ନିମାପଡା:କମୁଛି ବନ୍ୟାଜଳ । ମାତ୍ର ଚାଷୀ ମୁଣ୍ଡ ଉପରେ ବନ୍ୟାଜଳ ଯେମିତି ଚଡ଼କ ପରି ହୋଇଛି । ପୁରୀ ଜିଲ୍ଲା ନିମାପଡ଼ା ବ୍ଲକର ଧନୁଁଆ ପଞ୍ଚାୟତର ଶହ ଶହ ହେକ୍ଟର ଚାଷ ଜମିରେ ଏବେ ବି ବନ୍ୟାଜଳ ଅଣ୍ଟେ ଲେଖାଏଁ ପାଣି ରହିଛି । କୂଳ ଲଙ୍ଘିଛି ଧନୁଆଁ ନଦୀ ।
ଦୀର୍ଘ ୮ଦିନ ଧରି ପାଣି ଭିତରେ ବୁଡି ରହିଥିବା ଚାଷ ଜମିକୁ ଦେଖି ଚାଷୀର ବୁଡିଛି ହୋସ । ପାଣି ଛାଡ଼ିବା ପରେ ଏବେ ଚାଷ ଜମିରେ ଭାସୁଛି ଆଣ୍ଠୁଏ ଉଚ୍ଚର ଦଳ । ଯାହାକୁ ନ କାଢିଲେ ଧାନ ଗଛ ପଚିଯିବା ଭୟ। ଏପଟେ ଦଳ କାଢ଼ିବା ପାଇଁ ଗୋଡ଼ କାଢ଼ିଲେ ବିଷଧର ସାପର ଭୟ। ଏସବୁ ଭିତରେ ଭାଗ୍ୟକୁ ଦୋଷ ଦେଇ ଦୁଃଖ କଷ୍ଟରେ ଚାଷ ଜମିରୁ ଦଳ କାଢିବାରେ ବ୍ୟସ୍ତ ରହିଛନ୍ତି ଚାଷୀ ପରିବାର ।
ଏଭଳି ସ୍ଥିତିରେ ନା ଜିଲ୍ଲା ପ୍ରଶାସନର ଦେଖାଅଛି ନା ଏଥିପ୍ରତି କୌଣସି ପଦକ୍ଷେପ ନେଉଛନ୍ତି । ଅନ୍ୟପଟେ ପଞ୍ଚାୟତର ଉଳପଦା ଗ୍ରାମର ଯୁବ ଚାଷୀ ବାଜି ପରିଡ଼ା ଆଣିଛନ୍ତି ସାଙ୍ଘାତିକ ଅଭିଯୋଗ । ପଞ୍ଚାୟତର ଦଳ ସମସ୍ୟା ପାଇଁ ସେ ନିକଟସ୍ଥ ଗାଁର କିଛି ଯୁବକଙ୍କୁ ଦାୟୀ କରିଛନ୍ତି ।
ଅଭିଯୋଗ ମୁତାବକ ଦେଖତା ଗାଁରେ ଥିବା ଏକ ପୋଖରୀରୁ କିଛି ଯୁବକ ମାଛ ଚାଷ ପାଇଁ ଦଳ କାଢ଼ି ବନ୍ୟାପାଣିରେ ଛାଡିଛନ୍ତି । ଫଳରେ ଦଳ ଭାସି ଆସି ଲୋକଙ୍କ ଚାଷଜମିରେ ଅଟକି ରହୁଛି । ଏନେଇ ସେମାନଙ୍କୁ ବାରଣ କରିବାରୁ ସେହି ଯୁବକମାନେ ମିଶି ଗାଳିଗୁଲଜ ସହ ଧମକଚମକ ଦେଇଥିବା ଅଭିଯୋଗ ହୋଇଛି । ଏହାକୁ ନେଇ ଗୋଟିଏପଟେ ଦେଖତା ଓ ଅନ୍ୟପଟେ ବଉଳପଦା, ଇଛାପୁର, ରଏଡ଼ବଜାର, ବଣିକସାହି ଗ୍ରାମ ମଧ୍ୟରେ ବିବାଦ ଦେଖାଯାଇଛି ।
ନିମାପଡାରୁ ତାପସ ପରିଡା, ଇଟିଭି ଭାରତ
