ପୁରୀ: ଆଗାମୀ କିଛି ବର୍ଷ ଭିତରେ ବିଶ୍ବପ୍ରସିଦ୍ଧ ରଥଯାତ୍ରା ପାଇଁ ହେଉଥିବା ରଥ ନିର୍ମାଣ ପାଇଁ କାଠ ସଙ୍କଟ ଉପୁଜିବା ଆଶଙ୍କା ରହିଛି । ବିଶେଷ କରି ରଥ ନିର୍ମାଣ ପାଇଁ ଆବଶ୍ୟକ ଥିବା ଫାଶୀ, ଧଉରା କାଠ ଅଭାବ ପରିଲିକ୍ଷିତ ହେଲାଣି । ଏଣୁ ଆଗାମୀ ଦିନରେ କିଭଳି ଏହି କାଠ ସଙ୍କଟକୁ ମୁକାବିଲା କରିହେବ ସେ ନେଇ ଏକ ସମୀକ୍ଷା ବୈଠକ ବସିଛି । ପୁରୀ ସର୍କିଟ ହାଉସରେ କେନ୍ଦ୍ରାଞ୍ଚଳ ଆରଡିସି ସୁରେଶ ଚନ୍ଦ୍ର ଦଳାଇଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଛି ଏହି ଗୁରୁତ୍ବପୂର୍ଣ୍ଣ ବୈଠକ ।
ଚଳିତ ବର୍ଷ କେତେ କାଠ ଦରକାର ଓ କେତେ କାଠ ଅଛି ରଥ ନିର୍ମାଣ ପାଇଁ ତାହା ମଧ୍ୟ ଆରଡିସି ସମୀକ୍ଷା କରିଛନ୍ତି । ଚଳିତ ବର୍ଷ କାଠକୁ ନେଇ କୌଣସି ଅସୁବିଧା ନାହିଁ । ଶ୍ରୀମନ୍ଦିର ପ୍ରଶାସନ ନିକଟରେ ଅଧିକ କାଠ ମହଜୁଦ ଥିବା ଆରଡିସି ସୂଚନା ଦେଇଛନ୍ତି । ତେବେ ଆଗାମୀ ଦିନରେ ରଥ ନିର୍ମାଣ ନେଇ ରଥ କାଠ ସମସ୍ୟା ଯେଭଳି ସୃଷ୍ଟି ନ ହୁଏ ସେ ଦିଗରେ ସ୍ଵତନ୍ତ୍ର ପଦକ୍ଷେପ ନିଆଯାଉଥିବା କେନ୍ଦ୍ରାଞ୍ଚଳ ଆରଡିସି କହିଛନ୍ତି । ବିଶେଷ କରି ଓଡ଼ିଶାର କେଉଁ ଅଞ୍ଚଳରେ ରଥ କାଠ ପାଇଁ ଦରକାର ହେଉଥିବା ଫାଶୀ, ଧଉରା କାଠ କେତେ ପରିମାଣର ଅଛି, ଏହା କେତେ ବର୍ଷ ଯାଏଁ ରଥ ନିର୍ମାଣ ନେଇ କାର୍ଯ୍ୟରେ ଲାଗି ପାରିବ, କେଉଁ ବନ ଖଣ୍ଡ ଅଧୀନରେ କେତେ କାଠ ରହିଛି ତାର ଏକ ଡାଟାବେସ ପ୍ରସ୍ତୁତ କରାଯାଉଅଛି ବୋଲି କେନ୍ଦ୍ରାଞ୍ଚଳ ଆରଡିସି ସୂଚନା ଦେଇଛନ୍ତି ।
ଏହା ବି ପଢନ୍ତୁ- Puri Fire Incident: ମହାପ୍ରଭୁଙ୍କ ଜମିରେ ମାର୍କେଟ କମ୍ପ୍ଲେକ୍ସ, ଖୁବଶୀଘ୍ର କରାଯିବ ଉଚ୍ଛେଦ