ରାୟଗଡା: ଚାଷ କାର୍ଯ୍ୟ ବେଳେ ଚାଷୀଙ୍କୁ ଘାରିଛି ୟୁରିଆ ସାର ଚିନ୍ତା । ରାୟଗଡା ଜିଲ୍ଳାରେ ଏବେ ଦେଖାଦେଇଛି ସାରର ଅଭାବ । ସରକାରୀ ଷ୍ଟୋରରେ ଦିନ ଦିନ ଧରି ଅପେକ୍ଷା କଲେ ମଧ୍ୟ ଆବଶ୍ୟକୀୟ ପରିମାଣରେ ସାର ମିଳୁ ନଥିବାରୁ ଚାଷୀ ମହଲରେ ଏବେ ଅସନ୍ତୋଷ ଦେଖାଦେଇଛି ।
ଏଥିପାଇଁ ଆଜି(ରବିବାର) ରାୟଗଡା ଲାମ୍ପସ ଆଗରେ ଚାଷୀଙ୍କ ଲମ୍ବାଧାଡି ଦେଖିବାକୁ ମିଳିଛି । ଧାନ ରୁଆ ସରିବା ପରେ ଯେଉଁ ସମୟରେ ବିଲରେ ପକାଇବା ପାଇଁ ଚାଷୀ ନିକଟରେ ସାର ନାହିଁ । ବଂର ଚାଷୀକୁ ବସ୍ତେ କି ଦୁଇବସ୍ତା ସାର ଦେଇ ଭୁଆଁ ବୁଲାଉଛନ୍ତି ଲ୍ୟାମ୍ପସ କର୍ତ୍ତୃପକ୍ଷ ।
ଯେଉଁ ଚାଷୀକୁ ଏବେ ୮ ବସ୍ତା ସାର ଦରକାର ତାକୁ ମିଳୁଛି ମାତ୍ର ଗୋଟିଏ ବସ୍ତା । ଏଥିପାଇଁ ଚାଷୀଙ୍କ ମନରେ ତୀବ୍ର ଅସନ୍ତୋଷ ଦେଖାଦେଇଛି । ବର୍ତମାନ ଠିକଣା ସମୟରେ ସାର ନମିଳିଲେ ପୂରା ଚାଷ ନଷ୍ଟ ହୋଇଯିବାର ଆଶଙ୍କା ପ୍ରକାଶ କରିଛନ୍ତି ଚାଷୀ ।
ଗୋଟିଏ ପଟେ ସରକାରୀ ଲ୍ୟାମ୍ପସରେ ସାର ମିଳୁ ନଥିବା ଯୋଗୁଁ ବାହାରେ ଚଢାଦର ଦେଇ ସାର କିଣିବାକୁ ବାଧ୍ୟ ହେଉଛନ୍ତି ଚାଷୀ । ଅନ୍ୟପଟେ ଜିଲ୍ଲାରେ ଯଥେଷ୍ଟ ପରିମାଣର ସାର ଗଚ୍ଛିତ ଥିବାବେଳେ, ସାରର ଅଭାବ ନଥିବା ସମବାୟ ସଂସ୍ଥା ପକ୍ଷରୁ କୁହାଯାଉଛି । ଚଳିତବର୍ଷ ଆବଶ୍ୟକ ପରିମାଣର ସାର ଆସି ନଥିବାରୁ ଏଭଳି ପରିସ୍ଥିତି ଦେଖାଦେଇଛି ବୋଲି କହିଛି କୃଷିବିଭାଗ ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
