ପୁରୀ: ସହରର ତାଳ ବଣିଆ ଥାନା ପୋଲିସ ଏକ ଡକାୟତ ଗ୍ୟାଙ୍ଗକୁ ଧରିବାରେ ସଫଳ ହୋଇଛି । 5 ଜଣ ଡ଼କାୟତକୁ ପୋଲିସ ଗିରଫ କରିଥିବାବେଳେ ସେମାନଙ୍କ ନିକଟରୁ 3ଟି ଖଣ୍ଡା, ଗୋଟିଏ ଛୁରୀ, 2ଟି ବୋମା ଓ ଲଙ୍କା ଗୁଣ୍ଡ ପ୍ୟାକେଟ ପୋଲିସ ଜବତ କରିଛି । ଗିରଫ ଅଭିଯୁକ୍ତମାନେ ହେଲେ ପୁରୀ ପେଣ୍ଠକଟାର ଗିରିଧାରୀ ବେହେରା, ଲୋକନାଥ ରୋଡ଼ର ମଙ୍ଗୁଳି ବାରିକ, ଦୋଳବେଦୀ କୋଣର ଶିବୁ ନାୟକ, ମାର୍କଣ୍ଡେୟ ସାହିର ରୋହନ କୁମାର ଦଳେଇ ଏବଂ ବିନୋବା ନଗରର ରତ୍ନାକର ସେଠୀ ।
ପୋଲିସର ସୂଚନା ଅନୁଯାୟୀ, ଶନିବାର ବିଳମ୍ବିତ ରାତିରେ ତାଳ ବଣିଆ ଥାନା ଅନ୍ତର୍ଗତ ହରିହର ବିହାରର ଏକ ନିଛାଟିଆ ଜାଗାରେ କିଛି ଯୁବକ ଏକାଠି ହୋଇଥିଲେ । ସେମାନଙ୍କ ପାଖରେ ବିଭିନ୍ନ ମରଣାସ୍ତ୍ର ଥିବା ପୋଲିସ ଟିମ୍ ପାଖରେ ଖବର ଆସିଥିଲା । ପରେ ପୋଲିସ ଚଢାଉ କରି ସମ୍ପୃକ୍ତ 5 ଡ଼କାୟତଙ୍କୁ ଗିରଫ କରିଥିଲା । ତେବେ ଏକ ଡକାୟତି କରିବା ପାଇଁ ସମ୍ପୃକ୍ତ ଅଭିଯୁକ୍ତମାନେ ଯୋଜନା କରୁଥିବା ପୋଲିସ ଆଗରେ ସ୍ୱୀକାର କରିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
