ପୁରୀ: କୋରୋନା ପାଇଁ ସାରା ଦେଶ ଲକଡାଉନ । କେନ୍ଦ୍ର ସରକାରଙ୍କ ତୃତୀୟ ପର୍ଯ୍ୟାୟ ଲକଡାଉନ ଗାଇଡ଼ ଲାଇନ ଅନୁଯାୟୀ ପୁରୀ ଜିଲ୍ଲା ଗ୍ରୀନଜୋନରେ ରହିଛି । ତେବେ ଗ୍ରୀନ ଜୋନରେ କେନ୍ଦ୍ର ସରକାର ଲୋକଙ୍କ ପାଇଁ କେତେକ କଟକଣା କୋହଳ କରିଛନ୍ତି। ତେବେ ପୁରୀ ସହରରେ କେଉଁ ଦୋକାନ ଖୋଲିବ ଓ କେଉଁ ଅନୁଷ୍ଠାନ ବନ୍ଦ ରହିବ ସେ ନେଇ ପୁରୀ ଜିଲ୍ଲାପାଳ ବଲବନ୍ତ ସିଂ ସୂଚନା ଦେଇଛନ୍ତି।
କଟକଣା ଅନୁଯାୟୀ ସ୍କୁଲ , କଲେଜ , ଟ୍ରେନିଂ ଇନଷ୍ଟିଚ୍ୟୁଟ , ହୋଟେଲ , ସପିଙ୍ଗମଲ , ସିନେମା ହଲ , ସ୍ଵିମିଙ୍ଗପୁଲ , ବାର ଆଦି ବନ୍ଦ ରହିବ। ଅନ୍ୟ ସବୁ ଦୋକାନ ଖୋଲା ରହିବ। ତେବେ ସନ୍ଧ୍ୟା 7 ଟା ରୁ ସକାଳ 7ଟା ଯାଏ ଘରୁ ବାହାରିବା ଉପରେ କଟକଣା ରହିବ । କେବଳ ମେଡ଼ିକାଲ ସମ୍ପର୍କିତ କାର୍ଯ୍ୟ ପାଇଁ ଲୋକ ମାନେ ଘରୁ ବାହାରି ପାରିବେ। ସେହିପରି 65 ବର୍ଷରୁ ଅଧିକ ବୟସ୍କ ବ୍ୟକ୍ତି , 10 ବର୍ଷ ରୁ କମ ବୟସ ପିଲା , ଗର୍ଭବତୀ ମହିଳା ଏହି ଗ୍ରୀନ ଜୋନରେ ମଧ୍ୟ ଘରୁ ବାହାରିବା ଉପରେ କଟକଣା ରହିଛି। କେବଳ ଜରୁରୀ ପଡିଲେ ଘରୁ ବାହାରି ବାକୁ ଜିଲ୍ଲାପାଳ ପରାମର୍ଶ ଦେଇଛନ୍ତି।
ସମସ୍ତ ରାଜନୈତିକ , ସାମାଜିକ , ଧାର୍ମିକ ସଭା ମିଟିଂ ଉପରେ କଟକଣା । ସର୍ବସାଧାରଣରେ 5ରୁ ଅଧିକ ଏକାଠି ହୋଇପାରିବେ ନାହିଁ। ନିୟମ ଉଲ୍ଲଂଘନ କଲେ ଜୋରିମାନା ଦେବାକୁ ପଡିବ। ସେହିପରି ଏହି ଗ୍ରୀନ ଜୋନରେ କୌଣସି ବିବାହ କାର୍ଯ୍ୟରେ କେନ୍ଦ୍ର ସରକାରଙ୍କ ଗାଇଡ଼ ଲାଇନ ଅନୁଯାୟୀ 50 ଜଣ ,ଦାହ ଓ ଅନ୍ତିମ ସଂସ୍କାର କାର୍ଯ୍ୟରେ 20 ଜଣ ଉପସ୍ଥିତ ରହିପାରିବେ। ଘରୁ ବାହାରିଲେ ମୁହଁରେ ମାସ୍କ ପିନ୍ଧିବା ବାଧ୍ୟତାମୂଳକ କରାଯାଇଛି। ତେବେ ପୁରୀ ଜିଲ୍ଲାବାସୀ ଲକଡାଉନ ନିୟମକୁ ସଠିକ ଭାବରେ ପାଳନ କରୁଥିବା ହେତୁ ସେମାନଙ୍କୁ ଧନ୍ୟବାଦ ଦେଇଛନ୍ତି ପୁରୀ ଜିଲ୍ଲାପାଳ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
