ପୁରୀ: ପୁରୀ ସହରରେ ରାତିଅଧିଆ ଏନକାଉଣ୍ଟର । ପୋଲିସ ଗୁଳିରେ ଦୁର୍ଦ୍ଦାନ୍ତ ଅପରାଧୀ ଦିବାନା ବେହେରା ଗୁରୁତର ଆହତ ହୋଇଛି । ଦିବାନାର ଡାହାଣ ଗୋଡ ଆଣ୍ଠୁରେ ବାଜିଛି ଗୁଳି । ତାକୁ ପ୍ରଥମେ ଜିଲ୍ଲା ମୁଖ୍ୟ ଚିକିତ୍ସାଳୟ ପରେ କଟକ ବଡମେଡିକାଲରେ ଭର୍ତ୍ତି କରାଯାଇଛି । ଦିବାନା ନାମରେ ବିଭିନ୍ନ ଥାନାରେ ବହୁ ଅପରାଧିକ ମାମଲା ରହିଛି ।
ଗତ ଶନିବାର ବିଶ୍ବସ୍ତ ସୂତ୍ରରୁ ଖବର ପାଇ ଦିବାନାକୁ ଗିରଫ କରିବାକୁ ଯୋଜନା କରିଥିଲା ପୋଲିସ । ଏଥିପାଇଁ କୁମ୍ଭାରପଡ଼ା ଓ ବାସେଲିସାହି ଥାନା ପକ୍ଷରୁ ମିଳିତ ଚଢ଼ାଉ କରାଯାଇଥିଲା । ହେଲେ ସେ ସରେଣ୍ଡର କରିବା ପରିବର୍ତ୍ତେ ପୋଲିସ ଉପରକୁ ଗୁଳି ଚଳାଇ ଥିଲା । ପରେ ପୋଲିସ ପାଲଟା ଜବାବ ଦେଇଥିଲା ।
ତେବେ ତା ନିକଟରୁ ଗୋଟିଏ ବନ୍ଧୁକ, ଗୋଟିଏ ଜୀବନ୍ତ ଗୁଳି, ଗୋଟିଏ ମାଗାଜିନ ଓ ଗୋଟିଏ ବାଇକ ଜବତ କରିଛି ପୋଲିସ । ଆଗକୁ ଅପରେସନ ଆହୁରି ଜୋରଦାର କରାଯାଇ ଅପରାଧୀଙ୍କୁ କାବୁ କରାଯିବ ବୋଲି ପୁରୀ ଏସପି ସୂଚନା ଦେଇଛନ୍ତି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
