ସମ୍ବଲପୁର: ବେଳେ ବେଳେ ସମାଜରେ ଅନେକ ଅଜବ ଗଜବ ପ୍ରଥା ଦେଖିବାକୁ ମିଳେ । ଏମିତିରେ ସମ୍ବଲପୁର ଜିଲ୍ଲା ରେଢାଖୋଲ ଉପଖଣ୍ଡ ଅନ୍ତର୍ଗତ ସାମସିଂଘା ଗ୍ରାମରେ ସାମ୍ନାକୁ ଆସିଛି ଏକ ଆଶ୍ଚର୍ଯ୍ୟକର ଘଟଣା । ଜନୈକ ନିଖୋଜ ବ୍ୟକ୍ତିଙ୍କ ମୃତଦେହ ନମିଳୁଣୁ ତାଙ୍କ ଶେଷକୃତ୍ୟ ସମ୍ପନ୍ନ କରିଛନ୍ତି ସ୍ଥାନୀୟ ଏକ ପରିବାର । ଯାହା ଏବେ ସାଧାରଣରେ ଚର୍ଚ୍ଚାର ବିଷୟ ପାଲଟିଛି । ତେଣେ ସମ୍ପୃକ୍ତ ପରିବାର ସମ୍ପୂର୍ଣ୍ଣ ସାବଧାନତାର ସହ ସାମାଜିକ ଦୂରତା ଅବଲମ୍ବନ କରି ଶେଷକୃତ୍ୟ କାର୍ଯ୍ୟ ସାରିଥିବା ଦେଖାଯାଇଥିଲା ।
ସୂଚନା ମୁତାବକ ଗତ 21 ତାରିଖରେ ସାମସିଙ୍ଘା ଗ୍ରାମର 65 ବର୍ଷୀୟ ଭୀମସେନ ପ୍ରଧାନ ସକାଳେ ମାଛ ମାରିବା ପାଇଁ ନିକଟସ୍ଥ ଏକ ନାଳକୁ ଯାଇଥିଲେ । ହେଲେ ସେଠାରୁ ସେ ଆଉ ଫେରିନଥିଲେ । ଏନେଇ ପରିବାର ଲୋକେ ବହୁ ଖୋଜାଖୋଜି ପରେ ମଧ୍ୟ ତାଙ୍କର ପତ୍ତା ପାଇନଥିଲେ । ଘଟଣାର 4 ଦିନ ପରେ ସେହି ନାଳରୁ ମାଛ ଜାଲ ମିଳିଥିବା ବେଳେ ଭୀମସେନଙ୍କ କୌଣସି ଖବର ମିଳିନଥିଲା ।
ଭୀମସେନ ତାଙ୍କ ପରିବାରର ଏକମାତ୍ର ରୋଜଗାରିଆ ହୋଇଥିବା ବେଳେ ସ୍ତ୍ରୀ ଓ ଦୁଇ ପୁଅଙ୍କୁ ନେଇ ତାଙ୍କର ସଂସାର । ଭୀମସେନଙ୍କ ଉପରେ ପରିବାରର ସମସ୍ତ ଦାୟିତ୍ବ ରହିଥିବା ବେଳେ ତାଙ୍କ ନିଖୋଜ ହେବାର 11 ଦିନ ପରେ ପରିବାର ଲୋକେ ତାଙ୍କର ଶେଷକୃତ୍ୟ ସମ୍ପନ୍ନ କରିବା ସହ ଏକାଦଶାହ ପାଳନ କରିଥିଲେ । ତେବେ ମୃତଦେହ ନପାଇ ପରିବାର ଲୋକେ କିପରି ଶେଷକୃତ୍ୟ ସମ୍ପନ୍ନ କଲେ ତାହା ସମସ୍ତଙ୍କୁ ଚକିତ କରିଛି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
