ରାୟଗଡା: ସଙ୍ଗରୋଧ କେନ୍ଦ୍ରରେ ଅବ୍ୟବସ୍ଥା ଯୋଗୁଁ ଶିରୋଝଲି ପଞ୍ଚାୟତବାସୀଙ୍କ ସ୍ବାବ ନମୁନା ସଂଗ୍ରହ ହୋଇପାରିନାହିଁ । ଶିରିଝୋଲି ପଞ୍ଚାଯତର ବିଭିନ୍ନ ଗ୍ରାମରୁ ଶତାଧିକ ଲୋକଙ୍କୁ ଏକ ଘରୋଇ ବସ ଯୋଗେ ରାମନାଗୁଡା ବ୍ଳକର କୁଜେନ୍ଦ୍ରୀ ସଙ୍ଗରୋଧ କେନ୍ଦ୍ରକୁ ନିଆଯାଇଥିଲା । ହେଲେ ସେଠାରେ ଅବ୍ୟବସ୍ଥା କାରଣରୁ ଶତାଧିକ ଲୋକ ବର୍ଷାରେ ଭିଜି ଘରକୁ ଫେରିଥିବା ଦେଖିବାକୁ ମିଳିଛି ।
ଶନିବାର ସକାଳୁ ଶିରିଝୋଲି ପଞ୍ଚାଯତର ବିଭିନ୍ନ ଗ୍ରାମରୁ ଶତାଧିକ ଲୋକଙ୍କୁ ଏକ ଘରୋଇ ବସରେ ସ୍ବାବ ପରୀକ୍ଷା ପାଇଁ କୁଜେନ୍ଦ୍ରୀ ସଙ୍ଗରୋଧ କେନ୍ଦ୍ରକୁ ନିଆଯାଇଥିଲା। ହେଲେ ସେଠାରେ ପହଞ୍ଚିବା ପରେ ଲୋକମାନଙ୍କୁ ନା ଦିଆଯାଇଥିଲା ଖାଦ୍ୟ ନା ପିଇବାକୁ ଟିକେ ପାଣି । ଫଳରେ ଲୋକମାନେ ଅସନ୍ତୋଷ ହୋଇ ବର୍ଷାରେ ଭିଜି ସଙ୍ଗରୋଧ କେନ୍ଦ୍ରରୁ ଚାଲିଚାଲି ଘରକୁ ଫେରିଥିଲେ । ଏପରିକି ସେଠାରେ ସ୍ବାବ ନମୁନା ମଧ୍ୟ ସଂଗ୍ରହ କରାଯାଇନଥିବା କହିଛନ୍ତି ଗ୍ରାମବାସୀ । ସେପଟେ ଜିଲ୍ଲାରେ କୋରୋନା ଆକ୍ରାନ୍ତଙ୍କ ସଂଖ୍ୟା ବଢିବା ଦୃଷ୍ଟିରୁ ଜିଲ୍ଲାକୁ ସଟଡାଉନ ଘୋଷଣା କରାଯାଇଛି ।
ଶିରୋଝଲି ପଞ୍ଚାୟତର ବିଜୟପୁର ଗାଁରେ କୋରୋନା ସଂକ୍ରମଣ ଦେଖାଯିବା ପରେ ଜିଲ୍ଲା ପ୍ରଶାସନର ଚିନ୍ତା ବଢିଯାଇଛି । ବାରିକ, ପାଇପମିସ୍ତ୍ରୀ ପରେ ଏବେ ସୁପର ସ୍ପ୍ରେଡର ତାଲିକାରେ ଗ୍ରୋସରୀ ଦୋକାନ ବଏ ରହିଛନ୍ତି । ପଜିଟିଭ ଚିହ୍ନଟ ହୋଇଥିବା ଗ୍ରୋସରୀ ଦୋକାନ ବଏ ବିଜୟପୁର ଗାଁର ହୋଇଥିବାରୁ କଣ୍ଟ୍ରାକ୍ଟ ଟ୍ରେସିଂକୁ ନେଇ ବଢ଼ିଛି ପ୍ରଶାସନର ମୁଣ୍ଡବ୍ୟଥା ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
