ପୁରୀ: କ୍ରୀଡାମନ୍ତ୍ରୀଙ୍କ ବହିଷ୍କାର ଦାବି କଲା କୋଣାର୍କ ନଗର କଂଗ୍ରେସ । କୋଣାର୍କ ନଗର କଂଗ୍ରେସ ପକ୍ଷରୁ କଂଗ୍ରେସ କାର୍ଯ୍ୟାଳୟ ଠାରୁ ଏକ ରାଲି କରି କୋଣାର୍କ ଥାନା ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି । କ୍ରୀଡ଼ାମନ୍ତ୍ରୀ ତୁଷାରକାନ୍ତି ବେହେରାଙ୍କୁ ମନ୍ତ୍ରୀ ପଦରୁ ବହିଷ୍କାର ଦାବି କରାଯାଇଛି । ଗିରଫ ଦାବି କରି ଏକ ଦାବିପତ୍ର କୋଣାର୍କ ଥାନା ଅଧିକାରୀଙ୍କୁ ପ୍ରଦାନ କରାଯାଇଛି।
ଗତ ୧୭ ତାରିଖରେ କୋଣାର୍କ କୁରୁଜଙ୍ଗ ପଞ୍ଚାୟତର କୁଞ୍ଜ ଠାରେ ଆଦର୍ଶ ବିଦ୍ୟାଳୟ ଭିତ୍ତିପ୍ରସ୍ତର ସ୍ଥାପନ କରିଥିଲେ ମନ୍ତ୍ରୀ । ସରକାରୀ ଟଙ୍କାକୁ ସରକାରୀ ମନ୍ତ୍ରୀ ଅପବ୍ୟବହାର କରି ସରକାରୀ କାର୍ଯ୍ୟକ୍ରମରେ ଦଳୀୟ କାର୍ଯ୍ୟକ୍ରମ କରି ବିଦ୍ୟାଳୟ ପାଇଁ ଉଦ୍ଦିଷ୍ଟ ପଡିଆରେ ଶିଳାନ୍ୟାସ କରିଥିଲେ । ତେବେ, ଏଥିରେ ଦଳୀୟକର୍ମୀ ସମ୍ମିଳନୀ ଓ ବନ୍ଧୁ ମିଳନ କାର୍ଯ୍ୟକ୍ରମ କିପରି ହେଲା ଅଭିଯୋଗ ଆଣିଛି କୋଣାର୍କ ନଗର କଂଗ୍ରେସ । ଚନ୍ଦ୍ରଭାଗାରେ ସରକାର ମାଘମେଳା ଭଳି ଧାର୍ମିକ କାର୍ଯ୍ୟକ୍ରମ ଉପରେ 144 ଧାରା ଜାରି କରିବା କଟକଣା ଲଗାଇଥିବା ବେଳେ ମନ୍ତ୍ରୀ କେଉଁ ଭଳି କୋଭିଡ ନିୟମ ଉଲଘଂନ କରି ଏଭଳି କାର୍ଯ୍ୟ କଲେ ବୋଲି କଂଗ୍ରେସ ପ୍ରଶ୍ନ କରିଛି । ଏଥିରେ ଦୃଢ଼ କାର୍ଯ୍ୟାନୁଷ୍ଠାନ ନିଆନଗଲେ ଆଗାମୀ ଦିନରେ ରାଜରାସ୍ତା ରୋକ କରାଯିବ । ଏହାସହ କାକଟପୁର ନିର୍ବାଚନ ମଣ୍ଡଳୀରେ ବିଜେଡିର କୈାଣସି ଦଳୀୟ କାର୍ଯ୍ୟକ୍ରମ କରାଇ ଦେବେନି ବୋଲି ରାଜ୍ୟ କଂଗ୍ରେସର ସାଧାରଣ ସମ୍ପାଦକ ବିଶ୍ବଭୂଷଣ ଦାସ ଚେତାବନୀ ଦେଇଛନ୍ତି।
ପୁରୀରୁ ଶକ୍ତି ପ୍ରସାଦ ମିଶ୍ର,ଇଟିଭି ଭାରତ
