ପୁରୀ: ଭାଦ୍ରବ କୃଷ୍ଣ ଦଶମୀ ତିଥି ଅବସରରେ ଶ୍ରୀମନ୍ଦିରରେ ଆୟୋଜିତ ହୋଇଛି ମହାପ୍ରଭୁଙ୍କ ବନଭୋଜି ବେଶ । ଏଥିସହ ଶ୍ରୀମନ୍ଦିରରେ ଶୁକ୍ରବାର କୋଳିବିକା ନୀତି, ବକାସୁର ବଧ ଓ ଅର୍ଘାସୁର ବଧ ପାଳିତ ହେବା ନେଇ ସୂଚନା ରହିଛି । ବିଧି ମୁତାବକ ପ୍ରଥମେ ମଧ୍ୟାହ୍ନ ଧୂପ ସମାପନ ହେବା ପରେ ଦୁଇ ଚଳନ୍ତି ପ୍ରତିମା ରାମ କୃଷ୍ଣ ସିଂହାସନକୁ ବିଜେ କରନ୍ତି । ଏହାପରେ ପୂଜା ପଣ୍ଡା ଶ୍ରୀବଳଭଦ୍ରଙ୍କ ବାଡରୁ ରାମଙ୍କୁ ଏବଂ ମହାପ୍ରଭୁ ଶ୍ରୀଜଗନ୍ନାଥଙ୍କ ବାଡରୁ କୃଷ୍ଣଙ୍କୁ ଆଜ୍ଞା ମାଳ ଦେବେ ।
ଏହି ନୀତି ସମ୍ପର୍ଣ୍ଣ ପରେ ଦୁଇ ପ୍ରତିମାଙ୍କୁ ବିମାନରେ ବସାଇ ସିଂହଦ୍ବାର ଦେଇ ବଡଛତା ମଠ ପାର୍ଶ୍ବରେ ଥିବା ଏକ କାଠ ସିଂହାସନରେ ବିଜେ କରନ୍ତି । ଲେଙ୍କା ସେବକ ଶବରୁଣୀ ବେଶ ହୋଇ ଗୁଆକୋଲି ଓ ନଡିଆ ପାତି ମିଶାଇ ଏକ ବାଉଁଶିଆରେ ଧରି ଆସି ସେଠାରେ ଡାକ ପକାଇଥାଏ । ଡାକ ଶୁଣି ଭିତରଚ୍ଛ ମହାପାତ୍ର ଶବରୁଣୀଙ୍କଠାରୁ କୋଳି ଆଣି ମହାପ୍ରଭୁଙ୍କୁ ସମର୍ପଣ କରି ମଣୋହି କରିଥାଆନ୍ତି । ଏଥିସହ ପୂଜା ପଣ୍ଡା ସେଠାରେ ଶୀତଳ ଭୋଗ ଓ ଭିତରଚ୍ଛ ମହାପାତ୍ର ବନ୍ଦାପନା କରିଥାଆନ୍ତି ।
ବନ୍ଦାପନା ଅନ୍ତେ ସନ୍ଧ୍ୟାଧୂପ ପରେ ତ୍ରିବିଗ୍ରହଙ୍କୁ ବଣଭୋଜି ବେଶରେ ସଜ୍ଜିତ କରାଯାଏ । ଏହି ବେଶରେ ଠାକୁରମାନେ ଶ୍ରୀଭୂଜରେ ଶିକାର ରୂପା ପିଙ୍ଗଣରେ ସର ଧରନ୍ତି, ଅନ୍ୟ ହସ୍ତରେ ନଉଡି ଧରନ୍ତି । ଏହି ବନଭୋଜି ବେଶରେ ଠାକୁରମାନଙ୍କୁ ପ୍ରାୟ 18 ପ୍ରକାର ସ୍ବର୍ଣ୍ଣ ଅଳଙ୍କାରରେ ବିମଣ୍ଡିତ କରାଯାଇଥାଏ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
