ରାୟଗଡା: ରାୟଗଡା ଷ୍ଟେସନ ଓ ଆଖପାଖ ଅଞ୍ଚଳରେ ଲାଗୁ ହେଲା 144 ଧାରା । ରାତି 12ଟାରୁ ଆସନ୍ତାକାଲି 2 ଟା ପର୍ଯ୍ୟନ୍ତ ରହିବ ବଳବତ୍ତର । ଆସନ୍ତାକାଲି ପ୍ରବାସୀ ଓଡିଆଙ୍କୁ ନେଇ ଆସୁଥିବା ଟ୍ରେନ ଏଠାରେ ରହିବାକୁ ଥିବାରୁ ଏପରି ନିଷ୍ପତ୍ତି ନେଇଛି ଜିଲ୍ଲା ପ୍ରଶାସନ ।
ସୂଚନା ଯୋଗ୍ୟ ଯେ, ତାମିଲନାଡୁର ତିରିପୁରରୁ ଏକ ଟ୍ରେନ ପ୍ରବାସୀ ଶ୍ରମିକଙ୍କୁ ନେଇ ଆସନ୍ତାକାଲି ସକାଳ 7ଟା ସମୟରେ ରାୟଗଡାରେ ପହଞ୍ଚିବ । ପ୍ରବାସୀ ଶ୍ରମିକମାନେ ରାୟଗଡା ଷ୍ଟେଶନ ରେ ଓହ୍ଲାଇବା ପରେ ତାଙ୍କୁ ନିଜ ନିଜ ଗନ୍ତବ୍ୟ ସ୍ଥାନକୁ ବସ ଯୋଗେ ପଠାଯିବ । ଏଥିରେ ରାୟଗଡା, କୋରାପୁଟ, ଗଞ୍ଜାମ ଏବଂ ନବରଙ୍ଗପୁର ଜିଲ୍ଲାର ଶ୍ରମିକ ରହିଛନ୍ତି । ଏହି ସମୟରେ ସାଧାରଣ ଜନତାଙ୍କୁ ସମ୍ଭାବ୍ୟ ସଂକ୍ରମଣରୁ ଦୂରେଇ ରଖିବା ପାଇଁ ଜିଲ୍ଲା ପ୍ରଶାସନ ଏଭଳି ପଦକ୍ଷେପ ଗ୍ରହଣ କରିଛି ।
ଏହି ସମୟରେ କେହି ପଦାକୁ ନବାହାରିବାକୁ କୁହାଯାଇଛି । ଏନେଇ ଉପଜିଲ୍ଲାପାଳ ପ୍ରତାପ ଚନ୍ଦ୍ର ପାତ୍ର ସୂଚନା ଦେଇଛନ୍ତି । ତେବେ 144 ଧାରା ଜେକେପୁରରୁ ରାୟଗଡା ଷ୍ଟେସନ, ପିତାମହଲରୁ ରାୟଗଡା ସହର, ଜେଏସକୋରୁ ରାୟଗଡା ରେଲୱେ ଷ୍ଟେସନ, ରାୟଗଡା ସହରର ଜାତୀୟ ରାଜପଥରୁ ଜିଲ୍ଲାପାଳଙ୍କ କାର୍ଯ୍ୟାଳୟ, ନୂଆ ବସଷ୍ଟାଣ୍ଡରୁ ଜିଲ୍ଲାପାଳଙ୍କ ଆବାସିକ କାର୍ଯ୍ୟାଳୟ ଓ ସମ୍ପୂର୍ଣ୍ଣ ରେଲେୱେ ଷ୍ଟେସନରେ ଲାଗିଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
