ପୁରୀ: ପୋଲିସ ପୁଣି ଏକ ବଡ଼ ବାଇକ ଚୋର ଗ୍ୟାଙ୍ଗକୁ ଧରିଛି। 25ଟି ବାଇକ ଜବତ ସହ 4 ଅଭିଯୁକ୍ତଙ୍କୁ ପୋଲିସ ଗିରଫ କରିଛି। ତେବେ ଅନ୍ୟ 4 ଜଣ ଅଭିଯୁକ୍ତ ଫେରାର ଥିବାରୁ ତାଙ୍କୁ ଧରିବା ପାଇଁ ପୋଲିସ ଅଭିଯାନ ଜାରି ରଖିଛି।
ପୁରୀ ଏସପି ଅଖିଳେଶ୍ବର ସିଂଙ୍କ ସୂଚନା ଅନୁଯାୟୀ, ଏକ ସୂଚନା ପାଇ ଡେଲାଙ୍ଗ ପୋଲିସ ସ୍ଥାନୀୟ ଅଞ୍ଚଳ ବେଗୁନିଆପଡାର ଟୁକୁନା ବେହେରା ଘର ଉପରେ ଚଢ଼ାଉ କରିଥିଲା। ସେଠରେ 4ଟି ଚୋରା ବାଇକ ପୋଲିସ ଜବତ କରିଥିଲା। ତେବେ ପରେ ପୋଲିସ ତଦନ୍ତ କରି ଟୁକୁନା ବେହେରା ଓ ତା'ର 3ସାଥିମାନଙ୍କ ଠାରୁ 25ଟି ବାଇକ ଜବତ କରିଥିଲା। ପୁରୀ ଏସପିଙ୍କ ନିର୍ଦ୍ଦେଶକ୍ରମେ ଏକ ସ୍ବତନ୍ତ୍ର ଟିମ ଏହାର ତଦନ୍ତ କରୁଥିଲା।
ତେବେ ସୂଚନାନୁଯାୟୀ, ଅଭିଯୁକ୍ତ ଟୁକୁନା ଓ ତାର ସାଥିମାନେ ଏକ ଗ୍ୟାଙ୍ଗ କରି ପୁରୀ, କଟକ, ଭୁବନେଶ୍ବର , ଖୋର୍ଦ୍ଧା , ଗଞ୍ଜାମ, ନୟାଗଡ଼ ଆଦି ଅଞ୍ଚଳରୁ ବାଇକ ଚୋରି କରିଥାନ୍ତି। ତେବେ ମୁଖ୍ୟ ଅଭିଯୁକ୍ତ ଟୁକୁନା ବେହେରା ଗିରଫ ପରେ ଫେରାର 4ଜଣ ଅଭିଯୁକ୍ତଙ୍କୁ ଧରିବା ପାଇଁ ପୁରୀ ପୋଲିସ ଜୋରଦାର ଅଭିଯାନ ଜାରି ରଖିଛି । ପୁରୀ ଏସପି ଭାବେ ଅଖିଳେଶ୍ବର ସିଂ ଗତ କିଛିଦିନ ହେବ ପୁରୀରେ ନୂତନ ଏସପି ଭାବେ ଯୋଗଦେବା ପରେ ବିଭିନ୍ନ ଅପରାଧିଙ୍କ ଉପରେ ଚଢାଉ ଜୋରଦାର ହୋଇଛି। ଯାହାକୁ ନେଇ ବିଭିନ୍ନ ମହଲରେ ପ୍ରଶଂସା କରାଯାଇଛି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
