ରାୟଗଡା: ବାଲି ଚୋରା ଚାଲାଣ ସମୟରେ ଚଢାଉ କରି ୧୦ ଟି ଟ୍ରାକ୍ଟର ଜବତ । ରାୟଗଡ଼ା ତହସିଲ ଅନ୍ତର୍ଗତ ମାଲିଗାଁ, ବେହେରାଗୁଡ଼ା ଓ ଜଗନ୍ନାଥପୁର ଗାଁ ନିକଟରେ ଥିବା ନାଗାବଳି ନଦୀ କୂଳରୁ ଏହିସବୁ ଟ୍ରାକ୍ଟର ଜବତ କରାଯାଇଛି । ସମସ୍ତ ଟ୍ରାକ୍ଟରକୁ ୧୦ ହଜାର ଟଙ୍କା ଲେଖାଏଁ ଜରିମନା ପକାଯାଇଥିବା ସୂଚନା ମିଳିଛି ।
ଖବର ଅନୁଯାୟୀ, ନାଗାବଳି ନଦୀର ବିଭିନ୍ନ ବାଲିଘାଟ ଲିଜ ପ୍ରଦାନ ହୋଇ ନ ଥିବାବେଳେ ସେହି ସ୍ଥାନରୁ ବେଆଇନ ଭାବେ ବାଲି ଉଠାଣ ଚାଲିଥିଲା । ନଦୀ ଘାଟରୁ ବାଲି ଉଠାଇ ସହରରେ ଚଢ଼ା ଦରରେ ବିକ୍ରି କରାଯାଉଥିବା ନେଇ ତହସିଲରେ ଅଭିଯୋଗ ହୋଇଥିଲା । ଏହାପରେ ଆଜି(ଶୁକ୍ରବାର) ତହସିଲଦାର ତାପସ ରାଉତଙ୍କ ନେତୃତ୍ୱରେ ରାଜସ୍ୱ ବିଭାଗର ଟିମ ବିଭିନ୍ନ ବାଲି ଘାଟରେ ଚଢ଼ାଉ କରିଥିଲେ ।
ତୁରନ୍ତ ସମସ୍ତ ଟ୍ରାକ୍ଟରକୁ ଜବତ କରି ତହସିଲ କର୍ତୃପକ୍ଷ ରାୟଗଡ଼ା ତହସିଲ କାର୍ଯ୍ୟାଳୟକୁ ଆଣିଥିଲେ । ସେଠାରେ ଯାଞ୍ଚ ବେଳେ କୌଣସି ଟ୍ରାକ୍ଟରର ୱାଇ ଫର୍ମ ନଥିଲା । ତେଣୁ ସମସ୍ତ ଟ୍ରାକ୍ଟରକୁ ୧୦ ହଜାର ଲେଖାଏଁ ଜରିମନା ପକାଯାଇଛି । ପ୍ରକାଶଥାଉକି, ଆନ୍ଧ୍ରପ୍ରଦେଶରେ ନଦୀବାଲି ଅମୂଲ ମୂଲ ପାଲଟିଛି । ତେଣୁ ରାୟଗଡ଼ା ଜିଲ୍ଲାର ବିଭିନ୍ନ ନଦୀ ଘାଟରୁ ବେଆଇନ ଭାବେ ବାଲି ଉଠାଣ କରାଯାଇ ଆନ୍ଧ୍ରପ୍ରଦେଶକୁ ଚାଲାଣ ହେଉଛି । ଚଢ଼ା ଦରରେ ଆନ୍ଧ୍ରପ୍ରଦେଶରେ ଏହା ବିକ୍ରି ହେଉଥିବା ଜଣାପଡ଼ିଛି । ତେବେ ଆଜି କେବଳ ଟ୍ରାକ୍ଟର ଜବତ ହୋଇ ଥିବାବେଳେ ଆନ୍ଧ୍ରକୁ ଚୋରା ଚାଲାଣ ହେଉଥିବା ଟ୍ରକଗୁଡ଼ିକ କେବେ ଜବତ ହେଉଛି ତାହା ଦେଖିବାକୁ ବାକି ରହିଲା ।
ରାୟଗଡାରୁ ରଞ୍ଜନ କୁମାର ରଥ, ଇଟିଭି ଭାରତ
