ରାୟଗଡା: ଚଳିତ ବର୍ଷ ଖରିଫ ଧାନ ପାଇଁ ରାୟଗଡା ଜିଲ୍ଲାରେ ୨୧ ହଜାର ୧୭୧ ଜଣ ଚାଷୀ ପଞ୍ଜୀକୃତ କରିଛନ୍ତି । ସେଥିମଧ୍ୟରୁ ୨୦ ହଜାର ୩୩୨ ଚାଷୀଙ୍କ ତଥ୍ୟ ଯାଞ୍ଚ ସରିଛି । ହେଲେ ଧାନ ଚାଷ ହୋଇଥିବା ଜମି ଗୁଡିକର ସାଟେଲାଇଟ ସର୍ଭେ ପରେ ୧୦ ହଜାରରୁ ଊର୍ଦ୍ଧ୍ବ ଭୂତ ପ୍ଲଟ ରହିଥିବା ନଜରକୁ ଆସିଛି । କୃଷକଙ୍କୁ ସୁବିଧା ପ୍ରଦାନ ପାଇଁ ସରକାର କୃଷି କ୍ଷେତ୍ରକ ଅନେକ ସୁବିଧା ପ୍ରଦାନ କରୁଛନ୍ତି । ମୁଖ୍ୟତଃ ନିଜର ଉତ୍ପାଦିତ ଫସଲ କିଭଳି ଭଲରେ ବିକ୍ରି କରିବେ ଓ ଉଚିତ୍ ମୂଲ୍ୟ ପାଇବ ତାହା ଏକ ବଡ କାର୍ଯ୍ୟ । ସେଥିପାଇଁ ସରକାର ଅନେକ ନିୟମ ଲାଗୁ କରିଛନ୍ତି । ହେଲେ ସମବାୟ ଓ ରାଜସ୍ୱ ବିଭାଗ ଅଧିକାରୀଙ୍କ ଦୁର୍ନୀତି ଯୋଗୁଁ ପ୍ରକୃତ ଚାଷୀ ହଇରାଣ ହେବା ସହିତ ଉତ୍ପାଦିତ ଫସଲ ବିକ୍ରିରୁ ବଞ୍ଚିତ ହେଉଛନ୍ତି । ଫଳରେ ଦଲାଲ ଓ କିଛି କର୍ମଚାରୀ ଏହାର ଫାଇଦା ନେଉଛନ୍ତି ।
ମୁଖ୍ୟତଃ ଧାନ ଓ ମାଣ୍ଡିଆ ଚାଷ କ୍ଷେତ୍ରରେ ଏହି ଅନିୟମିତତା ସର୍ବାଧିକ ରହିଛି । ସରକାର ଧାନ ଚାଷ ହୋଇଥିବା ଜମିଗୁଡିକର ସାଟେଲାଇଟ ସର୍ଭେ କରିବା ପରେ ୧୦ ହଜାରରୁ ଊର୍ଦ୍ଧ୍ବ ଭୂତ ପ୍ଲଟ ରହିଥିବା ନଜରକୁ ଆସିଛି । ସାଟେଲାଇଟ ସର୍ଭେ ଶେଷ ପରେ ଏହି ନକଲି ପ୍ଲଟ ସଂଖ୍ୟା ୧୪ ହଜାର ପାର କରିବ ବୋଲି ସନ୍ଦେହ କରାଯାଉଛି । ଫଳରେ ବର୍ଷ ବର୍ଷ ଧରି ଯେଉଁ ଅନିୟମିତତା ଚାଲିଥିଲା ସେଥିରେ ଏକପ୍ରକାର ଯବନିକା ପଡିବାର ସମ୍ଭାବନା ଦେଖାଦେଇଛି ।
