ରାୟଗଡା: ପର୍ଯ୍ୟଟକଙ୍କ ପାଇଁ ଅଭିଶାପ ପାଲଟିଛି ନାଗାବଳୀ ନଦୀର ଝୁଲାପୋଲ । ପ୍ରକୃତିକୁ ଉପଭୋଗ କରିବା ପାଇଁ ଅନେକ ପର୍ଯ୍ୟଟକ ସମୟ ସମୟରେ ଏଠାକୁ ଆସନ୍ତି । କିନ୍ତୁ ସେମାନଙ୍କ ମଧ୍ୟରୁ ଅନେକ ଆଉ ଜୀବନ୍ତ ଫେରି ପାରନ୍ତି ନାହିଁ । କାରଣ ହେଉଛି ଝୁଲାପୋଲ ତଳେ ଥିବା ନାଗାବଳୀ ନଦୀ ।
ରାୟଗଡା ଉପକଣ୍ଠ ନାଗାବଳୀ ନଦୀ ଉପରେ ନିର୍ମାଣ ହୋଇଛି ଜିଲ୍ଲାର ପ୍ରଥମ ଝୁଲା ପୋଲ। ରାୟଗଡା ଅଧିଷ୍ଠାତ୍ରୀ ମା ମଝି ଘରିଆଣୀ ଦର୍ଶନ ପାଇଁ ଓଡିଶା ସମେତ ଆନ୍ଧ୍ର ଓ ଛତିଶଗଡ଼ରୁ ଆସୁଥିବା ପର୍ଯ୍ୟଟକଙ୍କ ପାଇଁ ଝୁଲା ବ୍ରିଜ ଏକ ଦର୍ଶନୀୟ ସ୍ଥାନ ପାଲଟିଛି । ହେଲେ ସେଠାର ପ୍ରାକୃତିକ ଦୃଶ୍ୟକୁ ଉପଭୋଗ କରିବା ସହ ସ୍ମୁତିକୁ ସାଇତି ରଖିବାକୁ ସେଲ୍ଫି ନେବା ପାଇଁ ନଦୀ ଉପରକୁ ଚାଲିଯାନ୍ତି ପର୍ଯ୍ୟଟକ । ଯାହା ସେମାନଙ୍କ ପାଇଁ କାଳ ସାଜୁଛି । ଗତ 3ବର୍ଷ ମଧ୍ୟରେ ନାଗାବଳୀରେ 18ଜଣଙ୍କ ବୁଡିଯାଇ ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ଅଧିକାଂଶ ବାହାର ରାଜ୍ୟର ପର୍ଯ୍ୟଟକ। ନିଜର ଅସାବଧାନତା କାରଣରୁ ପଥରରୁ ଗୋଡଖସି ମୃତ୍ୟୁ ମୁଖରେ ପଡ଼ିଥାନ୍ତି ପର୍ଯ୍ୟଟକ ।
ଏମିତିରେ ନାଗାବଳୀ ନଦୀର ଜଳରାଶିକୁ ଦେଖିଲେ ତାର ଗଭୀରତା ଅନୁମାନ କରି ହୁଏ ନାହିଁ । କିନ୍ତୁ ଥରେ ପାଣିରେ ପଶିଲେ ମୃତ୍ୟୁ ଏକ ପ୍ରକାର ନିଶ୍ଚିତ ହୋଇଯାଏ । ଏନେଇ ପ୍ରଶାସନ ପକ୍ଷରୁ ବିପଦ ପୂର୍ଣ ସ୍ଥାନ ବୋଲି ବିଭିନ୍ନ ଭାଷାରେ ବୋର୍ଡ ଲଗାଯାଇଥିଲେ ମଧ୍ୟ କୌଣସି ସୁଫଳ ମିଳିପାରୁ ନାହିଁ । କାରଣ ଉପରେ ପାଣି ସ୍ଥିର ଥିଲେ ମଧ୍ୟ ଭିତରେ ପାଣି ବହୁତ ପ୍ରଖର। ଏପରିକି ସେଠାର ପାଣି ଭିତରେ ଥିବା ପଥରଗୁଡିକ ମଧ୍ୟ ମୁନିଆ ଯାହା ବାହାରକୁ ଜଣାପଡ଼େ ନାହିଁ । ଯାହା ବହୁ ପର୍ଯ୍ୟଟକଙ୍କ ମୃତ୍ୟୁର କାରଣ ହୋଇଥାଏ । ତେବେ ଏନେଇ ଅଧିକ ସଚେତନତା ଓ ଜଗୁଆଳି ବ୍ୟବସ୍ଥା କରିବା ଆବଶ୍ୟକ ବୋଲି ପର୍ଯ୍ୟଟକ ମତ ଦେଇଛନ୍ତି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
