଥିବା କିୟାକଟାଠାରୁ ମହାନଦୀର ପାଣି ଆଣିବାର ଯୋଜନା ରହଥିଲା । ହେଲେ ପ୍ରକଳ୍ପ ଜରିଆରେ ଘରକୁ ଘର ପାଇପ ବିଛା ହୋଇଥିଲେ ମଧ୍ୟ ପାଇପ ଯୋଗେ ଆସୁନି ପାଣି ।
କେବଳ ସେତିକି ନୁହେଁ ଏହି ପାଇପ ଯୋଗେ ମହାନଦୀ ନୁହେଁ ପିଏଚ୍ଡି ବିଭାଗର ପାଣି ଆସୁଥିବା ବେଳେ ଏହାକୁ ମହାନଦୀ ପାଣି କହି ପ୍ରକଳ୍ପକୁ ଉଦ୍ଘାଟନ କରାଯାଇଥିବା ଅଭିଯୋଗ କରିଛନ୍ତି ବିରୋଧୀ ଦଳ ନେତା । ପ୍ରତ୍ୟୁତରରେ ବିଧାୟକ ରୋହିତ ପୂଜାରୀ କହିଛନ୍ତି କି ଘରକୁ ଘର ପାଇପ ବିଛା ଯାଇ ନ ଥିବାରୁ କାମ ମଝି ମଝିରେ ଅଟକୁଛି । ଏଥିସହ ଜନସ୍ବାସ୍ଥ୍ୟ ବିଭାଗ ଓ ଜିଲ୍ଲା ପ୍ରଶାସନ ଏହା ସମ୍ପୂର୍ଣ୍ଣ କରିଥିବାରୁ ଉଦଘାଟନ ପାଇଁ ଆମକୁ ଡକାଯାଇଥିଲା ବୋଲି କହିଛନ୍ତି ରୋହିତ ।
ତେଣୁ ଯଦି ପ୍ରକଳ୍ପ ସମ୍ପୂର୍ଣ୍ଣ ହୋଇ ନାହିଁ ଓ ଉଦ୍ଘାଟନ ପାଇଁ ଡକାଯାଇଛି ସେଥିପାଇଁ ଜନସ୍ବାସ୍ଥ୍ୟ ବିଭାଗ ଦାୟୀ ବୋଲି କହି ଦୋଷ ଛଡାଇଛନ୍ତି ରୋହିତ । ଏପଟେ ଜନସ୍ବାସ୍ଥ୍ୟ ବିଭାଗର ବିଭାଗୀୟ ଅଧିକାରୀ କହିଛନ୍ତି କି ଘରକୁ ଘର ପାନୀୟ ଜଳ ଯୋଗାଣ ପାଇଁ ଆଉ ଦୁଇ ତିନି ମାସ ସମୟ ଲାଗିବ । ତେବେ ବର୍ତ୍ତମାନ କିୟାକଟାରୁ ପ୍ରକଳ୍ପସ୍ଥଳ ପର୍ଯ୍ୟନ୍ତ ପାଣି ଆସିପାରୁଛି । ତେଣୁ ଘରକୁ ଘର ପାଇପ ବିଛା ଯାଇ ନଥିବାରୁ ପାଣି ଅଣା ଯାଉନାହିଁ ।
ଦେଖିବାକୁ ବାକି ରହିଲା କେଉଁ ପାଣି କୁଆଡେ ଯାଉଛି ଓ ଏହା କେଉଁ ଦଳ ପାଇଁ କେତେ ସହାୟକ ହେଉଛି ।
ସମ୍ବଲପୁରରୁ ଜୁସ୍ମନ ରଣା, ଇଟିଭି ଭାରତ
