ପୁରୀ: ପିପିଲି ଟୋଲ ଗେଟ୍ ନିକଟରୁ 50 ଲକ୍ଷ ଟଙ୍କା ଜବତ କଲା ପୋଲିସ । ପିପିଲି ଉପ ନିର୍ବାଚନ ଅଵସରରେ ପୋଲିସ ପକ୍ଷରୁ ବିଭିନ୍ନ ଯାନ ବାହାନ କଡାକଡି ଚେକିଂ କରାଯାଉଛି । ଏହି ଯାଞ୍ଚ ସମୟରେ ପାଖାପାଖି 50 ଲକ୍ଷ ଟଙ୍କା ପୋଲିସ ଜବତ କରିଛି। ତରାକାଜ ଛକ ନିକଟରେ ପୋଲିସ ଏହି ଟଙ୍କା ଜବତ କରିଛି ।
ପୋଲିସର ସୂଚନା ଅନୁଯାୟୀ ଗୋଟିଏ ବାଇକରେ 2 ଜଣ ବ୍ୟକ୍ତି ଯାଉଥିବା ବେଳେ ପିପିଲି ଟୋଲ ଗେଟ୍ ନିକଟରେ ଚେକିଂ ଚାଲୁଥିଲା। ହେଲେ ସେମାନେଙ୍କୁ ପୋଲିସ ଅଟକାଇଲା ବେଳେ ସେମାନେ ଖସି ପଳାଇବାକୁ ଚେଷ୍ଟା କରିଥିଲେ। ପୋଲିସ ତାଙ୍କୁ ପିଛା କରି ତରାକାଜ ଛକରେ ଧରିବା ସହ ଥାନାରେ ଅଟକ ରଖି ଅଧିକ ପଚରା ଉଚରା କରୁଛି।
ଆସନ୍ତା 17 ତାରିଖ ପିପିଲି ଉପ ନିର୍ବାଚନ ଥିବାବେଳେ କୌଣସି ଯାନ ବାହାନରେ ଯେଭଳି କୌଣସି ଅନୈତିକ ଜିନିଷ ତଥା ଟଙ୍କା, ମାରଣାସ୍ତ୍ର ଓ ନିଶା ସାମଗ୍ରୀ ପିପିଲି ନିର୍ବାଚନ ମଣ୍ଡଳୀକୁ ଆସି ପାରିବ ନାହଁ । ସେନେଇ ପିପିଲିର ପ୍ରବେଶ ପଥ ଗୁଡିକରେ ଜୋରଦାର ଯାଞ୍ଚ ଚାଲିଛି । ପିପିଲି ଏସଡିପିଓ ଦେବଦତ୍ତ ବରାଳ ଏହି ସୂଚନା ଦେଇଛନ୍ତି । ଅଟକ ଦୁଇ ଜଣ ଵ୍ୟକ୍ତି ବଳଙ୍ଗା ଥାନା ଅଞ୍ଚଳର ବୋଲି ଜଣାପଡିଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
