ପୁରୀ: ସାରା ବିଶ୍ବକୁ କବଳିତ କରିଛି କୋରୋନା । ସଂକ୍ରମଣ ବ୍ୟାପୁ ଥିବାରୁ ଘରୁ ବାହାରିବା ମୁସ୍କିଲ ହୋଇଯାଇଛି । ଏପଟେ ଘରେ ବସି ବସି ବିରକ୍ତି ପ୍ରକାଶ କରୁଛନ୍ତି ସାଧାରଣ ଜନତା । ହେଲେ ଘରେ ବସି ସୁରକ୍ଷା ପଦକ୍ଷେପ ଗ୍ରହଣ ନକରି ଡାକ୍ତରଖାନାରେ ଦିନ ରାତି କୋରୋନା ଆକ୍ରାନ୍ତଙ୍କ ଚିକିତ୍ସା ଯିଏ କରୁଛି, ତା କଥା କେବେ ଭାବିଛନ୍ତି କି ? ବର୍ତ୍ତମାନ ପରିସ୍ଥିତିକୁ ନଜରରେ ରଖି ପ୍ରବାସୀ ଘର ବାହୁଡୁଥିବା ବେଳେ ଡାକ୍ତର, ନର୍ସ ଓ ଅନ୍ୟ ମେଡିକାଲ କର୍ମଚାରୀମାନେ ଘର ଲୋକଙ୍କଠାରୁ ଦୂରରେ ରହି ନିଜ କର୍ତ୍ତବ୍ୟ ପାଳନରେ ଲାଗିଛନ୍ତି । କୋରୋନାକୁ ଭୟ ନକରି ଆଗଧାଡିରେ ଛିଡା ହୋଇ ଏମାନେ ଜାରି ରଖିଛନ୍ତି ଲଢେଇ । ଯେଉଁଥିପାଇଁ ସମାଜ ଏମାନଙ୍କୁ ‘କୋରୋନା ଯୋଦ୍ଧା’ର ଆଖ୍ୟା ଦେଇଛି ।
ପରିବାର ଲୋକଙ୍କ ସୁରକ୍ଷା କଥା ଭାବି ଏମାନେ ଗତ 5 ମାସ ହେବ ଘରଠାରୁ ଦୂରରେ ଚଳାଇଛନ୍ତି ରୋଗୀ ସେବା । ପୁରୀ ଜିଲ୍ଲାରେ ମଧ୍ୟ ଦେଖିବାକୁ ମିଳିଛି ସମାନ ଅବସ୍ଥା । କୋରୋନା ସଂକ୍ରମଣ ଆରମ୍ଭ ଦିନଠାରୁ ଅବିରତ ନିଜ କାର୍ଯ୍ୟରେ ଲାଗିଛନ୍ତି କୋରୋନା ଯୋଦ୍ଧା । ନୂଆ ନୂଆ ମନରେ ସାମାନ୍ୟ ଡର ଥିଲେ ବି କର୍ତ୍ତବ୍ୟ ଆଗରେ ଡରକୁ ମାରି ଅତି ସୁନ୍ଦର ଭାବେ ନିଜ ଦାୟିତ୍ବ ସମ୍ଭାଳିଛନ୍ତି ଏହି ବୀର ଯୋଦ୍ଧା । କେବଳ ସେତିକି ନୁହେଁ ନିଜେ ମାନସିକ ଭାବେ ସ୍ଥିର ହୋଇ ଅନ୍ୟ ଆକ୍ରାନ୍ତଙ୍କୁ ସୁସ୍ଥ ରହିବା ପାଇଁ ଉତ୍ସାହିତ କରୁଛନ୍ତି ଏହି କୋରୋନା ଯୋଦ୍ଧା ।
ସେପଟେ ଦିନକୁ କିଛି ସମୟ ପାଇଁ ମାସ୍କ ପିନ୍ଧିବା ଆମ ପାଇଁ କଷ୍ଟକର ହୋଇ ପଡିଥିବା ବେଳେ ଦିନକୁ 8 ଘଣ୍ଟା କିମ୍ବା ଆବଶ୍ୟକ ପଡିଲେ ତାଠାରୁ ଅଧିକ ସମୟ ପର୍ଯ୍ୟନ୍ତ ପିପିଇ କିଟ୍ ପିନ୍ଧି ସଂକ୍ରମିତଙ୍କ ସେବା କରୁଛନ୍ତି ଡାକ୍ତର, ନର୍ସ ଓ ମେଜିକାଲ କର୍ମଚାରୀ । ମାସକୁ 14 ଦିନ ଡ୍ୟୁଟି ଓ 14 ଦିନ କ୍ବାରେଣ୍ଟାଇନ । ଏପରି ଭାବେ ବିତି ଚାଲିଛି ଏମାନଙ୍କ ଦିନ । ଏହି ସମୟରେ ଘର କଥା ମନେ ପଡିଲେ ବି ସାହା କେବଳ ଫୋନ କଲ୍ ଓ ଭିଡିଓ କଲ୍ । ପରିବାର ଲୋକେ ମଧ୍ୟ ନିଜ ପ୍ରିୟଜନଙ୍କୁ ଯୋଗାଉଛନ୍ତି ଖୁବ ପ୍ରୋତ୍ସାହନ । ଯେଉଁଥିପାଇଁ ଆଜି ନିଜ ଜୀବନକୁ ଖାତିର ନକରି ରାଜ୍ୟବାସୀଙ୍କ ସେବା ପାଇଁ ଲାଗି ପଡିଛନ୍ତି କୋରୋନା ଯୋଦ୍ଧା ।
ତେବେ ପୁରୀ ଜିଲ୍ଲାରେ କେମିତି ଚାଲିଛି କୋରୋନା ଚିକିତ୍ସା ନଜର ପକାନ୍ତୁ ।
କୋରୋନା ମୁକାବିଲା କରିବା ସରକାରଙ୍କ ପକ୍ଷରୁ ଜିଲ୍ଲାସ୍ତରରେ ହୋଇଛି ବ୍ୟାପକ ବ୍ୟବସ୍ଥା । ପୁରୀ ଜିଲ୍ଲାରେ ଏଥିପାଇଁ ନିଆଯାଇଥିବା ପଦକ୍ଷେପ ନିଶ୍ଚିତ ସ୍ବାଗତଯୋଗ୍ୟ । ବିଶେଷ କରି ଗ୍ରାମାଞ୍ଚଳରୁ ସହରାଞ୍ଚଳ ପର୍ଯ୍ୟନ୍ତ କିଭଳି କୋରୋନା ଆକ୍ରାନ୍ତ ଚିହ୍ନଟ ହେବେ, ଚିକିତ୍ସା ହେବେ ସେନେଇ ପୁରୀ ଜିଲ୍ଲା ପ୍ରଶାସନ ବ୍ୟାପକ ବ୍ୟବସ୍ଥା ଗ୍ରହଣ କରିଛି । ସୂଚନା ଅନୁଯାୟୀ ପୁରୀ ଜିଲ୍ଲାର 18 ଲକ୍ଷ ଜନସଂଖ୍ୟାକୁ ଦୃଷ୍ଟିରେ ରଖାଯାଇ ଗ୍ରାମପଞ୍ଚାୟତସ୍ତରରେ 267ଟି କୋଭିଡ କେୟାର ହୋମରେ 2787ଟି ବେଡ଼ର ବ୍ୟବସ୍ଥା କରାଯାଇଛି । ସେହିପରି ବ୍ଲକସ୍ତରରେ 9 ଟି କୋଭିଡ କେୟାର ସେଣ୍ଟରରେ 912ଟି ବେଡ଼ ଓ ଜିଲ୍ଲା ହେଡ କ୍ବାର୍ଟରରେ ଗୋପବନ୍ଧୁ ଆୟୁର୍ବେଦ ମହାବିଦ୍ୟାଳୟ, ସ୍ବତନ୍ତ୍ର କଲେରା ହସ୍ପିଟାଲକୁ ମିଶାଇ 2ଟି କୋଭିଡ ହେଲଥ ସେଣ୍ଟରରେ 100ଟି ବେଡ଼ର ବ୍ୟବସ୍ଥା କରାଯାଇଛି ।
ପ୍ରତି ବ୍ଲକସ୍ତରରେ ସ୍ବତନ୍ତ୍ର ଟିମ ମାଧ୍ୟମରେ ଟେଷ୍ଟିଂ କରାଯାଉଥିବା ବେଳେ ଆକ୍ରାନ୍ତଙ୍କୁ ଏହି କୋଭିଡ ସେଣ୍ଟର ଗୁଡ଼ିକରେ ଚିକିତ୍ସା କରାଯାଉଛି । ସେହିପରି 20 ବେଡ଼ ଥିବା ଏକ ଆଇସିୟୁର ବ୍ୟବସ୍ଥା ମଧ୍ୟ ହୋଇଛି । ସେହିପରି ବିଭିନ୍ନ ଘରୋଇ ଅନୁଷ୍ଠାନକୁ କୋଭିଡ କେୟାର ସେଣ୍ଟର କରି ଆକ୍ରାନ୍ତଙ୍କୁ ଚିକିତ୍ସା ପାଇଁ ବ୍ୟବସ୍ଥା ମଧ୍ୟ କରାଯାଇଛି । ଏହା ଦ୍ବାରା ସ୍ବାସ୍ଥ୍ୟ ବିଭାଗ ଉପରେ ଚିକିତ୍ସା ପାଇଁ ଅତିରିକ୍ତ ଚାପ ପଡିବନି ।
ତେବେ ପୁରୀରେ ଅଧିକରୁ ଅଧିକ ଟେଷ୍ଟିଂ ଓ କଣ୍ଟାକ୍ଟ ଟ୍ରେସିଂ ସହ ଚିକିତ୍ସା ସେବା ଯୋଗାଇ ଦେବା ନେଇ ଜିଲ୍ଲାପାଳ ବଲଓ୍ବନ୍ତ ସିଂ ନିଜେ ପ୍ରତିଦିନ ବୈଠକ କରି ସ୍ଥିତି ସମୀକ୍ଷା କରୁଛନ୍ତି । ଫଳରେ ପୁରୀ ଜିଲ୍ଲାରେ କୋରୋନା ମୁକାବିଲା ପରିଚଳନା ବେଶ ଭଲ ରହିଥିବା ଅନୁମାନ କରାଯାଉଛି । ସେହିପରି ମାସ୍କ ପିନ୍ଧିବା, ସାମାଜିକ ଦୂରତ୍ବ ବଜାୟ ରଖିବା ନେଇ ମଧ୍ୟ ପ୍ରଶାସନ ପକ୍ଷରୁ ଘରକୁ ଘର ବୁଲି ସଚେତନତା କାର୍ଯ୍ୟକ୍ରମ କରାଯାଉଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
