ରାୟଗଡା: ଇଟିଭି ଭାରତରେ ଖବର ପ୍ରସାରଣ ପରେ ଦିବ୍ୟାଙ୍ଗ ଯୁବତୀଙ୍କୁ ମିଳିଲା ଟ୍ରାଇ ସାଇକେଲ । ରାୟଗଡା ଜିଲ୍ଲା ପିତାଯୋଡି ଗ୍ରାମର ଦିବ୍ୟାଙ୍ଗ ଯୁବତୀ କବିତା ନାଏକଙ୍କୁ ସରକାର ଟ୍ରାଇ ସାଇକେଲ ପ୍ରଦାନ କରିଛନ୍ତି ।
ଜିଲ୍ଲାର କାଶିପୁର ବ୍ଲକ ଟିକିରି ପଞ୍ଚାୟତ ପିତାଯୋଡି ଗ୍ରାମର ଦିବ୍ୟାଙ୍ଗ ଯୁବତୀ କବିତା ନାଏକ । ଭାଗ୍ୟର ବିଡମ୍ବନାରୁ ଜନ୍ମରୁ ସେ ପୋଲିଓ ରୋଗରେ ପୀଡିତ ହୋଇ ଗୋଡ ଦୁଇଟି ହରାଇଥିଲେ ।
ତେବେ ଚାଲି ବୁଲି ପାରୁନଥିବା କବିତାଙ୍କ ପାଇଁ ସାତସପନ ଥିଲା ଟ୍ରାଇ ସାଇକେଲ ଟିଏ । ଏନେଇ ଇଟିଭି ଭାରତରେ କବିତା କିପରି ସରକାରୀ ସୁବିଧାରୁ ବଞ୍ଚିତ ସେନେଇ ଏକ ବିସ୍ତୃତ ରିପୋର୍ଟ ଗତ ମାସ 10 ତାରିଖରେ ପ୍ରସାରଣ କରାଯାଇଥିଲା । ଏପରିକି ଦିବ୍ୟାଙ୍ଗ ଯୁବତୀ କବିତାଙ୍କ ଅଭାବ ଅସୁବିଧାକୁ ନେଇ ଜିଲ୍ଲା ପ୍ରଶାସନର ଦୃଷ୍ଟି ଆକର୍ଷଣ କରଯାଇଥିଲା ।
ଫଳରେ ଜିଲ୍ଲାପ୍ରଶାସନର ନିର୍ଦ୍ଦେଶରେ କାଶୀପୁର ବିଡିଓଙ୍କ ନେତୃତ୍ବରେ ଏକ ଟିମ ପିତାଯୋଡି ଗାଁକୁ ଯାଇ କବିତାଙ୍କୁ ଭେଟିବା ସହ ଟ୍ରାଇ ସାଇକେଲ ଦେଇଛନ୍ତି । ସେହିପରି ଆଗାମୀ ଦିନରେ ତାଙ୍କ ସ୍ବାସ୍ଥ୍ୟ ପରୀକ୍ଷା କରାଯିବା ସହ ତାଙ୍କ ପରିବାରକୁ ଘର ଖଣ୍ଡିଏ ଯୋଗାଇ ଦେବାର ପ୍ରତିଶ୍ରୁତି ଦେଇଛନ୍ତି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
