ରାୟଗଡା:ରାଜ୍ୟବ୍ୟାପୀ ତେଜିବାରେ ଲାଗିଛି ସ୍ବାସ୍ଥ୍ୟକର୍ମୀଙ୍କ ପୁନଃ ଥଇଥାନ ଦାବି । ପ୍ରତ୍ୟେକ କୋଭିଡ ସ୍ବାସ୍ଥ୍ୟକେନ୍ଦ୍ରରେ ନିୟୋଜିତ କୋଭିଡ ଯୋଦ୍ଧାଙ୍କୁ ପୁନଃ ଥଇଥାନ ପାଇଁ ଦାବି କରିବା ସହ ଉକ୍ତ କେନ୍ଦ୍ରକୁ ପଞ୍ଚାୟତ ହେଲଥ୍ କେୟାର ହୋମ କରିବାକୁ ଶୁକ୍ରବାର ରାୟଗଡାରେ 'କୋଭିଡ ଓ୍ବାରିଅର ଚିଟେଡ ଫୋରମ' ପକ୍ଷରୁ ଦାବି କରାଯାଇଛି ।
ଶୁକ୍ରବାର 'କୋଭିଡ ଓ୍ବାରିଅର ଚିଟେଡ ଫୋରମର' ରାଜ୍ୟ ସଭାପତି ଇଂ ଦେବାଶିଷ ହୋତାଙ୍କ ନେତୃତ୍ବରେ ସ୍ଥାନୀୟ ଡିଆରଡିଏ କାର୍ଯ୍ୟାଳୟରୁ ଏକ ଶୋଭାଯାତ୍ରା ବାହାରି କଲେଜ ରୋଡ ଦେଇ ଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚିଥିଲା । ଏନେଇ ସେଠାରେ ଜିଲ୍ଲାପାଳଙ୍କ ଉଦ୍ଦେଶ୍ୟରେ ଡେପୁଟି କଲେକ୍ଟର ନାରାୟଣ ମିଶ୍ରଙ୍କୁ ଏକ ସ୍ମାରକ ପତ୍ର ପ୍ରଦାନ କରାଯାଇଛି ।
ଏହି କୋଭିଡ ଯୋଦ୍ଧା ଅର୍ଥାତ୍ କୋଭିଡ କେନ୍ଦ୍ରର ଅସ୍ଥାୟୀ ସ୍ବାସ୍ଥ୍ୟକର୍ମୀମାନେ ମହାମାରୀ ସମୟରେ ନିଜ ଜୀବନକୁ ବାଜି ଲଗାଇ ନିଃସ୍ବାର୍ଥପର ଭାବେ ସେବା କରିଥିଲେ । ହେଲେ ଏବେ ରାଜ୍ୟରେ କୋରୋନା ସଂକ୍ରମଣ ହ୍ରାସ ପାଉଥିବାରୁ କୋଭିଡ କେନ୍ଦ୍ରଗୁଡିକ ବନ୍ଦ କରାଯାଇ ସ୍ବାସ୍ଥ୍ୟକର୍ମୀଙ୍କୁ ଛଟେଇ କରାଯାଇଛି । ଏଣୁ ସେମାନଙ୍କୁ ପୁନଃ ଥଇଥାନ କରିବାକୁ ଦାବି କରାଯାଇଛି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ