ସମ୍ବଲପୁର: ପାଖେଇ ଆସୁଛି ଶାରଦୀୟ ଦୁର୍ଗା ପୂଜା । ଏଥିପାଇଁ ସମ୍ବଲପୁରରେ ଜୋରସୋରରେ ପ୍ରସ୍ତୁତି ଚାଲିଛି l ତେବେ ଦୁର୍ଗା ପୂଜା ଭସାଣି ଶୋଭାଯାତ୍ରା ଉପରେ ଜିଲ୍ଲା ପୋଲିସ ପ୍ରଶାସନ ରୋକ ଲଗାଇଥିବା ଯୋଗୁଁ ଏନେଇ ବିଭିନ୍ନ ପୂଜା କମିଟି ଅସନ୍ତୋଷ ପ୍ରକାଶ କରିଛନ୍ତି । ଏହି ପରିପ୍ରେକ୍ଷୀରେ ସେମାନେ ଜିଲ୍ଲାପାଳଙ୍କୁ ମଧ୍ୟ ଭେଟି ସାରିଛନ୍ତି l ତେବେ ବର୍ତ୍ତମାନ ଏହି ପ୍ରସଙ୍ଗ ଏକ ରାଜନୈତିକ ପ୍ରସଙ୍ଗରେ ପରିଣତ ହୋଇଛି l ଦୁର୍ଗା ପୂଜା ଭସାଣି ଉପରେ ରୋକ ଲଗାଯିବାକୁ ନେଇ ସମ୍ବଲପୁର ଜିଲ୍ଲା ବିଜେପି ସୋମବାର ଏସପିଙ୍କୁ ଭେଟି ଦୁର୍ଗା ପୂଜା ଭସାଣି ଶୋଭାଯାତ୍ରାକୁ ଅନୁମତି ଦେବାକୁ ଦାବି କରିଛି ।
ଦୁର୍ଗା ପୂଜା ଭସାଣିରେ ଅନୁମତି ପାଇଁ ସମ୍ବଲପୁର ଏସପିଙ୍କ ଦ୍ବାରସ୍ତ ହୋଇଛି ସମ୍ବଲପୁର ଜିଲ୍ଲା ବିଜେପି । ଜିଲ୍ଲା ବିଜେପି ସଭାପତି ଗିରିଶ ପଟେଲଙ୍କ ନେତୃତ୍ୱରେ ବିଜେପିର ଏକ ପ୍ରତିନିଧି ଦଳ ସମ୍ବଲପୁର ଏସପିଙ୍କୁ ଭେଟି ଏନେଇ ଏକ ଦାବିପତ୍ର ପ୍ରଦାନ କରିଛନ୍ତି l ଗତ ଏପ୍ରିଲ ମାସରେ ହନୁମାନ ଜୟନ୍ତୀ ସମୟରେ ସାମ୍ପ୍ରଦାୟିକ ହିଂସା ସୃଷ୍ଟି ହେବା ପର ଠାରୁ ସହରରେ ବର୍ଷେ ପାଇଁ ହନୁମାନ ଜୟନ୍ତୀ ଶୋଭଯାତ୍ରା ଓ ମହରମ ଶୋଭାଯାତ୍ରା ଉପରେ ରୋକ ଲଗାଇଥିଲେ ଜିଲ୍ଲା ପ୍ରଶାସନ l ତେବେ ପରେ ପରେ ପୋଲିସ ପ୍ରଶାସନ ଗଣେଶ ପୂଜା ଭସାଣି ଶୋଭାଯାତ୍ରା, ବିଶ୍ଵକର୍ମା ପୂଜା ଭସାଣି ଶୋଭଯାତ୍ରା ପରେ ଏବେ ଦୁର୍ଗା ପୂଜା ଭସାଣି ଉପରେ ରୋକ ଲଗାଇଛନ୍ତି l
ଏଭଳି ସ୍ଥିତିରେ ସୋମବାର ଜିଲ୍ଲା ବିଜେପି ଦୁର୍ଗା ପୂଜା ଆରମ୍ଭରୁ କଳସ ଯାତ୍ରା ଓ ଶେଷରେ ଭସାଣି ଶୋଭାଯାତ୍ରା ପାଇଁ ଅନୁମତି ଦେବା ପାଇଁ ଏସପିଙ୍କୁ ଭେଟି ଦାବି କରିଛି । ଅନ୍ୟପଟେ ଗତ ଏପ୍ରିଲ ମାସରେ ହନୁମାନ ଜୟନ୍ତୀ ସମୟରେ ସାମ୍ପ୍ରଦାୟିକ ହିଂସା ସୃଷ୍ଟି ହେବାରୁ ଗୋଟିଏ ବର୍ଷ ପାଇଁ ଧାର୍ମିକ ଶୋଭାଯାତ୍ରା ଉପରେ ରୋକ ଲଗାଯାଇଥିବା ଏସପି କହିଛନ୍ତି । ଭସାଣିରେ ପୂଜା କମିଟିର 5ରୁ 10 ଜଣ ସଦସ୍ୟ ପୋଲିସ ଉପସ୍ଥିତିରେ ଭସାଣୀ କରିବା ପାଇଁ ପୋଲିସ ଅନୁମତି ଦେବ ବୋଲି ସୂଚନା ଦିଆଯାଇଛି । ତେବେ ପୋଲିସ ପ୍ରଶାସନର ଏହିଭଳି ଆଭିମୁଖ୍ୟକୁ ପୂର୍ବତନ ଜିଲ୍ଲା ବିଜେଡି ସଭାପତି ପ୍ରମୋଦ କୁମାର ରଥ ମଧ୍ୟ ନାପସନ୍ଦ କରିଛନ୍ତି l
ଏହା ମଧ୍ୟ ପଢ଼ନ୍ତୁ...Sambalpur violence: 4 ଜଣିଆ ଯାଞ୍ଚ କମିଟି ଗଠନ କଲା ବିଜେପି
ସୂଚନା ଅନୁସାରେ, ଗତ ଏପ୍ରିଲ ମାସରେ 12 ତାରିଖରେ ହନୁମାନ ଜୟନ୍ତୀ ବାଇକ ଶୋଭାଯାତ୍ରା ଚାଲିଥିବା ବେଳେ ଏକ ନିର୍ଦ୍ଧିଷ୍ଟ ସମ୍ପ୍ରଦାୟର ଲୋକେ ପଥର ମାଡ଼ କରିଥିଲେ l ପରେ ଏପ୍ରିଲ 14ରେ ଏହାର ପ୍ରତିକ୍ରିୟା ସ୍ୱରୂପ ବିଭିନ୍ନ ସ୍ଥାନରେ ଜଳାପୋଡା ହୋଇଥିଲା l ଏହାପରେ ସମ୍ବଲପୁର ସହରରେ ସାମ୍ପ୍ରଦାୟିକ ହିଂସା ସୃଷ୍ଟି ହୋଇଥିଲା l ଏଥିରେ ଜଣେ ଆଦିବାସୀ ଯୁବକ ପ୍ରାଣ ହରାଇଥିବା ବେଳେ ଅନେକ ଗୁରୁତର ଆହତ ହୋଇଥିଲେ l ସେତେବେଳେ ସମ୍ବଲପୁର ଜିଲ୍ଲାରେ କର୍ଫ୍ୟୁ ଲଗାଯିବା ସହ ଇଣ୍ଟରନେଟ ସେବା ମଧ୍ୟ ଅଚଳ କରିଦେଇଥିଲା ଜିଲ୍ଲା ପ୍ରଶାସନ l
ଇଟିଭି ଭାରତ, ସମ୍ବଲପୁର
