ପୁରୀ: ପଞ୍ଚଭୂତରେ ଲୀନ ହେଲେ ଯୁଧିଷ୍ଠିର । ପିପିଲିର ପୂର୍ବତନ ବିଧାୟକ ଯୁଧିଷ୍ଠିର ସାମନ୍ତରାୟଙ୍କ ଶେଷକୃତ୍ୟ ସଂପନ୍ନ ହୋଇଛି । ପୁରୀ ସ୍ଵର୍ଗଦ୍ଵାରରେ ସ୍ବର୍ଗତ ଯୁଧିଷ୍ଠିରଙ୍କ ଶେଷକୃତ୍ୟ ସଂପନ୍ନ ହୋଇଛି । ଯୁଧିଷ୍ଠିରଙ୍କ ପୁଅ ପ୍ରୀୟବତ ସାମନ୍ତରାୟ ମୁଖାଗ୍ନି ଦେଇଥିଲେ । ଯୁଧିଷ୍ଠିରଙ୍କ ଶେଷ ଦର୍ଶନ ପାଇଁ ସ୍ଵର୍ଗଦ୍ଵାରରେ ପିପିଲି ଓ ଡେଲାଙ୍ଗ ଅଞ୍ଚଳର ଶହଶହ ଲୋକଙ୍କ ଭିଡ ହୋଇଥିଲା । ସମସ୍ତେ ଯୁଧିଷ୍ଠିରଙ୍କୁ ଅଶ୍ରୁଳ ବିଦାୟ ଦେଇଥିଲେ । ପୁରୀକୁ ଯୁଧିଷ୍ଠିରଙ୍କ ପାର୍ଥିବ ଶରୀର ଅଣାଯିବା ପୂର୍ବରୁ ପିପିଲିରେ ଶ୍ରଦ୍ଧାଞ୍ଜଳି ଦିଆଯାଇଥିଲା ।
ପିପିଲିରେ ପାର୍ଥିବ ଶରୀର ପହଞ୍ଚିବା ପରେ ବିଜେଡି କାର୍ଯ୍ୟାଳୟ ଠାରେ ଶତାଧିକ ବିଜେଡି କର୍ମୀ ଶ୍ରଦ୍ଧାଞ୍ଜଳି ଜ୍ଞାପନ କରିଥଲେ । ସେହିପରି ପିପିଲି ବିଜେପି କାର୍ଯ୍ୟାଳୟ ଠାରେ ମଧ୍ୟ ବିଜେପି କର୍ମୀମାନେ ଯୁଧିଷ୍ଠିରଙ୍କ ପାର୍ଥିବ ଶରୀରକୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ । ପରେ ପିପିଲି ବଜାରରେ ବିଭିନ୍ନ ସ୍ଥାନରେ ଯୁଧିଷ୍ଠିରଙ୍କୁ ଶେଷ ଦର୍ଶନ କରି ଶ୍ରଦ୍ଧାଞ୍ଜଳି ଅର୍ପଣ କରି ପିପିଲିବାସୀ । କେବଳ ବିଜେଡି ଓ ବିଜେପି ନୁହେଁ ପିପିଲି ହାଟ ଛକ ସ୍ଥିତ କଂଗ୍ରେସ କାର୍ଯ୍ୟଳୟରେ ମଧ୍ୟ କଂଗ୍ରେସ କର୍ମୀମାନେ ଯୁଧିଷ୍ଠିରଙ୍କୁ ଶେଷ ଦର୍ଶନ କରିଥିଲେ । ନିଜ ଗାଁ ମାଧିପୁର ଅଭିମୁଖେ ପାର୍ଥିବ ଶରୀର ଯିବା ସମୟରେ ପିପିଲି କଲେଜ ଛାତ୍ରଛାତ୍ରୀ, ଅଧ୍ୟାପକ ଓ ଅଧ୍ୟାପିକାମାନେ ଯୁଧିଷ୍ଠିରଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ ।
ଏହା ମଧ୍ୟ ପଢ଼ନ୍ତୁ....ପିପିଲିର ପୂର୍ବତନ ବିଧାୟକ ଯୁଧିଷ୍ଠିର ସାମନ୍ତରାୟଙ୍କ ପରଲୋକ, ମୁଖ୍ୟମନ୍ତ୍ରୀଙ୍କ ଶୋକ
ଯୁଧିଷ୍ଠିର କଂଗ୍ରେସ ବିଧାୟକ ଥିବା ସମୟରେ ପିପିଲିରେ ଅନେକ ବିକାଶ ମୂଳକ କାର୍ଯ୍ୟ କରିଥିଲେ । ଯୁଧିଷ୍ଠିରଙ୍କ ବିୟୋଗରେ ସ୍ତବ୍ଧ ହୋଇ ଯାଇଛି ପିପିଲି । ସେପଟେ ଯୁଧିଷ୍ଠିରଙ୍କ ବିୟୋଗରେ ପିପିଲି ବିଧାୟକ ରୁଦ୍ର ପ୍ରତାପ ମହାରଥୀ ଓ ବାଙ୍କୀ ବିଧାୟକ ଦେବୀ ରଂଜନ ତ୍ରିପାଠୀ ଶୋକବ୍ୟକ୍ତ କରିଛନ୍ତି । 73 ବର୍ଷ ବୟସରେ ଭୁବନେଶ୍ଵରରେ ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ପରଲୋକ ହୋଇଛି । ସ୍ବର୍ଗତ ଯୁଧିଷ୍ଠିର ସାମନ୍ତରାୟ 1995 ରୁ 2000 ମସିହା ପର୍ଯ୍ୟନ୍ତ କଂଗ୍ରେସ ଦଳର ବିଧାୟକ ଥିଲେ । ସେହିପରି 1984 ରୁ 1990 ପର୍ଯ୍ୟନ୍ତ ଯୁଧିଷ୍ଠିର ପିପିଲି ଏନଏନସି ଅଧ୍ୟକ୍ଷ ଥିଲେ । ତେବେ ଗତ କିଛିବର୍ଷ ହେବ ସେ ଅସୁସ୍ଥ ଥିବା ବେଳେ ଆଜି ସକାଳୁ ତାଙ୍କର ଦେହାନ୍ତ ହୋଇଛି । ତାଙ୍କ ପରଲୋକରେ ପିପିଲିରେ ଶୋକର ଛାୟା ଖେଳିଯାଇଛି । ଶୁଭେଚ୍ଛୁ , ବନ୍ଧୁ ପରିଜନମାନେ ସ୍ବର୍ଗତ ଯୁଧିଷ୍ଠିର ସାମନ୍ତରାୟଙ୍କୁ ଶେଷ ଦର୍ଶନ କରି ଅଶ୍ରୁଳ ଶ୍ରଦ୍ଧାଞ୍ଜଳି ଦେଇଛନ୍ତି ।
ଇଟିଭି ଭାରତ, ପୁରୀ
