ରାୟଗଡା: ପ୍ରଧାନଶିକ୍ଷକଙ୍କ ବେପରୁଆ ମନୋଭାବ । ମାଟ୍ରିକ ସପ୍ଲିମେଣ୍ଟାରୀ ପରୀକ୍ଷା ଦେବାରୁ ବଞ୍ଚିତ 12 ଛାତ୍ରଛାତ୍ରୀ । ଏପରି ଅଭିଯୋଗ ଆସିଛି ରାୟଗଡା କଲୋନରା ବ୍ଲକ ପିଣ୍ଡାପଦର ହାଇସ୍କୁଲରୁ । ଏନେଇ ଉତ୍ୟକ୍ତ ଛାତ୍ରଛାତ୍ରୀ ଶନିବାର ଜିଲ୍ଲା ଶିକ୍ଷାଧିକାରୀଙ୍କ କାର୍ଯ୍ୟାଳୟରେ ଭିଡ ଜମାଇଥିବା ଜଣାପଡିଛି ।
ଗତ ମାଟ୍ରିକ ପରୀକ୍ଷାରେ ଏହି ଛାତ୍ରଛାତ୍ରୀ ଫେଲ ହୋଇଥିଲେ । ତେଣୁ ଆସନ୍ତା ମାଟ୍ରିକ ସପ୍ଲିମେଣ୍ଟାରୀ ପରୀକ୍ଷା ଦେବା ନିମନ୍ତେ 12 ଛାତ୍ରଛାତ୍ରୀ ସ୍କୁଲର ପ୍ରଧାନଶିକ୍ଷକଙ୍କୁ ଫର୍ମ ଫିଲ ଅପ୍ ବାବଦକୁ ଜଣକ ପିଛା ୪୦୦ ଟଙ୍କା ହିସାବରେ ଫି' ଦେଇଥିଲେ । ତେବେ ପ୍ରଧାନଶିକ୍ଷକଙ୍କ ଖାମଖିଆଲ ମନୋଭାବ ଯୋଗୁଁ ସମୟସୀମା ମଧ୍ୟରେ ଫି' ଦାଖଲ ନକରିବା ଫଳରେ ଫର୍ମ ଫିଲ୍ ଅପ୍ରୁ ବଞ୍ଚିତ ହେଲେ ୧୨ ଜଣ ଛାତ୍ରଛାତ୍ରୀ ।
ଅପର ପକ୍ଷେ ଜିଲ୍ଲା ଶିକ୍ଷା ଅଧିକାରୀ ପୂର୍ଣ୍ଣଚନ୍ଦ୍ର ବରିହାଙ୍କୁ ଅଭିଯୋଗ କରିଛନ୍ତି ଏହି ଛାତ୍ରଛାତ୍ରୀ । ତେବେ କେଉଁ ପରିସ୍ଥିତିରେ ପିଲାମାନଙ୍କଠାରୁ ପ୍ରଧାନଶିକ୍ଷକ ଟଙ୍କା ରଖି ଫର୍ମ ଫିଲ୍ ଅପ୍ କଲେ ନାହିଁ । ସେ ନେଇ ତଦନ୍ତ ଆରମ୍ଭ ହୋଇଛି । ରିପୋର୍ଟ ମିଳିବା ପରେ ଆବଶ୍ୟକୀୟ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
