ସମ୍ବଲପୁର: ସାରା ଦେଶରେ କୋରୋନା ଭୟ । ଏଭଳି ସ୍ଥିତିର ମୁକାବିଲା ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ପକ୍ଷରୁ ସଚେତନତା ସୃଷ୍ଟି କରାଯାଉଛି । ଏହି କ୍ରମରେ ସମ୍ବଲପୁର ସହରକୁ ଗତ 3 ଦିନ ହେବ ଲକ୍ଡାଉନ କରାଯାଇଛି । ସହରର ସମସ୍ତ ଜନଗହଳିପୂର୍ଣ୍ଣ ରାସ୍ତାଘାଟ ଶୂନଶାନ ହୋଇଥିବା ବେଳେ ବ୍ୟବସାୟିକ ପେଣ୍ଠସ୍ଥଳୀ କୁହାଯାଉଥିବା ଗୋଲ ବଜାର ଛକ, ଲକ୍ଷ୍ମୀ ଟକିଜ ଛକ, ଭିଏସଏସ ମାର୍ଗ, କ୍ଷେତରାଜପୁର ଅଞ୍ଚଳ ସମ୍ପୂର୍ଣ୍ଣ ଭାବେ ଜନଶୂନ୍ୟ ହୋଇଯାଇଛି ।
କେବଳ ଅତ୍ୟାବଶ୍ୟକ ସାମଗ୍ରୀ ଦୋକାନ ସବୁ ଖୋଲା ରହିଥିବା ବେଳେ ସହରର ବିଭିନ୍ନ ସ୍ଥାନରେ ପୋଲିସ ପଇଁତରା ମାରି ସଚେତନତା କରୁଛି । ମଙ୍ଗଳବାର ରାଜ୍ୟ ବାହାରୁ ଫେରିଥିବା 30 ଜଣ ଓଡ଼ିଆ ଯୁବକ ସମ୍ବଲପୁର ଅଇଁଠାପାଲି ଛକରେ ଫସି ରହିଥିବା ବେଳେ ପୋଲିସ ଓ ଏକ ସ୍ବେଚ୍ଛାସେବୀ ସଂଗଠନ ତରଫରୁ ପ୍ରଥମେ ଅଇଁଠାପାଲି ଥାନାକୁ ନିଆଯାଇଥିଲା । ସେଠାରେ ସେମାନଙ୍କ ଖାଦ୍ୟପେୟର ବ୍ୟବସ୍ଥା କରାଯାଇଥିଲା । ଏହାପରେ ଜିଲ୍ଲା ପ୍ରଶାସନ ପକ୍ଷରୁ ସେମାନଙ୍କ ପାଇଁ ଏକ ଗାଡିର ବ୍ୟବସ୍ଥା କରାଯାଇ ଏକ ଅନୁମତି ପତ୍ର ଦିଆଯାଇ ନିଜସ୍ବ ଗ୍ରାମକୁ ପଠା ଯାଇଥିଲା ।
ସମସ୍ତ ଯୁବକଙ୍କ ଘର ପୂର୍ବାଞ୍ଚଳର ହୋଇଥିବା ଜଣାପଡିଥିବା ବେଳେ ସେମାନେ ସମସ୍ତେ ଆନ୍ଧ୍ରରେ କାର୍ଯ୍ୟ କରୁଥିଲେ । ସମସ୍ତେ ମଧ୍ୟପ୍ରଦେଶ, ଛତିଶଗଡ଼ ଦେଇ ଆଜି ସକାଳେ ସମ୍ବଲପୁରରେ ପହଞ୍ଚିଥିଲେ ।
ସମ୍ବଲପୁରରୁ ବାଦଶାହା ଜୁସ୍ମନ ରଣା, ଇଟିଭି ଭାରତ
