ପୁରୀ: ସାଧାରଣ ନିର୍ବାଚନ ପାଇଁ ନିମାପଡ଼ା ବ୍ଲକ ବଳଙ୍ଗା ଡେଲଟା ପଡିଆ ଠାରେ ବିଜୟ ସଂକଳ୍ପ ସଭା ଅନୁଷ୍ଠିତ ହୋଇଯାଇଛି । ରାଜ୍ୟ ସରକାର ବଦଳିବା ଦରକାର, ଫିର୍ ଏକ ବାର୍ ମୋଦି ସରକାର ଗଠନ କରିବା ନେଇ ବିଜୟ ସଂକଳ୍ପ ସଭା ଅନୁଷ୍ଠିତ ହୋଇଥିଲା । ଆୟୋଜିତ ସଂକଳ୍ପ ସମାବେଶରେ ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ତଥା ବିଜେପି ରାଷ୍ଟ୍ରୀୟ ଉପସଭାପତି ଶିବରାଜ ସିଂ ଚୌହାନ ଯୋଗ ଦେଇଥିଲେ ।
ଜୟ ଜଗନ୍ନାଥରୁ ନିଜ ଅଭିଭାଷଣ କରିଥିଲେ ଶିବରାଜ । ଏହା ସହ ବିଜେପିର ସମସ୍ତ ପ୍ରାର୍ଥୀଙ୍କୁ ବିଜୟୀ କରିବାକୁ କହିଥିଲେ। ଏହାସହ ପୁଲୱାମା ଆକ୍ରମଣରେ ସହିଦ ମନୋଦ ବେହେରା ଓ ପ୍ରସନ୍ନ ସାହୁଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରି ସିଧାସଳଖ ବିଜେଡି ଓ କଂଗ୍ରେସକୁ ଟାର୍ଗେଟ କରିଥିଲେ । ବିଜେଡି ଓ କଂଗ୍ରେସ ଯବାନମାନଙ୍କୁ ଅପମାନ କରିଛି ବୋଲି ଶିବରାଜ ସଙ୍ଗୀନ ଅଭିଯୋଗ ଆଣିଥିଲେ । ଏଥିସହିତ ସହିଦ ମନୋଜ ବେହେରାଙ୍କ ସମ୍ପର୍କୀୟଙ୍କୁ ବିଧାୟକ ଦେବାଶିଷ ସାମନ୍ତରାୟ ଦୁଃର୍ବ୍ୟବହାର ଘଟଣାକୁ ଜନତାକୁ ମନେ ପକାଇଥିଲେ । ଏଭଳି ଏକ ନିନ୍ଦନୀୟ ଘଟଣା ପରେ କେମିତି ନବୀନ ବାବୁ ଚୁପ ଅଛନ୍ତି ବୋଲି ପ୍ରଶ୍ନ ମଧ୍ୟ କରିଥିଲେ ଶିବରାଜ ।
ଅପରପକ୍ଷେ କଂଗ୍ରେସ ସର୍ବଦା ପାକିସ୍ଥାନର କଥା କହୁଥିବା ଅଭିଯୋଗ ଆଣିଥିଲେ। କଂଗ୍ରେସ ସରକାର ସମୟରେ ମୁମ୍ୱାଇରେ ଆତଙ୍କବାଦୀ ଆକ୍ରମଣ ହୋଇଥିଲା । କିନ୍ତୁ ସେ ସମୟରେ କଂଗ୍ରେସ ପକ୍ଷରୁ କୌଣସି କଡା ପଦକ୍ଷେପ ନିଆଯାଇନଥିଲା । ମାତ୍ର ପୁଲୱାମା ଆତଙ୍କି ଆକ୍ରମଣର 72 ଘଣ୍ଟା ଭିତରେ ମୋଦି ସରକାର ଜବାବ ଦେଇଥିଲା ବୋଲି କହିଥିଲେ ଶିବରାଜ । ଏହାଛଡା ଏୟାର ଷ୍ଟାଇକ ଉପରେ କଂଗ୍ରେସ ଯେଉଁ ଆରୋପ ଲଗାଇଥିଲା ସେ ନେଇ ମଧ୍ୟ କଡା ଜବାବ ରଖିଥିଲେ। ସେପଟେ ନବୀନ ସରକାରରେ ପିସି କାରବାର ହେଉଥିବା ବେଳେ ତାଙ୍କ ଗଡରେ ନାରୀ ସୁରକ୍ଷିତ ନୁହେଁ ବୋଲି ଅଭିଯୋଗ ଆଣିଛନ୍ତି ।
ବିଜୟ ସଂକଳ୍ପ ସମାବେଶରେ ନିମାପଡା ବିଧାୟିକା ପ୍ରାର୍ଥୀ ପ୍ରଭାତୀ ପରିଡା, ନିମାପଡାର ପୂର୍ବତନ ବିଧାୟକ ବାଇଧର ମଲ୍ଲିକ ଓ ଜିଲ୍ଲା ବିଜେପି ସଭାପତି ପ୍ରଭଞ୍ଜନ ମହାପାତ୍ର ପ୍ରମୁଖ ଉପସ୍ଥିତ ଥିଲେ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
