ରାୟଗଡା: ଦିନକୁ ଦିନ ରାଜ୍ୟରେ କୋରୋନା ଆକ୍ରାନ୍ତଙ୍କ ସଂଖ୍ୟା ବଢିବାରେ ଲାଗିଥିବା ବେଳେ ରାଜ୍ୟରେ ଆରମ୍ଭ ହୋଇଛି କୋରୋନା ଚିହ୍ନଟ ଅଭିଯାନ । ରାୟଗଡା ଜିଲ୍ଲାରେ ମଧ୍ୟ ଏଏନ୍ଏମ୍ ଓ ଆଶା ଦିଦିମାନେ ଘରକୁ ଘର ବୁଲି ଲୋକମାନଙ୍କୁ କୋରୋନା ସଂକ୍ରାନ୍ତରେ ସଚେତନ କରିବା ସହ ଥଣ୍ଡା , କାଶ ,ଜ୍ଵର ଲକ୍ଷଣ ଥିବା ଲୋକଙ୍କୁ ଚିହ୍ନଟ କରୁଛନ୍ତି । ଯେଉଁ ମାନଙ୍କୁ ଥଣ୍ଡା,କାଶ,ଜ୍ବର ଓ ଆଣ୍ଠୁଗଣ୍ଠି ବିନ୍ଧା ହେଉଛି ସେମାନଙ୍କୁ ତାଲିକାଭୁକ୍ତ କରିବା ସହ ସେମାନଙ୍କୁ ମେଡିକାଲକୁ ସ୍ଥାନାନ୍ତର କରିବାର ବ୍ୟବସ୍ଥା କରାଯାଉଛି ।
କୋରୋନା ସମେତ ଜିଲ୍ଲାରେ ଚିର ପରିଚିତ ଡାଇରିଆ , ଡେଙ୍ଗୁ ଓ ମେଲେରିୟା ଭଳି ରୋଗୀଙ୍କୁ ଚିହ୍ନଟ କରିବା ସହ ସେମାନଙ୍କୁ ଔଷଧ ଖାଇବା ଏବଂ ପରିବେଶ ପରିବେଷ୍ଟନୀ ସଫା ରଖିବାକୁ ସଚେତନ କରାଯାଉଛି । ଏଥି ପାଇଁ ଜିଲ୍ଲାରେ 414 ଜଣ ଏଏନ୍ଏମ୍ ଓ 1827 ଜଣ ଆଶା ଦିଦିଙ୍କୁ ଏହି କାର୍ଯ୍ୟରେ ନିୟୋଜିତ କରାଯାଇଛି । ଯେଉଁ ମାନଙ୍କ ଦେହରେ ଏସବୁ ଲକ୍ଷଣ ବାହାରୁଛି ସେମାନଙ୍କ ରକ୍ତ ପରୀକ୍ଷା କରି ନିକଟସ୍ଥ ଡାକ୍ତରଖାନାକୁ ପଠାଯାଉଛି । ଏହି କାର୍ଯ୍ୟକ୍ରମ ଆସନ୍ତା ଜୁଲାଇ 31 ତାରିଖ ପର୍ଯ୍ୟନ୍ତ ଜାରି ରହିବ ବୋଲି ଜିଲ୍ଲା ମୁଖ୍ୟ ଚିକିତ୍ସାଧିକାରୀ କହିଛନ୍ତି ।
ରାୟଗଡାରୁ ରଞ୍ଜନ ରଥ, ଇଟିଭି ଭାରତ
