ରାୟଗଡା: ଆମ୍ବଦଳା ଥାନା ଅଧିନସ୍ଥ ଇଚ୍ଛାପୁର ପଞ୍ଚାୟତର କେନ୍ଦୁମରା ଗ୍ରାମ ନିକଟରେ ଅଘଟଣ । ବ୍ୟକ୍ତିଗତ କଳହକୁ ନେଇ ଜଣଙ୍କୁ ହତ୍ୟା କରାଯାଇଥିବା ବେଳେ ଘଟଣାରେ ଜଣେ ବୃଦ୍ଧା ଗୁରୁତର ହୋଇଛନ୍ତି । ମୃତକ ଜଣଙ୍କ ହେଉଛନ୍ତି ଶ୍ୟାମଘନ ଘୋଷଲେ ।
ସୂଚନା ଅନୁସାରେ, କେନ୍ଦୁମରା ଗାଁ ମୁଣ୍ଡରେ କିଛି ଦିନ ହେବ ମହାରାଷ୍ଟ୍ରର କିଛି ଯାଯାବର ଲୋକେ ଅସ୍ଥାୟୀ ଭାବେ ପାଲ ଟାଣି ବସବାସ କରୁଥିଲେ । ମାତ୍ର କୌଣସି କାରଣରୁ ସେମାନଙ୍କ ମଧ୍ୟରେ କଳହ ଲାଗିଥିଲା । ଏଥିରେ ଜଣଙ୍କ ମୃତ୍ୟୁ ହୋଇଥିବା ବେଳେ ସାନ୍ତୁଆ ଘୋଷଲେ ନାମକ ଜଣେ ବୃଦ୍ଧା ଗୁରୁତର ହୋଇଛନ୍ତି । ଚିକିତ୍ସା ପାଇଁ ତାଙ୍କୁ ପ୍ରଥମେ ଅମ୍ବାଦଳା ପରେ ରାୟଗଡା ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା ।
ସେପଟେ ଘଟଣାର ମୁଖ୍ୟ ଅଭିଯୁକ୍ତ ସମେତ 3 ଜଣ ଫେରାର ଅଛନ୍ତି । ଏମାନେ ସମସ୍ତେ ମହାରାଷ୍ଟ୍ରର ବାସିନ୍ଦା ବୋଲି ଜଣାପଡିଛି । ଘଟଣାସ୍ଥଳରେ ଅମ୍ବାଦଳା ପୋଲିସ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ଶ୍ୟାମଘନଙ୍କ ମୃତଦେହ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯାଇଛି ।
ତେବେ ବର୍ତ୍ତମାନ ସୁଦ୍ଧା କଳହ ଓ ହତ୍ୟାକାଣ୍ଡର କାରଣ ଜଣା ପଡିନଥିବା ବେଳେ ମୁଖ୍ୟ ଅଭିଯୁକ୍ତ ଧରା ପଡିବା ପରେ ଘଟଣାର ରହସ୍ୟ ଖୋଲିବ ବୋଲି ରାୟଗଡା ଏସ୍ପି ଶ୍ରବଣ ବିବେକ ସୂଚନା ଦେଇଛନ୍ତି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
