ବ୍ରହ୍ମଗିରି: ସିଆରା ଗ୍ରାମ ନିକଟରେ ଥିବା ଚିଙ୍ଗୁଡ଼ି ଘେରିକୁ କେନ୍ଦ୍ରକରି ଦୁଇ ଗୋଷ୍ଠୀ ମୁହାଁମୁହିଁ ପରେ ବୋମା ମାଡ଼ । ଏଥିରେ ଦୁଇଟି ଚିଙ୍ଗୁଡି ଘେରି ଭାଙ୍ଗି ଯାଇଥିବା ବେଳେ ଜଣେ ଆହତ ହୋଇଥିବା ସୂଚନା ମିଳିଛି । ଘଟଣା ସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିବା ସହିତ ୨ ଜଣଙ୍କୁ ଅଟକ ରଖିଥିବା ଜଣାପଡିଛି ।
ସୂଚନା ଅନୁସାରେ, ପୁରୀ ଜିଲ୍ଲା ବ୍ରହ୍ମଗିରି ଥାନା ଅନ୍ତର୍ଗତ ସିଆରା ଗ୍ରାମ ନିକଟରେ ଏକ ଚିଙ୍ଗୁଡି ଘେରି ରହିଛି । ଏହା ଗ୍ରାମର ୧୯ ଜଣ ପରିବାରଙ୍କ ନାମରେ ରହିଛି । ତେବେ ସେମାନଙ୍କ ମଧ୍ୟରୁ ୫ ପାରିବାର ଘେରିକୁ ଯାଇ ଚାଷ ପାଇଁ ପ୍ରସ୍ତୁତି କରିଥିଲେ । ତାହାକୁ ୧୩ ପାରିବାର ବିରୋଧ କରିବାରୁ ମୁହାଁମୁହିଁ ପରିସ୍ଥିତି ସୃଷ୍ଟି ହୋଇଥିଲା । ପରବର୍ତ୍ତୀ ସମୟରେ ଉକ୍ତ ୧୩ ପରିବାରର ଲୋକଙ୍କ ଦ୍ବାରା ବୋମାମାଡ଼ ହୋଇଥିବା ଅଭିଯୋଗ ହୋଇଛି । ତେବେ ବୋମାମାଡ଼ ଫଳରେ ଦୁଇଟି ଚିଙ୍ଗୁଡି ଘେରି ଭାଙ୍ଗି ଯାଇଥିବା ବେଳେ ସୁମନ୍ତ ପ୍ରଧାନ ନାମକ ବ୍ୟକ୍ତି ଆହତ ହୋଇଛନ୍ତି । ଏହି ଘଟଣା ପରେ ଗାଁର ତାଟି କବାଟ ପଡିଯାଇଛି । ଶାନ୍ତି ରକ୍ଷା ପାଇଁ ଗ୍ରାମରେ ପୋଲିସ ମୁତୟନ ହୋଇଛନ୍ତି ।
ଇଟିଭି ଭାରତ, ବ୍ରହ୍ମଗିରି
