ଭୁବନେଶ୍ବର: ପିପିଲି ଉପ-ନିର୍ବାଚନ ପାଇଁ ଏପର୍ଯ୍ୟନ୍ତ ତାରିଖ ଘୋଷଣା ହୋଇନଥିଲେ ମଧ୍ୟ ଜୋର ଧରିଲାଣି ରାଜନୈତିକ ଉଷ୍ମତା । ପିପିଲି ପାଇଁ ମହାରଥୀଙ୍କ ଅବଦାନ ରହିଛି ତଥା ତାଙ୍କ ଅନୁପସ୍ଥିତିକୁ ଅନୁଭବ କରୁଛନ୍ତି ପିପିଲି ନିର୍ବାଚନମଣ୍ଡଳୀ ଲୋକେ । ପିପିଲି ଭୋଟର ମହାରଥୀଙ୍କ ପରିବାରକୁ ଚାହୁଁଛନ୍ତି । ତେଣୁ ମହାରଥୀଙ୍କ ପରିବାରରୁ ଜଣକୁ ଟିକେଟ ମିଳୁ । ଆଜି ଏପରି ମନ୍ତବ୍ୟ ଦେଇ ରାଜନୈତିକ ବାତାବରଣକୁ ବେଶ ଉଷ୍ମ କରିଦେଇଛନ୍ତି ନିମାପଡା ବିଧାୟକ ତଥା ମନ୍ତ୍ରୀ ସମୀର ଦାଶ ।
ମହାରଥୀଙ୍କ ପରିବାରରୁ ଟିକେଟ ମିଳିବ ନା ଦଳ ବାହାରୁ କାହାକୁ ପ୍ରାର୍ଥୀ କରିବ ତାକୁ ନେଇ ଲାଗି ରହିଛି ଉତ୍କଣ୍ଠା । ତେବେ ଦଳ କାହାକୁ ପ୍ରାର୍ଥୀ କରିବ ସେ ନେଇ ମନ୍ତ୍ରୀ ସମୀର ଦାଶ କହିଛନ୍ତି, ପିପିଲି ମୋ ପାଖ ନିର୍ବାଚନ ମଣ୍ଡଳୀ ହୋଇଥିବାରୁ ମୁଁ ବୁଲାବୁଲି କରୁଛି । ପିପିଲି ଲୋକଙ୍କ ଇଛା ମହାରଥୀଙ୍କ ପରିବାରରୁ କେହି ପ୍ରାର୍ଥୀ ହେଉ । କାରଣ ତାଙ୍କ ସମୟରେ ପିପିଲିର ବେଶ ବିକାଶ ହୋଇଥିଲା। ତେବେ ଏ ସଂପର୍କରେ ମୁଖ୍ୟମନ୍ତ୍ରୀ ଚୂଡାନ୍ତ ନିଷ୍ପତ୍ତି ନେବେ ବୋଲି ସମୀର କହିଛନ୍ତି ।
ସେପଟେ ବିଜେପି ପକ୍ଷରୁ ଆଶ୍ରିତ ପଟ୍ଟନାୟକଙ୍କୁ ଦଳ ପ୍ରାର୍ଥୀ କରିପାରେ ବୋଲି ଚର୍ଚ୍ଚା ହେଉଛି । ଏସମ୍ପର୍କରେ ଆଜି ବିରୋଧୀ ଦଳ ଉପନେତା ବିଷ୍ଣୁ ସେଠୀ କହିଛନ୍ତି, ପିପିଲିରେ ଦଳୀୟ ପ୍ରାର୍ଥୀ ପାଇଁ ପ୍ରମୁଖ ଦାବିଦାର ହେଉଛନ୍ତି ଗତ ନିର୍ବାଚନର ଦ୍ବିତୀୟ ସ୍ଥାନରେ ଥିବା ବିଜେପିର ଆଶ୍ରିତ ପଟ୍ଟନାୟକ । କିନ୍ତୁ ଦଳ କାହାକୁ ପ୍ରାର୍ଥୀ କରିବ ରାଜ୍ୟ ସଭାପତି ଓ ସଂସଦୀୟ ବୋର୍ଡ ନିଷ୍ପତ୍ତି ନେବ ।
ଅନ୍ୟ କଂଗ୍ରେସ ମଧ୍ୟ ପ୍ରାରମ୍ଭିକ ପ୍ରସ୍ତୁତି ଆରମ୍ଭ କରିଛି । ଦଳ କଣ କରିବ କେଉଁ ରଣନୀତିରେ ନିର୍ବାଚନ ଲଢିବ ପ୍ରସ୍ତୁତି ଆରମ୍ଭ ହୋଇଛି । ଦଳ ହାଇକମାଣ୍ଡ ଯାହାକୁ ଟିକେଟ ଦେବେ ତାଙ୍କ ପାଇଁ ଦଳ କାମ କରିବ ବୋଲି କହିଛନ୍ତି ବିଧାୟକ ସୁର ରାଉତରାୟ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
