ପୁରୀ: ଏବେ ସମୟ ବିଶ୍ବକୁ ପ୍ରଦୂଷଣ ମୁକ୍ତ ସବୁଜ ବନାନୀ କରିବାର । କାରଣ ସ୍ବଚ୍ଛ ପରିବେଶ ସୁସ୍ଥ ଶରୀର । କେବଳ ଜଣେ ନୁହେଁ ଏହି ଦୃଢ ଲକ୍ଷ୍ୟ ନେଇ ସମସ୍ତେ ପରିବେଶକୁ ସ୍ବଚ୍ଛ କରିବା ପାଇଁ ଶପଥ ନେବାକୁ ପଡିବ । ଏହି ବାର୍ତ୍ତା ନେଇ ସୋମବାର କୋଣାର୍କ ସୂର୍ଯ୍ୟ ମନ୍ଦିର ସମ୍ମୁଖରୁ ଆରମ୍ଭ ହୋଇଛି ସବୁଜ ଓ ପ୍ରଦୂଷଣ ମୁକ୍ତ ବିଶ୍ବ ଅଭିଯାନ ।
ଏଥିରେ ଅତିଥି ଭାବେ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାସ ଯୋଗ ଦେଇ ସବୁଜ ପତାକା ଦେଖାଇ ଏହାର ଶୁଭାରମ୍ଭ କରିଛନ୍ତି। ଜଳ ବାୟୁ ପ୍ରଦୂଷଣ ସାରା ବିଶ୍ବରେ ମୁଖ୍ୟ ସମସ୍ୟା ଭାବେ ମୁଣ୍ଡ ଟେକିଛି । ଆମ ଉତ୍ତର ପିଢ଼ୀଙ୍କ ପାଇଁ ଏହା ଶୁଭଙ୍କର ନୁହେଁ । ଏଥିପାଇଁ ସମସ୍ତେ ମିଳିମିଶି ପରିବେଶକୁ ପ୍ରଦୂଷଣ ମୁକ୍ତ କରିବା ବୋଲି ଆହ୍ବାନ ଦେଇଛନ୍ତି ମନ୍ତ୍ରୀ ।
ପ୍ରେରଣା ଇଣ୍ଟରନ୍ୟାସନାଲ ଗ୍ରୀନ ଆର୍ମି ପକ୍ଷରୁ ଆୟୋଜିତ ଏହି ଅଭିଯାନରେ ଛାତ୍ର ଛାତ୍ରୀ , ଯୁବ ଗୋଷ୍ଠୀ , ମହିଳା ଏସ ଏଚ ଜି , ବୁଦ୍ଧିଜୀବୀ , ପରିବେଶବିତ ପ୍ରମୁଖ 5 ଶହରୁ ଅଧିକ ସାମିଲ ହୋଇଛନ୍ତି। ସୁର୍ଯ୍ୟ ମନ୍ଦିର ସମ୍ମୁଖରୁ ଏକ ଶୋଭା ଯାତ୍ରା ବାହାରି ବଜାର ପରିକ୍ରମା କରିଥିଲା। ପରେ ଚନ୍ଦ୍ରଭାଗା ବେଳାଭୂମି ସଫେଇ, ବାଲୁଖଣ୍ଡ ଅଭୟାରଣ୍ୟ ନିକଟରେ ବୃକ୍ଷ ରୋପଣ କରାଯାଇଛି। ବ୍ୟାପକ ବୃକ୍ଷରୋପଣ ଦ୍ବାରା ହିଁ ଏ ପୃଥିବୀରୁ ଗ୍ଲୋବାଲ ୱାର୍ମିଙ୍ଗ ଓ ବିଭିନ୍ନ ପ୍ରାକୃତିକ ବିପର୍ଯ୍ୟୟ ରକ୍ଷା କରାଯାଇ ପାରିବ ବୋଲି ଏହି କାର୍ଯ୍ୟକ୍ରମ ଦ୍ବାରା ବିଶ୍ବକୁ ବାର୍ତ୍ତା ଦିଆଯାଇଥିଲା।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
