ନିଆଳି/ପୁରୀ: ଗୋପରେ ମର୍ମନ୍ତୁଦ ସଡକ ଦୁର୍ଘଟଣା । ଦୁଇ ବାଇକ ମୁହାଁମୁହିଁ ଧକ୍କା ହେବାରୁ 2 ଜଣଙ୍କର ମୃତ୍ୟୁ ହୋଇଥିବା ବେଳେ ଦୁଇ ଆହତ ହୋଇଥିବା ସୂଚନା । ଶୁକ୍ରବାର ବିଳମ୍ବିତ ରାତିରେ କୋଣାର୍କ ରାସ୍ତାର ବନାଖଣ୍ତି ନିକଟରେ ଏହି ଦୁର୍ଘଟଣା ଘଟିଛି । 2 ମୃତ ଯୁବକ ହେଉଛନ୍ତି କୋଣାର୍କ ମାଉସୀ ମାଆ ସାହିର ବିଜୟ କୁମାର ବେହେରା ଓ କୋଣାର୍କ ନଳକଣ ଗ୍ରାମର କୈଳାସ ଦାସ ବୋଲି ଜଣାପଡିଛି । ଗୁରୁତର ହୋଇଥିବା ଖରା ଗାଁ ଗ୍ରାମର ରଞ୍ଜିତ ବେହେରା ଓ କରମଙ୍ଗା ବାଲିସାହି ଗ୍ରାମର ସୁବାସ ଦାସ ବର୍ତ୍ତମାନ ହସ୍ପିଟାଲରେ ଚିକିତ୍ସାଧିନ ରହିଛନ୍ତି ।
ମିଳିଥିବା ସୂଚନା ଅନୁଯାୟୀ ଗତକାଲି ରାତିରେ ବିଜୟ ଓ ସୁବାସ କୌଣସି କାର୍ଯ୍ୟରେ ବାଇକ ଯୋଗ ଭୁବନେଶ୍ୱର ଯାଉଥିଲେ । ଏହି ସମୟରେ ଗୋପ-କୋଣାର୍କ ରାସ୍ତାର ବନାଖଣ୍ତି ନିକଟରେ ଅପର ପାର୍ଶ୍ୱରୁ ରଞ୍ଜିତ ଓ କୈଳାସ ଏକ ବାଇକ ଯୋଗେ କୋଣାର୍କ ଆସୁଥିଲେ । ଏହି ଦୁଇ ବାଇକ୍ ମଧ୍ୟରେ ମୁହାଁମୁହିଁ ଧକ୍କା ହୋଇଥିଲା । ଫଳରେ ଘଟଣାସ୍ଥଳରେ 4 ଯୁବକଙ୍କ ଅବସ୍ଥା ଗୁରୁତର ହୋଇପଡିଥିଲା । ସଙ୍ଗେ ସଙ୍ଗେ ସମସ୍ତଙ୍କୁ ଗୋପ ହସ୍ପିଟାଲରେ ଭର୍ତ୍ତି କରାଯାଇଥିଲା । କିନ୍ତୁ ସେଠାରେ ଡାକ୍ତର ଶୀବ ପ୍ରସାଦ ମଙ୍ଗରାଜ ବିଜୟ କୁମାର ବେହେରା ଓ କୈଳାସ ଦାସଙ୍କୁ ମୃତ ଘୋଷଣା କରିଥିଲେ । ଅନ୍ୟ ଦୁଇ ଗୁରୁତରଙ୍କ ମଧ୍ୟରୁ ଜଣଙ୍କୁ ଗୋପ ମେଡିକାଲରେ ଚିକିତ୍ସା କରାଯାଉଛି । ଅନ୍ୟ ଜଣଙ୍କୁ ଭୂବନେଶ୍ୱରକୁ ସ୍ଥାନାନ୍ତର କରାଯାଇଛି । ଏନେଇ ଖବର ପାଇ କୋଣାର୍କ ପୋଲିସ ଘଟଣା ସ୍ଥାନରେ ପହଞ୍ଚି ଦୁଇ ବାଇକ ଜବତ କରି ତଦନ୍ତ ଚଳାଇଛି ।
ଗତକାଲି କୋରାପୁଟରେ ଏକ ସଡକ ଦୁର୍ଘଟଣା ଘଟିଥିଲା । ବାଇକକୁ ପଛପଟୁ କୋଇଲା ବୋଝେଇ ଟ୍ରକ୍ ଧକ୍କା ଦେବାରୁ ଘଟଣା ସ୍ଥଳରେ ଦୁଇଜଣ ମହିଳାଙ୍କ ମୃତ୍ୟୁ ଘଟିଥିବା ବେଳେ ଜଣେ 3 ବର୍ଷର ଶିଶୁ ଗୁରୁତର ହୋଇଥିଲେ । ଗୁରୁତର ଅବସ୍ଥାରେ 3 ବର୍ଷର ଶିଶୁକୁ ପ୍ରଥମେ କୋରାପୁଟ ସ୍ଥିତ ଶହୀଦ ଲକ୍ଷ୍ମଣ ନାୟକ ମେଡିକାଲ ଓ ପରେ ବିଶାଖାପାଟଣାକୁ ସ୍ଥାନାନ୍ତରିତ କରାଯାଇଛି ।
ଗତ ଜୁନ 14 ତାରିଖରେ ବଲାଙ୍ଗୀରରେ ଟ୍ରକ ସହ ଗୋଟିଏ କାର୍ ପିଟି ହୋଇଥିଲା । ଫଳରେ ଘଟଣାସ୍ଥଳରେ 5 ଜଣଙ୍କର ମୃତ୍ୟୁ ହୋଇଥିଲା । ବଲାଙ୍ଗୀର ସମ୍ବଲପୁର 26 ନଂ ଜାତୀୟ ରାଜପଥ ଛୁଇଁବନ୍ଧ ନିକଟରେ ଏହି ଦୁର୍ଘଟଣା ଘଟିଥିଲା । ରାସ୍ତାକଡରେ ଛିଡା ହୋଇଥିବା ଟ୍ରକ ସହ ଗୋଟିଏ କାର୍ ପିଟି ହେବାରୁ 5 ଜଣଙ୍କର ଶୋଚନୀୟ ମୃତ୍ୟୁ ହୋଇଥିଲା । ମୃତକଙ୍କ ମଧ୍ୟରେ 2 ଜଣ ଶିଶୁ, 2 ମହିଳା ଓ ଜଣେ ଯୁବକ ରହିଥିଲେ ।
ଇଟିଭି ଭାରତ, ନିଆଳି
