ସମ୍ବଲପୁର: 32 ଫୁଟ ଲମ୍ବା ଓ 32 ଫୁଟ ଚଉଡା, ଦେଖିଲେ ଆଖି ପାଉନି । ଏମିତି ଏକ ଫ୍ରକ ତିଆରି କରିଛନ୍ତି ସମ୍ବଲପୁର ଜିଲ୍ଲା ଗୋବିନ୍ଦତଲାର 70 ବର୍ଷୀୟ ଟେଲର ମାଷ୍ଟର ଅନନ୍ତ ମେହେର । ଟେଲରିଂ ପେସାରେ 50 ବର୍ଷ ପୁର୍ତ୍ତି ଅବସରରେ ଏହି ଫ୍ରକଟିକୁ ତିଆରି କରିଛନ୍ତି ସେ । ଏହି ଫ୍ରକଟି 32 ଫୁଟ ଉଚ୍ଚ ଓ 32 ଫୁଟ ଚଉଡା ବିଶିଷ୍ଟ । ଆଉ ଏହି ଫ୍ରକ ତିଆରି ପଛରେ ଅନନ୍ତଙ୍କ ଏକମାତ୍ର ଉଦ୍ଦେଶ୍ୟ ହେଉଛି ସମ୍ବଲପୁରୀ ହସ୍ତତନ୍ତର ପ୍ରଚାର ପ୍ରସାର କରିବା ।
ଦୀର୍ଘଦିନ ହେଲା ଅନନ୍ତ ଏହି ପେସାକୁ ନିଜର ପେଟ ପଟଣାର ମାଧ୍ୟମ ଭାବେ ବାଛିଛନ୍ତି । ତେବେ ବର୍ତ୍ତମାନ ସେ ଏହି ଫ୍ରକଟିକୁ ସିଲେଇ କରିବା ପରେ ଚାରିଆଡେ ଚର୍ଚ୍ଚା । ସେ ଓ ତାଙ୍କର କିଛି ସହଯୋଗୀ ମିଶି ତିଆରି କରିଛନ୍ତି ଏହି 32 ଫୁଟ ଉଚ୍ଚତା ବିଶିଷ୍ଟ ଫ୍ରକ । ଯାହାକୁ ପ୍ରଦର୍ଶନ କରିବାକୁ ହେଲେ ତିନି ମହଲା ଉପରକୁ ଯାଇ ଧରିବାକୁ ପଡୁଛି । ଏହାକୁ ତିଆରି କରିବା ପାଇଁ 125 ମିଟର ସମ୍ବଲପୁରୀ କପଡା ବ୍ୟବହୃତ ହୋଇଛି । ଏହାକୁ ତିଆରି କରିବାକୁ 7 ଦିନ ଲାଗିଥିବା ବେଳେ ଏଥିପାଇଁ 50 ହଜାର ଟଙ୍କା ଖର୍ଚ୍ଚ ହୋଇଛି ।
ତେବେ ଏହାକୁ କୌଣସି ରେକର୍ଡ଼ କିମ୍ବା ପ୍ରଶଂସା ପାଇଁ ତିଆରି କରିନାହାନ୍ତି ଏହି ଟେଲର ମାଷ୍ଟର । ସେ ପୂର୍ବରୁ ଭାବିଥିଲେ ଯେ ଯେଉଁଦିନ ତାଙ୍କର ଟେଲରିଂ ପେସା 50 ବର୍ଷରେ ଅବତୀର୍ଣ୍ଣ ହେବ ସେ ଦିନ ଏପରି ଏକ ଫ୍ରକ ତିଆରି କରିବେ । ଆଉ ଦ୍ଵିତୀୟ କଥା ହେଲା ସମ୍ବଲପୁରୀ ହସ୍ତତନ୍ତର ପ୍ରଚାର ପ୍ରସାର ଓ ସମ୍ବଲପୁରୀ ବୁଣାକାର ମାନଙ୍କୁ ବିଶ୍ବ ଦଜରବାରରେ ଏକ ସ୍ବତନ୍ତ୍ର ପରିଚୟ ଦେବା । କିନ୍ତୁ ଅନନ୍ତଙ୍କ ଏହି ଅଜବ ନିଶା ତାଙ୍କୁ ଅଜାଣତରେ ପ୍ରସିଦ୍ଧି ଆଣିଦେଇଛି ।
ସମ୍ବଲପୁରରୁ ବାଦଶାହ ଜୁସ୍ମନ ରଣା, ଇଟିଭି ଭାରତ
