ସମ୍ବଲପୁର: ଜିଲ୍ଲା ଯୋଗାଣ ଅଧିକାରୀଙ୍କୁ ହତ୍ୟା ଧମକ ଦେଲେ ଅସନ୍ତୁଷ୍ଟ ଚାଷୀ । ତେବେ ସମ୍ବଲପୁର ରେଢ଼ାଖୋଲ ଉପଖଣ୍ଡର ନାକଟିଦେଉଳ ଓ ଧମା ଅଞ୍ଚଳର କିଛି ଚାଷୀ ଧାନ ବିକ୍ରିରେ ଟୋକନ ଓ ଟାର୍ଗେଟ ଜନିତ ସମସ୍ୟା ପାଇଁ ସିଏସଓଙ୍କ ସହ ଆଲୋଚନା ସମୟରେ କିଛି ଏମିତି ଦୃଶ୍ୟ ଦେଖିବାକୁ ମିଳିଥିଲା। ଟାର୍ଗେଟ ଓ ଟୋକାନ ସମସ୍ୟା ଯୋଗୁଁ ଚାଷୀଙ୍କ ଅମଳ ହୋଇଥିବା ଧାନ ଖଳାରେ ପଡି ରହିଥିବା ବେଳେ ଉପରେ ହାତୀ ଉପଦ୍ରବର ଭୟ । ‘ତେବେ ଯଦି ହାତୀ ଆମକୁ ଦଳି କି ମରିଦିଏ ମୁ କହୁଛି ମୁ ଆପଣଙ୍କୁ ଦଳିକି ମାରି ଦେବି !’ ଧାନ ବିକ୍ରି ସମସ୍ୟାରେ ଅତିଷ୍ଟ ଓ ଜର୍ଜରିତ ଜଣେ ଚାଷୀ ଭାବବିହ୍ଵଳ ହୋଇ ଜିଲ୍ଲା ଯୋଗାଣ ଅଧିକାରୀଙ୍କୁ ଜିଲାର କେତେକ ପ୍ରମୁଖ ବିଜେପି ନେତା ଓ ଚାଷୀଙ୍କ ସମ୍ମୁଖରେ ଏମିତି କଥା କହିଥିଲେ ।
ସମ୍ବଲପୁର ଜିଲ୍ଲାର ନାକଟିଦେଉଳ, ବାଟ ଗାଁ ଅଞ୍ଚଳର ପ୍ରାୟ 2000 କ୍ବିଣ୍ଟାଲ ଧାନ ପଡି ରହିଥିବା ଅଭିଯୋଗ ହୋଇଥିବା ବେଳେ ଚାଷୀ ନିଜର ଅମଳ ଧାନକୁ ଶୀତ କାକରରେ ଜଗି ରହୁଛି । କାରଣ ଏଭଳି ସ୍ଥିତିରେ ହାତୀର ଭୟ ସହ ଚୋରି ହେବାର ସମସ୍ୟା ଘାରୁଛି ଚାଷୀଙ୍କୁ । ଏହି ସମସ୍ୟା ନେଇ ସମ୍ବଲପୁର ଜିଲ୍ଲା ବିଜେପି ସଭାପତି ଗିରିଶ ପଟେଲ, ପ୍ରମୁଖ ନେତା ଗୋବିନ୍ଦ ଅଗ୍ରୱାଲ, ଦେବେନ୍ଦ୍ର ମହାପାତ୍ର ପ୍ରମୁଖ ରେଢ଼ାଖୋଲ ଅଞ୍ଚଳର ଚାଷୀଙ୍କୁ ନେଇ ସମ୍ବଲପୁର ସି ଏସ ଓ କାର୍ଯ୍ୟାଳୟ ଯାଇ ସିଏସଓଙ୍କୁ ଘେରାଉ କରିଥିଲେ ।
ଉତ୍ତେଜନା ଏମିତି ବୃଦ୍ଧି ପାଇଥିଲା ଯେ କିଛି ଚାଷୀ ଭାବ ବିହ୍ଵଳ ହୋଇ ଜିଲ୍ଲା ଯୋଗାଣ ଅଧିକାରୀଙ୍କ ସହ ବହୁ ଯୁକ୍ତି କରିଥିଲେ । ତେବେ ଜିଲ୍ଲା ଯୋଗାଣ ଅଧିକାରୀ ରାମଚନ୍ଦ୍ର ଟୁଡୁ ଚାଷୀଙ୍କ ସମସ୍ୟାର ସମାଧାନ ପାଇଁ ପ୍ରତିଶ୍ରୁତି ଦେବା ପରେ ପରିସ୍ଥିତି ଶାନ୍ତ ପଡିଥିଲା ।
ସମ୍ବଲପୁରରୁ ବାଦଶାହା ଯୁଷ୍ମନ ରଣା, ଇଟିଭି ଭାରତ
