ରାୟଗଡା: ପାନୀୟ ଜଳର ଉତ୍କଟ ସମସ୍ୟା ନେଇ ପଞ୍ଚାୟତରେ ତାଲା ପକାଇଲେ ଗ୍ରାମବାସୀ । ରାୟଗଡା ଜିଲ୍ଲାର ମୁନିଗୁଡା ବ୍ଲକ ଅଧିନ ପାତ୍ରଗୁଡା ପଞ୍ଚାୟତର କରଡ଼ାବନ୍ଧ ଗାଁ । ଏହି ଗାଁରେ ଲାଗି ରହିଛି ପାଣି ସମସ୍ୟା । ଦିନେ କି ଦୁଇଦିନ ନୁହେଁ ବରଂ ମାସ ମାସ ଧରି ପାଣିଟିକିଏ ପାଇଁ ସଂଘର୍ଷ କରୁଛନ୍ତି ଏଠାକାର ଅଧିବାସୀ ।
ଗ୍ରାମରେ ଲାଗି ରହିଥିବା ପାନୀୟ ଜଳର ଉତ୍କଟ ସମସ୍ୟା ନେଇ ପଞ୍ଚୟତରୁ ବ୍ଲକ ପର୍ଯ୍ୟନ୍ତ ଧାଇଁ ଧାଇଁ ନୟାନ୍ତ ହେଲେଣି ଗ୍ରାମବାସୀ ଫଳରେ ବାଧ୍ୟ ହୋଇ ପାତ୍ରଗୁଡା ପଞ୍ଚାୟତ କାର୍ଯ୍ୟାଳୟରେ ତାଲା ଠୁଙ୍କିଲେ ଢ଼ାବାସାହିର ଶତାଧିକ ମହିଳା ଓ ପୁରୁଷ । ଗୋଟେ ପଟେ ଅସହ୍ୟ ଗ୍ରୀଷ୍ମ ସାଙ୍ଗକୁ ଜଳ କଷ୍ଟ ବ୍ୟଥିତ କରିଛି ଗ୍ରାମବାସୀଙ୍କୁ । ଦୀର୍ଘ ଏକ ମାସ ହେବ ପାନୀୟ ଜଳର ସଙ୍କଟ ନେଇ ସଂଘର୍ଷ କରୁଥିବା ଗ୍ରାମବାସୀ ଗ୍ରୀଷ୍ମର ପ୍ରବାହରେ ଜଳ କଷ୍ଟ ଅସମ୍ଭାଳ ହେବାରୁ ବାଧ୍ୟ ହୋଇ ପଞ୍ଚାୟତକୁ ହଣ୍ଡାହାଣ୍ଡି ଧରି ଦୌଡି ଆସିଛନ୍ତି ଗାଁରେ ପାଣିର ବ୍ୟବସ୍ଥା କରିବା ପାଇଁ ।
ଗାଁ ଲୋକେ ପଞ୍ଚାୟତରେ ତାଲା ପକାଇବା ଖବର ପାଇ ଚେଇଁ ଉଠିଛି ବ୍ଲକ ପ୍ରଶାସନ । ମୁନିଗୁଡା ବ୍ଲକ ପ୍ରଶାସନ ତରଫରୁ ଏକ ଟିମ୍ ଲୋକଙ୍କୁ ବୁଝାସୁଝା କରିବା ସହ ପାନୀୟ ଜଳ ସମସ୍ୟାର ସମାଧାନ କରାଯିବା ନେଇ ଲିଖିତ ପ୍ରତିଶୃତି ପରେ ଆନ୍ଦୋଳନରୁ ଓହରି ଥିଲେ ଗ୍ରାମବାସୀ । ଗ୍ରୀଷ୍ମ ପୂର୍ବରୁ ପ୍ରଶାସନ ବୈଠକ ପରେ ବୈଠକ କରୁଛି କିନ୍ତୁ ତୃଣମୂଳ ସ୍ତରର କାର୍ଯ୍ୟକାରୀ ହେଉ ନାହିଁ । ଏ ଦିଗରେ ଯଦି ଦୃଷ୍ଟି ଦିଆଯାଏ ତେବେ ନିଶ୍ଚିତ ଜଳକଷ୍ଟରୁ ମୁକ୍ତି ମିଳିବ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
