ପୁରୀ: ବଡଦାଣ୍ଡ ମହୋତ୍ସବକୁ ନେଇ କମ୍ପିଲା ବଡଦାଣ୍ଡ । ଶହ ଶହ ସଂଖ୍ୟାରେ ସାମିଲ ହୋଇଛନ୍ତି ଶ୍ରଦ୍ଧାଳୁ । ଭଜନ କୀର୍ତ୍ତନ, ଝୋଟି ଓ ଚିତ୍ରାଙ୍କନରେ ଝଲସୁଛି ବଡଦାଣ୍ଡ । ବିଭିନ୍ନ ଲୋକ ନୃତ୍ୟ ମଧ୍ୟ ପରିବେଷଣ ହୋଇଛି । ତେବେ ଲୋକଙ୍କ ମଧ୍ୟରେ ଭକ୍ତି ଓ ସମର୍ପଣ ଭାବନା ଜାଗ୍ରତ କରିବାକୁ ଏଭଳି ପ୍ରୟାସ କରିଛି ଜିଲ୍ଲା ପ୍ରଶାସନ ।
ସକାଳୁ ସକାଳୁ ମହାପ୍ରଭୁଙ୍କ ଦର୍ଶନ କରିବା ସହ ବଡ଼ଦାଣ୍ଡ ସମସ୍ତଙ୍କ ମନ ମୋହି ନେଇଛି । ପ୍ରତି ରବିବାର ସକାଳ 6ଟାରୁ 8ଟା ପର୍ଯ୍ୟନ୍ତ 2ଘଣ୍ଟା ଧରି ପୁରୀରେ ଅନୁଷ୍ଠିତ ହେଉଛି ବଡଦାଣ୍ଡ ମହୋତ୍ସବ । ଗତ ରବିବାର ଏହାର ପ୍ରଥମ ଶୁଭାରମ୍ଭ ହୋଇଥିବାରୁ ଏହା ଦ୍ବିତୀୟ ରବିବାର । ଶ୍ରୀକ୍ଷେତ୍ରରେ ଆଧ୍ୟାତ୍ମିକ ପରିବେଶ ବଜାୟ ରଖିବାକୁ ଶ୍ରୀମନ୍ଦିର ଚତୁର୍ଥପାର୍ଶ୍ବରେ ଏହି ପ୍ରୟାସ ଆରମ୍ଭ ହୋଇଛି ।
ପୁରୀର ସାହିଯାତ, ଓଡ଼ିଶୀ, ଗୋଟିପୁଅ ନୃତ୍ୟର ଝଲକ୍ ଏହି ମହୋତ୍ସବରେ ସ୍ଥାନ ଦିଆଯାଇଥିଲା । ଜିଲ୍ଲା ପ୍ରଶାସନ ଶ୍ରୀମନ୍ଦିର ପରିଚାଳନା କମିଟି ଓ ଶ୍ରୀଜଗନ୍ନାଥ ସଂସ୍କୃତି ଗବେଷକଙ୍କ ସହ ଆଲୋଚନା କରି କାର୍ଯ୍ୟକ୍ରମର ନିର୍ଦ୍ଦିଷ୍ଟ ନାମ କରଣ କରାଯିବ ।
ସେହିପରି ପ୍ରତିଦିନ ସକାଳେ ସିଂହଦ୍ବାର ନିକଟରେ ଭଜନ କୀର୍ତ୍ତନ ସହ ଭକ୍ତମାନେ କିଭଳି ପ୍ରାର୍ଥନା ସହ ମହାପ୍ରଭୁଙ୍କ ଆରାଧନା କରିପାରିବେ ସେ ନେଇ ଖୁବ ଶୀଘ୍ର ବ୍ୟବସ୍ଥା ହେବ ବୋଲି ପୁରୀ ଜିଲାପାଳ କହିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
