ରାୟଗଡା: ଲୁଟେରାଙ୍କ ଚରାଭୂଇଁ ପାଲଟିଛି ରାୟଗଡା ସହର । ଦିନ ଦ୍ବିପ୍ରହରରେ ଲୁଟ କରି ଫେରାର୍ ହୋଇଯାଉଛନ୍ତି ଲୁଟେରା । କାହାକୁ ନିସ୍ତୁକ ମାଡ ମାରୁଛନ୍ତି ତ ଆଉ କାହା ବେକରୁ ଝାମ୍ପି ନେଉଛନ୍ତି ସୁନା ଗହଣା । ଭଲ ଭାବେ ଦେଖନ୍ତୁ ପୋଲିସ ହାତରେ ଲାଗିଥିବା ଏହି ସିସିଟିଭି ଫୁଟେଜକୁ । ଏହି ଫୁଟେଜ୍ ବୟାନ କରୁଛି କେମିତି ଲୁଟେରା ଲୁଟୁଛନ୍ତି ମହିଳାଙ୍କ ବେକରୁ ସୁନା ଚେନ ।
ଶୁକ୍ରବାର ନ୍ୟୁ କଲୋନୀ ତୃତୀୟ ଲେନର ସୁଶିଳା ମହାପାତ୍ର ନାମକ ଜଣେ ମହିଳା ଫୁଲ ତୋଳୁଥିବା ସମୟରେ ଦୁଇ ଜଣ ଦୁର୍ବୃତ୍ତ ଆସି ପ୍ରାୟ ସାଢେ ତିନି ଭରି ଓଜନର ସୁନା ଚେନ୍ ଝାମ୍ପି ନେଇଥିଲେ । ସେହିପରି ଇନ୍ଦିରାନଗର ଅଞ୍ଚଳର ମହିଳା ବୁଲୁବାଳା ବେହେରାଙ୍କ ଠାରୁ ସମାନ ଢଙ୍ଗରେ ଦୁଇ ଜଣ ଲୁଟେରା ପ୍ରାୟ ସାଢେ ଦୁଇ ଭାରି ଓଜନର ସୁନା ଚେନ୍ ଝାମ୍ପିନେଇଥିଲେ ।
ଅନ୍ୟପଟେ ନେହେରୁ ନଗର ଅଞ୍ଚଳ ଅନ୍ୟ ଜଣେ ମହିଳା କେ.କନକ ଦୁର୍ଗାଙ୍କ ବେକରୁ ଚେନ୍ ଝାମ୍ପି ନେବାରେ ସକ୍ଷମ ନହେବାରୁ ମହିଳାଙ୍କୁ ଦୁର୍ବୃତ୍ତ ଆକ୍ରମଣ କରି ଲହୁଲୁହାଣ କରିଥିଲେ । ଏହି ଘଟଣାକୁ ନେଇ ରାୟଗଡା ଟାଉନ୍ ଥାନାରେ ତିନୋଟି ମାମଲା ରୁଜୁ କରାଯାଇଛି । ଘଟଣାସ୍ଥଳରେ ପୁଲିସ ପହଞ୍ଚି ସିସିଟିଭି ଫୁଟେଜ୍ ଯାଞ୍ଚ କରୁଥିବା ବେଳେ ତନାଘନା ଆରମ୍ଭ କରିଛି । ଅନ୍ୟପଟେ ଖୁବଶୀଘ୍ର ଅପରାଧି ମାନଙ୍କୁ କାବୁ କରାଯିବ ବୋଲି କହିଛିନ୍ତି ରାୟଗଡା ଏସଡିପିଓ । ଗତ ଏକ ବର୍ଷ ଭିତରେ ରାୟଗଡା ସହରରେ ପ୍ରାୟ 10ରୁ ଅଧିକ ଛିନତାଇ ଘଟଣା ନଜରକୁ ଆସିଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
