ରାୟଗଡା: ଗତ ଶୁକ୍ରବାର ଦିନ ଅମରନାଥ ଗୁମ୍ଫା ନିକଟରେ ବାଦଲ ଫଟା ବର୍ଷା ଯୋଗୁଁ ପାହାଡ଼ରୁ ଦ୍ରୁତ ଗତିରେ ପାଣି ମାଡ଼ି ଆସିବାରୁ ତିନି ଜଣ ମହିଳାଙ୍କ ସମେତ 16 ଜଣ ଲୋକଙ୍କ ମୃତ୍ୟ ଘଟିଥିଲା । ରାୟଗଡା ଜିଲ୍ଲାରୁ ମଧ୍ୟ ପାଞ୍ଚ ଜଣ ଅମରନାଥ ଦର୍ଶନ ପାଇଁ ଯାଇଥିଲେ। ହେଲେ ସମସ୍ତେ ଅଳ୍ପକେ ମୃତ୍ୟୁମୁଖରୁ ବର୍ତ୍ତିଯାଇଛନ୍ତି । ସମସ୍ତଙ୍କ ଜିନିଷ ପତ୍ର ଓ ଟଙ୍କା ଭାସି ଯାଇଥିବା ବେଳେ ସମସ୍ତେ ସୁରକ୍ଷିତ ଥିବା ଜଣାପଡିଛି।
ସେହି ଶ୍ରଦ୍ଧାଳୁ ମାନେ ହେଲେ, ବସନ୍ତ କୁମାର ସେନାପତି, ସୌମ୍ୟ ରଞ୍ଜନ ପାତ୍ର, କେ. ରବି କୁମାର, ଟୁକୁନା ପ୍ରଧାନ ଓ ନିହାର ରଞ୍ଜନ ପାତ୍ର ବୋଲି ଜଣାପଡ଼ିଛି । ଅପରପକ୍ଷେ ରାୟଗଡା ଜିଲ୍ଲାପାଳ ସ୍ଵଧା ଦେବ ସିଂ ସମସ୍ତ ତୀର୍ଥଯାତ୍ରୀ ଯେପରି ସୁରକ୍ଷିତ ଭାବେ ରାୟଗଡା ଫେରିବେ ସେନେଇ ସମସ୍ତ ପଦକ୍ଷେପ ଗ୍ରହଣ କରିଛନ୍ତି । ସେ ଗତକାଲି ଠାରୁ ସେଠିକା ସ୍ଥାନୀୟ ପ୍ରଶାସନ ସହ ଯୋଗସୂତ୍ର ରକ୍ଷା କରି ସେମାନଙ୍କୁ ପ୍ରଥମେ ଶ୍ରୀନଗର, ତା’ ପରେ ଜମ୍ମୁ ଏବଂ ଶେଷରେ ଦିଲ୍ଲୀ ପହଞ୍ଚାଇବାର ବ୍ୟବସ୍ଥା କରିଛନ୍ତି ।
ରାୟଗଡାରୁ ଯାଇଥିବା ସମସ୍ତ ପାଞ୍ଚ ଜଣ ତୀର୍ଥଯାତ୍ରୀ ଆଜି(ରବିବାର) ଶ୍ରୀନଗରରୁ ଭୋରରୁ ବାହାରି ସନ୍ଧ୍ୟାରେ ଜାମ୍ମୁ ପହଞ୍ଚିଛନ୍ତି । ସମସ୍ତ ଯାତ୍ରୀ ସୁରକ୍ଷିତ ଥିବା ବେଳେ ସେମାନଙ୍କ ସ୍ବାସ୍ଥ୍ୟ ଅବସ୍ଥା ଠିକ ଥିବା ପ୍ରକାଶ କରିଛନ୍ତି ଅମରନାଥ ଯାଇଥିବା ଯାତ୍ରୀ ଟୁକୁନା ପ୍ରଧାନ । ଜିଲ୍ଲାପାଳଙ୍କ ହସ୍ତକ୍ଷେପ ପରେ ଅମରନାଥରୁ ସୁରକ୍ଷିତ ଫେରୁଛନ୍ତି ରାୟଗଡାରୁ ଯାଇଥିବା ସମସ୍ତ ପାଞ୍ଚ ଜଣ ତୀର୍ଥଯାତ୍ରୀ ।
ଇଟିଭି ଭାରତ, ରାୟଗଡା
