ପୁରୀ: ଆଷାଢ ମାସ ଯାଇ ରାଜ୍ୟରେ ପ୍ରବେଶିଛି ଶ୍ରାବଣ ମାସ । ତଥାରି ନାହିଁ ବର୍ଷାର ନା ଗନ୍ଧ । ଫଳରେ ପୁରୀ ଜିଲ୍ଲାର ହଜାର ହଜାର ଏକର ଚାଷ ଜମିରେ ହୋଇପାରୁ ନାହିଁ ଚାଷ । ବିଲରେ ପଡିଥିବା ତଳି ବି ନଷ୍ଟ ହେବାକୁ ବସିଛି । ଯାହାକୁ ନେଇ ଚାଷୀ ମୁଣ୍ଡରେ ପଡିଛି ଚଡକ । ଏମିତିରେ ଯଦି ବର୍ଷା ନହୁଏ ତାହେଲେ ମରୁଡି ନିଶ୍ଚିତ ବୋଲି ଚାଷୀ ଆଶଙ୍କା କରିଛନ୍ତି ।
ଦୃଶ୍ୟ ହେଉଛି ପୁରୀର ସଦର ବ୍ଲକ ବୀରହରେକୃଷ୍ଣପୁର ଅଞ୍ଚଳର । ବର୍ଷା ଅଭାବରୁ ଏଠାରେ ଏକର ଏକର ଚାଷ ଜମି ପଡିଆ ପଡିଛି । କେବଳ ସଦର ବ୍ଲକ ନୁହେଁ ବରଂ ପୁରୀର ସମସ୍ତ ବ୍ଲକରେ ସମାନ ପରିସ୍ଥିତି । ପାଣିପାଗ ବିଭାଗର ସୂଚନା ଅନୁଯାୟୀ ଜୁଲାଇ ମାସ ଶେଷ ସୁଦ୍ଧା ଜିଲ୍ଲାରେ ମୌସୁମୀରେ ଯେତିକି ବର୍ଷା ହେବା କଥା ତା’ଠାରୁ ଯଥେଷ୍ଟ କମ ହୋଇଛି । କେବଳ ସେତିକି ନୁହେଁ ସାରା ରାଜ୍ୟରେ ପୁରୀ ଜିଲ୍ଲାରେ ସର୍ବନିମ୍ନ ବର୍ଷା ହୋଇଥିବା ରେକର୍ଡ କରାଯାଇଛି । ଫଳରେ ଜିଲ୍ଲାରେ ଚାଷ କାର୍ଯ୍ୟ ଢେର ପଛରେ ରହିଯାଇଥିବା ଦେଖାଯାଇଛି ।
ଗୋଟିଏ କୋରୋନା ବିତ୍ପାତ୍ତ ପାଇଁ ସ୍ଥିତି ଅଣାୟତ୍ତ ଥିବାବେଳେ ଅନ୍ୟପଟେ ସମ୍ଭାବ୍ୟ ମରୁଡି ସ୍ଥିତି ବୋଝ ଉପରେ ନଳିତା ବିଡା ସାଜିଛି । କିଭଳି ଚାଷ ହେବ ଓ ରୋଜଗାର ହେବ ସେନେଇ ଏବେ ଚିନ୍ତାରେ ଚାଷୀ । ତେବେ ଯେଁଉ ସ୍ଥାନରେ କେନାଲ ଅଛି ସେଠାରେ ବି ସମାନ ପରିସ୍ଥିତି । ବର୍ଷାଭାବରୁ ଉପର ମୁଣ୍ଡରେ ଜଳାଭାବ ଯୋଗୁଁ କେନାଲ ବି ଶୁଖିଯାଇଛି । ଆଉ କିଛି ସ୍ଥାନରେ ଯେଉଁଠି ଜଳସେଚନର ସୁବିଧା ଅଛି ସେଠାରେ ମରାମତି କାର୍ଯ୍ୟ ଶେଷ ହୋଇ ନଥିବାରୁ ଜମି ମୁଣ୍ଡକୁ ପହଞ୍ଚିପାରୁ ନାହିଁ ଜଳ । ସବୁ ଦିଗରୁ ଏବେ ପୁରୀ ଜିଲ୍ଲାର ଚାଷୀ ନିରାଶ ହୋଇ ପଡିଥିବାବେଳେ ମରୁଡି ସ୍ଥିତି ବଢାଇଛି ଚାଷୀଙ୍କ ଚିନ୍ତା ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
