ପୁରୀ: ଲକଡାଉନକୁ ନେଇ ସଂପୂର୍ଣ୍ଣ ସହର ବନ୍ଦ ରହିଛି । ସବୁ ହୋଟେଲ ମଧ୍ୟ ବନ୍ଦ ରହିଛି । ଆଉ ଏହାର ପ୍ରଭାବ ସିଧାସଳଖ ପଡିଛି ନିରାଶ୍ରୟ ଲୋକ ଏବଂ ମାନସିକ ବିକୃତ ଲୋକଙ୍କ ଉପରେ । ହୋଟେଲ ଖୋଲି ଥିବା ବେଳେ ଏହି ନିରାଶ୍ରୟ ବ୍ୟକ୍ତି ଅବା ମାନସିକ ବିକୃତ ମାନଙ୍କୁ ହୋଟେଲ ବ୍ୟବସାୟୀ ମାନେ ପ୍ରତିଦିନ ଖାଇବାକୁ ଦେଇଥାନ୍ତି। ଏହି ଭଳି ରାସ୍ତା କଡରେ ପଡି ରହି ଜୀବନ ବିତାନ୍ତି ।
ମହାମାରୀ କୋରୋନା ଯୋଗୁଁ ଲକଡାଉନ ପରେ ହୋଟେଲ ବନ୍ଦ ଯୋଗୁ ଏହି ନିରାଶ୍ରୟ ଗରିବ ଲୋକ ଏବଂ ମାନସିକ ବିକୃତ ମାନେ ପେଟକୁ ଗଣ୍ଡେ ଦାନା ପାଉନାହାନ୍ତି ଏବଂ ଭୋକ ଉପାସରେ ରାସ୍ତାରେ ପଡି ରହିଛନ୍ତି । ଅନେକ ଜାଗାରେ ସରକାର ଏମାନଙ୍କ ରହିବା ଖାଇବା ବ୍ୟବସ୍ଥା କରିଥିଲେ ମଧ୍ୟ ଅନେକ ସେଠାକୁ ବିଭିନ୍ନ ପରିସ୍ଥିତି ଯୋଗୁ ଯାଉନାହାନ୍ତି । ତେବେ ଏହି ନିରାଶ୍ରୟ,ମାନସିକ ବିକୃତି ଲୋକଙ୍କ ପାଇଁ ଆଗକୁ ଆସିଛି ପୁରୀ ପୋଲିସ । ପୁରୀ ପୋଲିସ ପକ୍ଷରୁ ପିସିଆର ଗାଡିରେ ଦିନ ଓ ରାତିରେ ଦୁଇ ଥର ଖାଦ୍ୟ ବଣ୍ଟା ଯାଉଛି ଏହି ଲୋକଙ୍କ ପାଇଁ । ଲକ ଡାଉନ ଆରମ୍ଭ ଦିନ ପର ଠାରୁ ଏହି ମହତ କାର୍ଯ୍ୟ ପୁରୀ ପୋଲିସ ଓ ଜିଲା ପ୍ରଶାସନ କରୁଛି।
ଅନେକ ସମୟରେ ପୋଲିସ କାର୍ଯ୍ୟକୁ ଲୋକ ମାନେ ନିନ୍ଦା କରିଥାନ୍ତି । ହେଲେ ସେହି ପୋଲିସ କିନ୍ତୁ ମାନବିକତା ଭୁଲି ନାହିଁ। ଗରିବ ନିରାଶ୍ରୟ ଲୋକ,ମାନସିକ ବିକୃତି ଲୋକ ଙ୍କୁ ଖାଦ୍ୟ ଯୋଗାଉଛି । ଆଉ ମାନବିକତା କାର୍ଯ୍ୟ ମଧ୍ୟ ଲୋକଙ୍କ ନିକଟକୁ ଏକ ସ୍ବତନ୍ତ୍ର ବାର୍ତ୍ତା ବହନ କରୁଛି । କୋରୋନା ପାଇଁ ଦେଶ ଘଡି ସନ୍ଧି ମୁହୂର୍ତ୍ତରେ ଥିବା ସାଧାରଣ ନାଗରିକ ମାନେ ପ୍ରତ୍ୟକ କାର୍ଯ୍ୟରେ ମାନବିକତା ପ୍ରଦର୍ଶନ କରିବା ଉଚିତ ।
ପୁରୀରୁ ଶକ୍ତି ପ୍ରସାଦ ମିଶ୍ର,ଇଟିଭି ଭାରତ
