ପୁରୀ: ଆଇସୋଲେସନ ସେଣ୍ଟରରେ ମଦ ପିଇବା ଘଟଣାକୁ ନେଇ 3 ଗିରଫ । ଆଇସୋଲେସନ ସେଣ୍ଟରରେ ଥିବା ବେଡ୍ ଉପରେ ବସି ଗପସପ କରିବା ଓ ପରିସରରେ ବସି ମଦ ପିଇବା ବେଶ ମହଙ୍ଗା ପଡିଛି । ଘଟଣାର ଫୋଟୋ ସୋସିଆଲ ମିଡିଆରେ ଭାଇରାଲ ହେବା ପରେ ପୁରୀ ଜିଲ୍ଲା ପ୍ରଶାସନ ପକ୍ଷରୁ କ଼ଡା ପଦକ୍ଷେପ ଗ୍ରହଣ କରାଯାଇଛି ।
ସୂଚନାଥାଉକି କିଛି ଦିନ ତଳେ ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକ ଚିଲିକା ନୂଆପଡା ସାଇକ୍ଲୋନ ସେଣ୍ଟରରେ ଥିବା କୋଭିଡ-୧୯ ଆଇସୋଲେସନ ସେଣ୍ଟରରେ ଥିବା ବେଡ ଉପରେ ବସି ଗପସପ କରୁଥିବା ଦୃଶ୍ୟ ଏବଂ ବାହାରେ ବସି ମଦ ପିଉଥିବା ଦୃଶ୍ୟ ସୋସିଆଲ ମିଡିଆରେ ଭାଇରାଲ ହୋଇଥିଲା । ଏନେଇ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିଛି ଜିଲ୍ଲା ପ୍ରଶାସନ । କର୍ତ୍ତବ୍ୟରେ ଅବହେଳା ଓ ସାମାଜିକ ଦୂରତ୍ବ ନ ରଖିବା ଉଲ୍ଲଘଂନ ନେଇ କୃଷ୍ଣପ୍ରସାଦ ବ୍ଲକର ପିଇଓ ସୌମ୍ୟ ରଞ୍ଜନ ବେହେରାଙ୍କୁ ସସପେଣ୍ଡ ସହ ଜିଆରଏସ ଥିବା ମୁକେଶ କୁମାର ଜେନା କାର୍ଯ୍ୟଙ୍କୁ ବହିଷ୍କାର, ପଞ୍ଚାୟତ ସମିତି ସଦସ୍ୟ ଉତ୍ତମ ତରେଇକୁ ବହିଷ୍କାର କରାଯାଇଛି ।
ସେହିପରି ଉକ୍ତ ଆଇସୋଲେସନ ସେଣ୍ଟରରେ ମଦ ପିଇବା ଅଭିଯୋଗରେ କାଳୁ ଜେନା, ଧୀର ପଲେଇ ଓ ଉତ୍ତମ ତରେଇକୁ ଗିରଫ କରାଯାଇଛି । କୃଷ୍ଣ ପ୍ରସାଦ ଥାନାରେ ତହସିଲଦାରଙ୍କ ପକ୍ଷରୁ ଏତଲା ଦିଆଯାଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
