ସମ୍ବଲପୁର: 2021 ସୁଦ୍ଧା ହେବ ସମ୍ବଲପୁର ଆଇଆଇଏମର ନିଜସ୍ବ କ୍ୟାମ୍ପସ । ଏଥିପାଇଁ ଜାତୀୟ ସଂସ୍ଥା ଏନବିସିସି ସହ ଚୁକ୍ତି ସ୍ବାକ୍ଷରିତ କରିଛି ସମ୍ବଲପୁର ଆଇଆଇଏମ। ଆସନ୍ତା 2021 ଡିସେମ୍ବର ସୁଦ୍ଧା ଆଇଆଇଏମ ସମ୍ବଲପୁରର ନିଜସ୍ବ କ୍ୟାମ୍ପସ ପ୍ରତିଷ୍ଠା ହେବ ବୋଲି ସମ୍ବଲପୁର ଆଇଆଇଏମର ନିର୍ଦ୍ଦେଶକ କହିଛନ୍ତି ।
ଏଥିପାଇଁ 401କୋଟି ବ୍ୟୟ ଅଟକଳରେ ପ୍ରଥମ ପର୍ଯ୍ୟାୟର କ୍ୟାମ୍ପସ 2021 ଡ଼ିସେମ୍ବର ସୁଦ୍ଧା ପୁରା ହେବ ବୋଲି କୁହାଯାଇଛି। ଏଥିପାଇଁ ପ୍ରଥମ 6 ମାସ ଏହି କ୍ୟାମ୍ପସର ଡିଜାଇନ ପାଇଁ ମାଷ୍ଟର ପ୍ଲାନ ପ୍ରସ୍ତୁତ ହେବ।
ଏହି କ୍ୟାମ୍ପସ ନିର୍ମାଣ ପାଇଁ ରାଜ୍ୟ ସରକାର ସମ୍ବଲପୁର ବସନ୍ତପୁର ଠାରେ 200 ଏକର ଜମି ଯୋଗାଇଛନ୍ତି। ଓଡ଼ିଶାର କୋଣାର୍କ ମନ୍ଦିରର ଚାରୁକଳା ଓ ସମ୍ବଲପୁରୀ କଳା ସଂସ୍କୃତି ଏହି କ୍ୟାମ୍ପସ ଡିଜାଇନରେ ସ୍ଥାନ ପାଇବ ବୋଲି କୁହାଯାଇଛି। ଏହାସହ ଏହି କ୍ୟାମ୍ପସ ସମୂର୍ଣ୍ଣ ଗ୍ରୀନଜୋନ ହେବା ସହ କେବଳ ବ୍ୟାଟେରୀ ଚାଳିତ ଗାଡି ଚାଲିବ ବୋଲି କୁହାଯାଇଛି। ଏହାସହ ବିଦ୍ୟୁତ ଉତ୍ପାଦନ ମଧ୍ୟ ସୋଲାର ଜରିଆରେ ଉତ୍ପାଦନ ହେବ।
ଏନେଇ ସମ୍ବଲପୁର ଆଇଆଇଏମର ନିର୍ଦ୍ଦେଶକ ମହାଦେବ ପ୍ରସାଦ ଜେଶୱାଲ ଓ ଏନବିସିସିର ମହାପ୍ରବନ୍ଧକ ଏକେ ସୋମଙ୍କ ମଧ୍ୟରେ ଚୁକ୍ତି ସ୍ବାକ୍ଷରିତ ହୋଇଛି।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
