ରାୟଗଡା: ଜିଲ୍ଲାର ବିଭିନ୍ନ ଅଞ୍ଚଳ ବୁଲି ସ୍ଥିତି ପରଖିଲେ ଜିଲ୍ଲାପାଳ । ରାୟଗଡା ଜିଲ୍ଲା ସଦର ବ୍ଲକର ବିଭିନ୍ନ ପଞ୍ଚାୟତ ଗସ୍ତ କରି ଉନ୍ନୟନ କାର୍ଯ୍ୟର ସମୀକ୍ଷା କରିଛନ୍ତି ଜିଲ୍ଲାପାଳ ସରୋଜ କୁମାର ମିଶ୍ର । ପ୍ରଥମେ ଗୁମ୍ମା ଗ୍ରାମପଞ୍ଚାୟତ ଗସ୍ତ କରି ଅଙ୍ଗନବାଡି କେନ୍ଦ୍ରରେ ପହଞ୍ଚିଥିଲେ । ସେଠାରେ ଶିଶୁ ମାନଙ୍କ ନିମନ୍ତେ ଥିବା ଦ୍ରବ୍ୟ ଉପକରଣ ଓ ତାହାର ଉପାଦେୟତା ଉପରେ ଆଲୋଚନା କରିଛନ୍ତି ଜିଲ୍ଲାପାଳ ।
ତେବେ ଅଙ୍ଗନବାଡି କେନ୍ଦ୍ରରେ ଉପସ୍ଥିତ ଥିବା ସ୍ବୟଂ ସହାୟକ ଗୋଷ୍ଠୀର ସଦସ୍ୟାଙ୍କ ସହିତ ବିଭିନ୍ନ ବିଷୟକୁ ନେଇ ଆଲୋଚନା କରିବା ସହ ବ୍ୟାଙ୍କରୁ ଋଣ ନେଇ ବେପାର ବାଣିଜ୍ୟ କରିବାକୁ ସେ ପରାମର୍ଶ ଦେଇଛନ୍ତି । ସେହିପରି ଅଙ୍ଗନବାଡି କେନ୍ଦ୍ରରେ ଛତୁଆ, ଅଣ୍ଡା ବଣ୍ଟନ ଠିକ ଭାବରେ ହେଉଛି ନାହିଁ ତାହା ମଧ୍ୟ ପଚାରି ବୁଝିଛନ୍ତି ଜିଲ୍ଲାପାଳ ।
ସେଠାରୁ ଗୁମ୍ମା ଠାରେ ଥିବା ଆଇଟିଆଇ କେନ୍ଦ୍ରରେ ପହଁଞ୍ଚି ସ୍ବୟଂ ସହାୟକ ଗୋଷ୍ଠୀକୁ ହସ୍ତାନ୍ତର କରିବାକୁ ନିର୍ଦ୍ଦେଶ ଦେବା ସହ କୋଭିଡ ଟୀକା ନେଇ ନଥିବା ବ୍ୟକ୍ତି ମାନଙ୍କୁ ସଚେତନ କରି ଟୀକାକରଣ କରିବାକୁ ସରପଞ୍ଚ ଓ ଅଙ୍ଗନବାଡି କର୍ମୀଙ୍କୁ ସେ ପରାମର୍ଶ ଦେଇଛନ୍ତି । ଏହାପରେ ଗୁମ୍ମା ଉଚ୍ଚ ବିଦ୍ୟାଳୟ ପରିଦର୍ଶନ କରି ବିଦ୍ୟାଳୟରେ ଥିବା ନବମ ଓ ଦଶମ ଶ୍ରେଣୀ ଛାତ୍ରଛାତ୍ରୀ ମାନଙ୍କୁ ଶିକ୍ଷା ବ୍ୟବସ୍ଥା ବିଷୟରେ ସେ ପଚାରି ବୁଝିଛନ୍ତି । ସେପଟେ ଛାତ୍ରଛାତ୍ରୀ ମାନଙ୍କୁ କିପରି ଉତ୍ତମ ଶିକ୍ଷାଦାନ କରାଯାଇପାରିବ ସେନେଇ ଶିକ୍ଷକ, ଶିକ୍ଷୟତ୍ରୀ ମାନଙ୍କୁ ପରାମର୍ଶ ଦେଇଛନ୍ତି ।
ସେପଟେ ଜିଲ୍ଲାପାଳ ଖମ୍ବେସୁ ଗ୍ରାମପଞ୍ଚାୟତ ଗସ୍ତ କରି ସେଠାରେ ସୌରଚାଳିତ ପମ୍ପ ଯୋଗେ ପିଇବା ପାଣି ଯୋଗାଣ ପ୍ରକଳ୍ପର ଅନୁଧ୍ୟାନ କରିଥିବା ବେଳେ ଖମ୍ବେସୁ ଗ୍ରାମର ଛୋଟ ଛୋଟ ପିଲାଙ୍କୁ ଚକୋଲେଟ ବଣ୍ଟନ କରିଥିଲେ । ତେବେ ଗାଁରେ ଶିକ୍ଷିତ ଯୁବକ ଯୁବତୀ ମାନଙ୍କୁ ଦିନଦୟାଲ ଗ୍ରାମୀଣ କୌଶଳ ବିକାଶ ଯୋଜନାରେ ଦକ୍ଷତା ବିକାଶ ତାଲିମ ଦେବା ପାଇଁ ଓଲେମ ଡିପିଏମଙ୍କୁ ନିର୍ଦ୍ଦେଶ ଦେଇଛନ୍ତି । ତା ସହିତ ଗ୍ରାମରେ ବିଦ୍ୟୁତ ସମସ୍ୟା ଥିବା ନେଇ ପୂର୍ବରୁ ଗ୍ରାମବାସୀମାନେ ଅଭିଯୋଗ କରିଥିବା ବେଳେ ଏହାର ତୁରନ୍ତ ସମାଧାନ କରାଯିବା ନେଇ ପ୍ରତିଶୃତି ଦେବା ସହ ଗ୍ରାମରେ ଗାଧୁଆଘର ଓ ଶୌଚାଳୟ ବ୍ୟବହାର କରିବାକୁ ଜିଲ୍ଲାପାଳ ଗ୍ରାମବାସୀଙ୍କୁ ପରାମର୍ଶ ଦେଇଛନ୍ତି ।
ରାୟଗଡାରୁ ରଞ୍ଜନ କୁମାର ରଥ, ଇଟିଭି ଭାରତ
