ସମ୍ବଲପୁର: ପୃଥିବୀରେ ଗ୍ଲୋବାଲ ଓ୍ବାର୍ମିଂ ଓ ବଡ ପ୍ରସଙ୍ଗ ଅଟେ। ପରିବେଶ ସୁରକ୍ଷା ଓ ପାଗ ପରିବର୍ତ୍ତନ ରୋକିବା ପାଇଁ ଜଙ୍ଗଲ ସୁରକ୍ଷା ଅପରିହାର୍ଯ୍ୟ ହୋଇଯାଇଛି । ଅନ୍ୟପଟେ ଜଙ୍ଗଲ ସୁରକ୍ଷା ଜଙ୍ଗଲ ଉପରେ ନିର୍ଭରଶୀଳ ଲୋକଙ୍କ ଉପରେ ନିର୍ଭର କରିଥାଏ। କାରଣ ଏହି ଲୋକମାନେ ଜଙ୍ଗଲକୁ ପ୍ରତ୍ୟେକ୍ଷ ଅଥବା ପରୋକ୍ଷରେ ସୁରକ୍ଷା ଦିଅନ୍ତି । ତେଣୁ ଏହିଭଳି ଲୋକଙ୍କୁ ଆର୍ଥିକ ସ୍ଵଚ୍ଛଳ ଓ ସ୍ବାବଲମ୍ବୀ କରିବାକୁ ବନ ବିଭାଗ ଦେଉଛି ନିଯୁକ୍ତି ଭିତ୍ତିକ ତାଲିମ ।
ପରିବେଶ ସନ୍ତୁଳନ ପାଇଁ ଜଙ୍ଗଲ ସୁରକ୍ଷା ନିହାତି ଜରୁରୀ । ଆଉ ଜଙ୍ଗଲକୁ ସୁରକ୍ଷିତ ରଖିବାକୁ ହେଲେ ଜଙ୍ଗଲ ଉପରେ ନିର୍ଭରଶୀଳ ଲୋକଙ୍କ ସହଯୋଗ ନିହାତି ଜରୁରୀ । ଏଥିପାଇଁ ବର୍ତ୍ତମାନ ସମ୍ବଲପୁର ବନ ବିଭାଗ ଜଙ୍ଗଲ ସୁରକ୍ଷା ପାଇଁ ଅଭିନବ ପଦକ୍ଷେପ ଗ୍ରହଣ କରିଛି । ଜଙ୍ଗଲର ସୁରକ୍ଷା,ଉନ୍ନତି ଓ ଅଭିବୃଦ୍ଧି କରିବାକୁ ଏବେ ଜଙ୍ଗଲ ଉପରେ ନିର୍ଭରଶୀଳ ବନ ସୁରକ୍ଷା ସମିତିର ବେକାର ଯୁବକମାନଙ୍କୁ ନିଯୁକ୍ତି ଭିତ୍ତିକ ତାଲିମ ମାଗଣାରେ ଯୋଗାଉଛି ।
ଏମାନଙ୍କୁ ବର୍ତ୍ତମାନ ମୋଟର ସାଇକେଲ ରିପେୟାରିଂର ତାଲିମ ଦେଉଛି ବନ ବିଭାଗ । କାରଣ ଏହି ଯୁବକ ମାନେ ବେକାର ହୋଇ ରହିଲେ କୁସଙ୍ଗତ ପଡି ପଥଭ୍ରଷ୍ଟ ହେବାର ହେବାର ସମ୍ଭାବନା ରହିଛି । ଜଙ୍ଗଲ ବା କାଠ ମାଫିଆ ମାନେ ମଧ୍ୟ ଏହିଭଳି ଯୁବକଙ୍କ ବେକାରୀ ସମସ୍ୟାର ସୁଯୋଗ ନେଇ ଜଙ୍ଗଲ ନଷ୍ଟ କରନ୍ତି । ତେଣୁ ଏହି ଭଳି ଯୁବକ ମାନଙ୍କୁ ବର୍ତ୍ତମାନ ମୋଟର ସାଇକେଲ ରିପେୟାରିଂର ମାଗଣା ତାଲିମ ଦେଉଛି ବନ ବିଭାଗ ।
ଯୁବକ ମାନଙ୍କୁ ମୋଟର ସାଇକେଲ ମରାମତିର ସବୁ କୌଶଳ ଜଣେ ସ୍ବୀକୃତି ପ୍ରାପ୍ତ ଟ୍ରେନର ଦେଉଛନ୍ତି । କେବଳ ତାଲିମ ଦିଆଯାଉ ନାହିଁ ତାଲିମ ମିଳିବା ପରେ ସେମାନେ କିପରି ଗ୍ୟାରେଜ ଖୋଲିବେ ସେଥିପାଇଁ ଋଣ କିପରି ମିଳିବ, ବ୍ୟାଙ୍କ ଲିଙ୍କେଜ କିପରି ହେବ ସେନେଇ ମଧ୍ୟ ସହଯୋଗ କରୁଛି ବନ ବିଭାଗ । ଏହିଭଳି ଭାବରେ ଭାବରେ ଜଙ୍ଗଲ ଉପରେ ନିର୍ଭରଶୀଳ ଲୋକଙ୍କ ଜୀବନ ଜୀବିକା କିପରି ଉନ୍ନତି ହେବ ଓ ଜଙ୍ଗଲ ସୁରକ୍ଷା କିଭଳି ହେବ ସେନେଇ ସମ୍ବଲପୁର ଡିଏଫଓଙ୍କ ପ୍ରତ୍ୟେକ୍ଷ ତତ୍ତ୍ବାବଧାନରେ ଏହି ତାଲିମ ପ୍ରଦାନ କରାଯାଉଛି ।
ବର୍ତ୍ତମାନ ଜଙ୍ଗଲ ସୁରକ୍ଷା ପାଇଁ ସମ୍ବଲପୁର ବନ ବିଭାଗର ପକ୍ଷରୁ ନିଆଯାଇଥିବା ଏହି ପଦକ୍ଷେପକୁ ଜିଲ୍ଲାର ବିଭିନ୍ନ ବନ ସୁରକ୍ଷା ସମିତିର ଯୁବକ ମାନେ ସ୍ବାଗତ କରିଛନ୍ତି ।
ଇଟିଭି ଭାରତ, ସମ୍ବଲପୁର
