ପୁରୀ: ଜିରୋ ନାଇଟ ପାଇଁ ଆରମ୍ଭ ହୋଇଛି କାଉଣ୍ଟଡାଉନ । ନୂଆବର୍ଷକୁ ସ୍ୱାଗତ କରିବା ସହ ନୂତନ ବର୍ଷର ସୂର୍ଯ୍ୟୋଦୟ ଦେଖିବାକୁ ପୁରୀରେ ଏବେ ହଜାର ହଜାର ପର୍ଯ୍ୟଟକଙ୍କ ଭିଡ଼ । ତେବେ ଶ୍ରୀମନ୍ଦିର SOP ଅନୁଯାୟୀ ଡିସେମ୍ବର 31 ନୂଆ ବର୍ଷ ଓ ଜାନୁଆରି 2 ରବିବାର ଶ୍ରୀମନ୍ଦିର ସାନିଟାଇଜ ହେତୁ ସାଧାରଣ ଦର୍ଶନ ବନ୍ଦ ରହିଛି । ତେବେ ପର୍ଯ୍ୟଟକ ମାନେ 30 ତାରିଖରେ ମହାପ୍ରଭୁଙ୍କ ଦର୍ଶନ ସାରି ପୁରୀରେ ଡେରା ପକାଇଛନ୍ତି ।
ନୂଆବର୍ଷରେ ସୂର୍ଯ୍ୟୋଦୟ ଦର୍ଶନ ନେଇ ସମସ୍ତେ ଏବେ ଅପେକ୍ଷାରେ । ତେବେ ଆଜି ସିବିଚରେ ପର୍ଯ୍ୟଟକମାନେ ବେଶ ମଜା ନେଇଛନ୍ତି । କିଏ ସମୁଦ୍ର ସ୍ନାନ କରୁଛି ତ କିଏ ଘୋଡା, ଓଟ ପିଠିରେ ବସି ବେଳାଭୂମିରେ ବୁଲିବାର ମଜା ନେଉଛି । ଯୁବପିଢି ସେଲ୍ଫି ନେଇ ମଜା ନେଉଥିବା ବେଳେ କେତେକ ପରିବାର ଲୋକ ସୁପରହିଟ ହିନ୍ଦୀ ଡ଼୍ୟାନ୍ସ ଗୀତରେ ଝୁମିଛନ୍ତି ।
ବିଶେଷ କରି ମହାପ୍ରଭୁଙ୍କ ଦର୍ଶନ ସମେତ ବେଳାଭୂମିରେ ବୁଲିବା ମଜା ଦେଶର କୋଣ ଅନୁକୋଣରୁ ପର୍ଯ୍ୟଟନଙ୍କୁ ଟାଣି ଆଣୁଚି ପୁରୀ ସହର । ସେହିପରି ଅନ୍ୟ ପର୍ଯ୍ୟଟନ ସ୍ଥଳୀ ଅପେକ୍ଷା ପୁରୀରେ ବୁଲିବା ଓ ରହିବା ଯଥେଷ୍ଟ କମ ଖର୍ଚ୍ଚ ଥିବାରୁ କମ ବଜେଟ ଯୋଗୁଁ ପୁରୀ ସହର ପର୍ଯ୍ୟଟକଙ୍କ ପ୍ରମୁଖ ପସନ୍ଦର ସ୍ଥାନ ହୋଇଛି । ତେବେ ପୁରୀରେ କିଭଳି ବର୍ଷ ଶେଷ ଦିନକୁ ପର୍ଯ୍ୟଟକ ମଜା ଉଠାଉଛନ୍ତି ଆସନ୍ତୁ ଦେଖିବା କିଛି ଝଲକ ଓ ପର୍ଯ୍ୟଟକଙ୍କ ପ୍ରତିକ୍ରିୟା ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
