ପୁରୀ: ରଥଯାତ୍ରା ଦିନ ଛାତ ଉପରେ ଠିଆ ହୋଇ ଭକ୍ତ ରଥଯାତ୍ରା ଦେଖି ଥିବା ଅଭିଯୋଗକୁ ନେଇ ଜିଲ୍ଲା ପ୍ରଶାସନ ପକ୍ଷରୁ କାର୍ଯ୍ୟାନୁଷ୍ଠାନ ଜାରି ରହିଛି । ବଡ଼ଦାଣ୍ଡର ମାଉସୀ ମା ମନ୍ଦିର ନିକଟରେ ଥିବା ଅକ୍ଷୟ ପାତ୍ର ଫାଉଣ୍ଡେସନକୁ ପୁରୀ ଜିଲ୍ଲା ପ୍ରଶାସନ ସିଲ କରିଥିବା ଜଣାପଡିଛି । ପୁରୀ ଉପଜିଲ୍ଲାପାଳ ଓ ତହସିଲଦାର ଉଭୟଙ୍କ ଉପସ୍ଥିତିରେ ଏହି ସିଲ କରାଯାଇଛି ।
ଅଭିଯୋଗ ଅନୁଯାୟୀ ରଥଯାତ୍ରା ସମୟରେ ବଡଦାଣ୍ଡର ଉଭୟ ପାର୍ଶ୍ବରେ ଥିବା ଅଟ୍ଟାଳିକାର ଛାତ କମ୍ବା ବାଲକୋନିରେ ଛିଡା ହୋଇ ରଥଯାତ୍ରା ଦେଖିବା ଉପରେ କଟକଣା ଜାରି କରିଥିଲା ଜିଲ୍ଲା ପ୍ରଶାସନ । ତେବେ କିଛି ଭକ୍ତ ଅକ୍ଷୟ ପାତ୍ର ଫାଉଣ୍ଡେସନ ବିଲ୍ଡିଂର ଛାତ ଓ ବାଲକୋନିରେ ଠିଆ ହୋଇ ରଥଯାତ୍ରା ଦେଖିଥିଲେ । ଏନେଇ କିଛି ଫଟୋ ମଧ୍ୟ ସୋସିଆଲ ମିଡିଆରେ ଭାଇରାଲ ହୋଇଥିଲା । ତେବେ ଅଭିଯୋଗର ପ୍ରମାଣ ମିଳିବା ପରେ ଉକ୍ତ ସଂସ୍ଥାକୁ ସିଲ କରାଯାଇଛି । ସେପଟେ ଗତକାଲି ବଡ଼ଦାଣ୍ଡର ବଳଗଣ୍ଡି ଛକରେ ଥିବା ଗଙ୍ଗା ଲଜକୁ ମଧ୍ୟ ଏହି ସମାନ ଅଭିଯୋଗ ନେଇ ସିଲ କରାଯାଇଥିଲା ।
ପୁରୀରୁ ଶକ୍ତି ପ୍ରସାଦ ମିଶ୍ର , ଇଟିଭି ଭାରତ
