ରାୟଗଡ଼ା: କିଛି ଦିନର ନିରବତା ପରେ ସହରରେ ପୁଣି ଥରେ ଲୁଟେରାଙ୍କ ରାଜୁତି ଦେଖିବାକୁ ମିଳିଛି । ଉଦୁଉଦିଆ ଖରାବେଳେ ଆଜି ଜଣେ ବ୍ୟବସାୟୀଙ୍କ ଠାରୁ ହୋଇଥିବା ଲୁଟ ଘଟଣାରୁ ଏହା ସ୍ପଷ୍ଟ ହୋଇଛି । ରାୟଗଡ଼ାସ୍ଥିତ ଏଚଡ଼ିଏଫସି ବ୍ୟାଙ୍କ ସାମ୍ନାରେ ଘଟିଛି ଏହି ଘଟଣା । ଜଣେ ବ୍ୟବସାୟୀ ଏଚଡ଼ିଏଫସି ବ୍ୟାଙ୍କ ଏଟିଏମକୁ ଯାଇଥିବା ବେଳେ ଗାଡ଼ିରେ ଥିବା 3 ଲକ୍ଷ ଟଙ୍କାକୁ ଲୁଟି ନେଇଛନ୍ତି ଲୁଟେରା ।
ସୂଚନା ଅନୁସାରେ, ସିକରପାଇର ବ୍ୟବସାୟୀ ଟି.ମହେଶ୍ୱର କୁମାର ଆଜି ପୂର୍ବାହ୍ଣ ପ୍ରାୟ ୧୧.୪୫ ମିନିଟ ସମୟରେ ଆନ୍ଧ୍ର ବ୍ୟାଙ୍କରୁ ୩ଲକ୍ଷ ଟଙ୍କା ଉଠାଇ ପରେ ରାଣୀଗୁଡ଼ାସ୍ଥିତ ନିଜ ସମ୍ପର୍କୀୟ ଘରକୁ ଯାଇଥିଲେ । ପରେ ସେ ସ୍ଥାନୀୟ ଏଚଡ଼ିଏଫସି ବ୍ୟାଙ୍କ ଏଟିଏମ୍ ଭିତରକୁ ବକେୟା ଟଙ୍କା ଉଠାଇବା ନିମନ୍ତେ ଯାଇଥିଲେ ।
ଠିକ ଏହି ସମୟରେ ୪ଜଣ ଦୁର୍ବୃତ୍ତ ଆସି ତାଙ୍କ ବାଇକ ଡିକି ଭାଙ୍ଗି ଟଙ୍କା ବ୍ୟାଗ୍ ନେଇ ଚମ୍ପଟ ମାରିଛନ୍ତି । ରାୟଗଡ଼ା ଥାନାରେ ଏନେଇ ଏକ ଏତଲା ଦିଆଯାଇଥିବା ବେଳେ ପୋଲିସ ଘଟଣାସ୍ଥଳରେ ପହଞ୍ଚି ନିକଟରେ ଏକ ଘରେ ଲାଗିଥିବା ସିସିଟିଭି ଫୁଟେଜ ଆଧାରରେ ତଦନ୍ତ ଚଳାଇଛି।
ରାୟଗଡ଼ାରୁ ରଞ୍ଜନ କୁମାର ରଥ, ଇଟିଭି ଭାରତ
