ରାୟଗଡ଼ା: ଦୀର୍ଘ ଦିନ ହେବ ସହରରେ ବଢ଼ି ଚାଲିଛି ଅସାମାଜିକ ଯୁବକଙ୍କ ଦୌରାତ୍ମ୍ୟ । ଅପ୍ରାପ୍ତ ବୟସ୍କର ନାବାଳକମାନେ ରୋଡ଼ରେ ବେଆଇନ ଭାବେ ମଟର ସାଇକେଲରେ ଉଚ୍ଚ ଶବ୍ଦ ଜନିତ ସାଇଲେନସର ଲଗାଇ କ୍ଷୀପ୍ର ଗାଡ଼ି ଚାଳନା କରୁଛନ୍ତି । ଏହାଦ୍ୱାରା ଅନେକ ସମୟରେ ଦୁର୍ଘଟଣା ଘଟି ଧନ ଜୀବନ ନଷ୍ଟ ହେଉଛି ।
ଏନେଇ ବାରମ୍ବାର ପୋଲିସକୁ ଦାବି କରିଆସିଛନ୍ତି ସ୍ଥାନୀୟ ବୁଦ୍ଧିଜୀବୀ । ଦାବି ମୁତାବକ ରାୟଗଡ଼ା ଏସପିଙ୍କ ନିର୍ଦ୍ଦେଶରେ ପୋଲିସ ରୋଡ଼ ରୋମିଓଙ୍କ ଉପରେ ଆରମ୍ଭ କରିଛି କାର୍ଯ୍ୟାନୁଷ୍ଠାନ । ୭୦ଟି ବିଭିନ୍ନ କିସମର ମଟରସାଇକେଲ ଜବତ କରିବା ସହ ସେଥିରେ ଲଗାଯାଇଥିବା ଉଚ୍ଚ ଶବ୍ଦ ଜନିତ ସାଇଲେନସରକୁ ଖୋଲି ଦେଇଛନ୍ତି ।
ଏଥିସହିତ ପୋଲିସ ଏମାନଙ୍କ ଠାରୁ ୨୪ ହଜାର ୬୦୦ ଟଙ୍କା ଜୋରିମାନା ଆଦାୟ କରିଛି । ତେବେ ଏଥିପାଇଁ ସ୍ୱତନ୍ତ୍ର ସ୍କ୍ୱାର୍ଡ ଗଠନ କରାଯାଇଛି । ପ୍ରତ୍ୟେକ ଦିନ ଜିଲ୍ଲାର ବିଭିନ୍ନ ସ୍ଥାନରେ ଏଭଳି ଚଢ଼ାଉ କରାଯିବା ସହ କଲେଜ ଏବଂ ସ୍କୁଲ ଛକରେ ରୋଡ଼ ରୋମିଓଙ୍କ ଦୌରାତ୍ମ୍ୟକୁ ପ୍ରତିହତ ପାଇଁ ପଦକ୍ଷେପ ନିଆଯିବ ବୋଲି କହିଛନ୍ତି ଅତିରିକ୍ତ ଏସପି ଭି.ଆର .ରାଓ ।
ରାୟଗଡ଼ାରୁ ରଞ୍ଜନ ରଥ, ଇଟିଭି ଭାରତ
