ସମ୍ବଲପୁର: ନିଜ ବିବାହରେ ମଦ ପିଇ ହରଡଘଣାରେ ପଡିଛନ୍ତି ନାକଟିଦେଉଳ ବ୍ଲକ ଅଞ୍ଚଳର ସୁରେନ୍ଦ୍ର । ଯାହାଫଳରେ ବିବାହ ମଝିରୁ ବେଦିରୁ ଉଠିଯାଇଛି କନ୍ୟା । ଏଭଳି ଘଟଣା ଘଟିଛି ସମ୍ବଲପୁର ଜିଲ୍ଲା ଯୁଜୁମୁରା ବ୍ଲକ ଗୋବର୍ଦ୍ଧନ ବଡ଼ମାଲ ଗାଁରେ । ଗତ 12 ତାରିଖ ରାତିରେ ଗାଁର ଭିକ ଭୁଏଙ୍କ ଦ୍ଵିତୀୟ ଝିଅ ମମତାଙ୍କର ନାକଟିଦେଉଳ ବ୍ଲକ ଅଞ୍ଚଳର ସୁରେନ୍ଦ୍ରଙ୍କ ସହ ବିବାହ ସ୍ଥିର ହୋଇଥିଲା।
ନିର୍ଦ୍ଧାରିତ ସମୟରେ ବରଯାତ୍ରୀଙ୍କ ଭୋଜି ଭାତ ଖାଇବା ମଧ୍ୟ ଶେଷ ହୋଇଥିଲା। କିନ୍ତୁ ବେଦୀକୁ ଯିବା ପୂର୍ବରୁ ବର ମଦ ପିଇ ଝୁଲୁଥିଲେ । ମଝିରେ ମଝିରେ ବେଦିରୁ ଖସି ପଡୁଥିଲେ ଓ କନ୍ୟା ପକ୍ଷକୁ ଗାଳିଗୁଲଜ କରୁଥିବା ଦେଖିବାକୁ ମିଳିଥିଲା।
ବରର ଏମିତି ଅବସ୍ଥା ଦେଖି କନ୍ୟା ବିବାହ ନ କରିବାକୁ ନିଷ୍ପତ୍ତି ନେବା ସହ ବେଦିରୁ ଉଠିଯାଇଥିଲା । ଯେତେ ଅନୁରୋଧ କଲେ ମଧ୍ୟ ଏମିତି ମଦୁଆକୁ ବିବାହ କରିବାକୁ ସେ ରୋକ ଠୋକ ମନା କରିଦେଇଥିଲେ । ଶେଷରେ ଗ୍ରାମର ବୟୋଜ୍ୟେଷ୍ଠ ବ୍ୟକ୍ତି ତଥା ଭଦ୍ରବ୍ୟକ୍ତିଙ୍କ ସମ୍ମୁଖରେ ମୁଣ୍ଡିଆ ମାରି ଶିଶୁପାଳ ହୋଇ ଫେରିଛି ବର । ଏହି ଘଟଣା ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
